Read Jinghpaw Common Language Bible 2009 2 PETRU 1 Bible Online

2 PETRU 1 - Jinghpaw Common Language Bible 2009 bible

2 PETRU 1

¹Yesu Hkristu a mayam hte, kasa tai nga ai, ngai Simun Petru gaw, anhte a Karai Kasang hte hkye hkrang la ai Madu Yesu Hkristu a ding hpring ai lam hta anhte zawn hpu la ai makam masham lu la nga ai ni hpang de ga shana dat nngai.

²Karai Kasang hte anhte a hkye hkrang la ai Yesu Hkristu hpe nanhte chye chyang ai a marang e nanhte gaw chyeju hte ngwi pyaw ai hpe hkum tsup hkra hkam la lu myit ga law.

³Shi a hpung shingkang hte mai kaja ai lam hpe garan hkam la na matu anhte hpe shaga la ai Hkristu hpe chye chyang ai a marang e Karai Kasang a n-gun atsam gaw teng man ai nawku htung makam masham hta asak hkrung nga lu na matu anhte hta ra kadawn nga ai lam yawng mayawng jaw ya mani ai.

⁴Ndai lam hku nna grai galu kaba nna hpu ging ai chyeju kumhpa hte seng ai ga sadi ni anhte hpe jaw da mani ai. Dai rai nna ndai chyeju ni a marang e anhte gaw mungkan ga na jahten shabyak shangun ai myit marin ai lam kaw nna lawt lu nna Karai a marai hpe shang lawm dagraw lu myit dai.

⁵Ndai lam nan a majaw, nanhte a makam masham hta mai kaja ai lam, mai kaja ai hte chye chyang ai lam a shajat nga mu.

⁶Chye chyang ai lam hta tinang a hkum hpe hkang ai, tinang a hkum hpe hkang ai hta hkam sharang ai, hkam sharang ai hta tara hkungga ai lam,

⁷Tara hkungga ai lam hta hpu nau hpe n-gaw n wai ai, hpu nau hpe n-gaw n wai ai hta tsaw ra ai myit, a shajat nga mu.

⁸Ndai hte gaw nanhte hta nga ra ai atsam marai ni rai nga ai; ndai lam ni nanhte hta n taw n tsang rawng nga ai rai yang gaw, anhte a Madu Yesu Hkristu hpe nanhte chye chyang ai hte asak hkrung ai lam hta kasang galang rai nna akyu byin shangun na marin dai.

⁹Rai ti mung dai atsam ni hpe n lu la ai ni kadai mung tsan tsan n mu mada ai, myi n mu ai wa rai nna shi a lai wa sai yubak mara ni kaw nna jasan jaseng la hkrum sai lam hpe nan malap mali di kau nu ai.

¹⁰Dai re ai majaw, nye a hpu nau ni e, nanhte hpe Karai Kasang e shaga la ai hte lata la sai ngu ai lam hpe tut tut hkam sha nga na matu grau nna shakut shaja nga mu. Shing rai galaw myit yang gaw, nanhte a makam masham hpe galoi mung kabai kau na myit dai n rai.

¹¹Dai lam hku hkan sa myit yang gaw, anhte a Madu hte hkye hkrang la ai Yesu Hkristu a htani htana re ai mungdan de shang lu na ahkang nanhte hpe hpring hpring tsup tsup jaw ya na marin dai.

¹²Dai majaw nanhte gaw ndai lam ni hpe chye na nna nanhte hkap la da sai dai teng man ai lam hta ngang ngang kang kang npawt de da manit dai rai ti mung, ngai nanhte hpe galoi mung naw ashadum jahprang nga mayu nngai.

¹³Ngai asak naw hkrung nga ai ladaw hte yang, dai lam ni hte seng nna nanhte hpe sadi jaw shadum na gaw ngai galaw ang ai amu re ngu nna ngai myit la nngai.

¹⁴Anhte a Madu Yesu Hkristu ngai hpe asan sha tau tsun da sai hte maren, ndai si chye ai hkum hkrang hpe kade n na yang raw kabai kau na ra ai hpe ngai chye nga nngai.

¹⁵Dai re ai majaw, ngai si mat ai hpang ndai lam ni hpe nanhte galoi mung adum nga na matu ngai atsam htum hkra shakut na nngai.

¹⁶Anhte a Madu Yesu Hkristu a hpung shingkang atsam hte du sa ai lam nanhte hpe chye shangun na matu anhte gaw masha e gyin shalat la ai maumwi hta shamyet shanat ai lam n galaw saga ai. Anhte a myi hte nan shi a galu kaba hkik hkam ai lam hpe mu lu saga ai.

¹⁷Shi hpe Kawa Karai Kasang kaw na arawng sadang hte hpung shingkang jaw ya ai shaloi mung grau htum ai hpung shingkang kata nna shi kaw du ai nsen, “Ndai wa gaw ngai sharawng awng nga ai, ngai tsaw ra ai, ngai sha rai nga li ai!,” nga nna tsun ai shaloi mung, anhte dai kaw shi hte rau nga ga ai.

¹⁸Dai ten hta anhte ni nan Madu hte rau chyoi pra ai bum ntsa e nga nga yang, lamu de na ngoi pru wa ai nsen hpe anhte na lu ga ai.

¹⁹Dai re ai majaw anhte gaw myihtoi ni htawn tsun ai shingran mungga hpe grau nna myit mu myit hkut lu saga ai. Nanhte dai mungga hpe atsawm sha madat mara nga mu; hpa majaw nga yang, dai gaw nanhte a myit masin ni hta htoi leng wa nna, nhtoi gintawng pru wa ai aten du hkra, nsin sin ai shara hta htoi tu nga ai pyengdin zawn rai nga ai.

²⁰Rai ti mung, kadai wa mung tinang dai myit ra ai hku Chyum laika ni hta na myihtoi ga langai mi a lachyum n hta la lu ai hpe yawng a shawng e matsing da ra nga ai.

²¹Hpa majaw nga yang, gara myihtoi ga mung masha a myit ra myit jasat ai hku nna byin pru wa ai n rai; chyoi pra ai wenyi myit shadut ya hkrum ai masha ni gaw Karai Kasang kaw na du ai mungga hpe htawn tsun ma ai.