Read Jinghpaw Common Language Bible 2009 2 PETRU 3 Bible Online

2 PETRU 3 - Jinghpaw Common Language Bible 2009 bible

2 PETRU 3

¹Nye a tsaw ra ai manang ni e, ndai gaw ngai nanhte hpang de lahkawng lang ngu na ka dat ai laika rai li ai. Ndai laika lahkawng yan hta nanhte a san seng ai myit ni hte chye na na matu lawu na lam ni hte seng nna shadum dat made ai.

²Chyoi pra ai myihtoi ni moi shawng de tsun dan ai ga hpe mung, nanhte a kasa ni a lata hku nna hkye hkrang la ai Madu hkang da ai ga ni hpe mung ngai nanhte hpe bai myit dum shangun mayu nga nngai.

³Dai jahtum ai nhtoi ni hta tinang a hkum shan a kayut ai a myit ra ai hku hkan let asak hkrung ai masha ni paw pru na mara ai hpe yawng a shawng e nanhte chye na da ra myit dai. Shanhte gaw nanhte hpe jahpoi asawng let, “Dai Madu bai du sa na nga nna ga sadi jaw da ai n rai ni? Ya shi kanang rai nga a ta?

⁴Anhte a kawa ni si mat wa masai; rai ti mung arai yawng mayawng gaw, mungkan ga hpe hpan da ai aten na hte maren sha arai nga a hka!,” nga nna san na ma ai.

⁵Karai Kasang gaw shawng npawt e sumsing lamu hte ginding aga hpe shi a hkang da ai ga hte hpan da sai hpe mung, ginding aga hpe hka kata kaw na hka hte shapraw da sai hpe mung,

⁶Bai nna mungkan dingsa hpe hka hte nan sha-u sha-ing nna jahten kau sai hpe mung, shanhte dingsang malap mali di kau mu ai.

⁷Rai ti mung Karai Kasang gaw ya nga nga ai sumsing lamu ni hte ginding aga hpe wan hte jahten kau na matu moi na mungga hte nan kyem mazing da nga wu ai. Shanhte hpe tara n hkungga ai masha ni hte rau tara daw dan nna jahten kau na nhtoi du hkra naw tawn da wu ai.

⁸Rai ti mung tsaw ra ai manang ni e, lam langai mi hpe hkum malap kau mu, Madu a man e lani mi hte shaning hkying mi gaw hpa n shai nga ai; shi a man e dai lahkawng gaw maren sha rai nga ai.

⁹Masha nkau mi myit ai zawn, Karai Kasang gaw shi a ga sadi jaw da sai lam hpe galaw shadik na matu aten la nna lanyan taw nga ai n rai; rai ti mung yawng mayawng yubak mara kaw na kayin wa nna kadai mung hten bya ai n hkrum u ga, shi ra nga ai majaw shi nanhte a ntsa e, myit galu nga ai majaw rai nga ai.

¹⁰Dai Madu a nhtoi chyawm gaw lagu lagut zawn du na ra ai; dai nhtoi hta e sumsing lamu gaw grai kyek kachyeng ai nsen ngoi nna mat mat wa na ra ai. Sumsing nhtoi hkum ni mung wan hkru nna hten bya mat na mara ai; ginding aga hte nga manga ni mung hkoi mat na mara ai.

¹¹Arai yawng mayawng ndai hku nna jahten kau hkrum na ra ai rai yang gaw, nanhte kaning re ai masha ni rai ra nga myit ta? Nanhte a asak hkrung lam gaw chyoi pra nna Karai Kasang hta sak nawng da ai asak hkrung lam rai ra nga ai.

¹²Nanhte gaw Karai Kasang a nhtoi hpe ala nga ai lam hta alawan du wa ru ga; kaja dik ai hku shakut sharang let ala nga mu. Dai nhtoi hta sumsing lamu ni gaw hkru mat nna hten za mat na mara ai; sumsing lamu na ahtoi hkum ni mung kahtet ai majaw byawng mat na mara ai.

¹³Rai ti mung anhte gaw, Karai Kasang ga sadi jaw da sai ding hpring ai ni nga na nta ngu ai sumsing lamu ningnan, ginding aga ningnan hpe anhte myit mada ala nga ga ai.

¹⁴Dai re majaw nye a manang ni e, nanhte dai nhtoi hpe la nga ai ten hta Karai Kasang a man e nanhte a myit masin san seng nna mara n kap u ga hte shi hta ngwi pyaw sim sa nga lu na matu atsam htum hkra shakut shaja nga mu.

¹⁵Anhte tsaw ra ai hpu nau Pawlu mung, Karai Kasang jaw ai hpaji byeng-ya hte nanhte hpang de ka dat sai hte maren anhte a Karai Kasang hkam sharang let la ding da nga ai lam gaw nanhte Hkye Hkrang la hkrum na matu ahkaw ahkang jaw ai lam she rai nga ai hpe mu chye nga mu.

¹⁶Pawlu gaw ndai lam hte seng nna shi ka ai laika ni hta ndai hte maren ka madun da nga ai. Shi a laika hta rawng ai ginlam nkau mi gaw chye na yak ai majaw, angawk angak re ai ni hte myit n gring ai masha ni gaw shut ai hku lachyum hpyan la ma ai, kaga chyum ga ni a lachyum hpe mung dai hte maren htai la shut ai majaw shanhte a hten bya ai lam hpe shanhte nan galaw la masai.

¹⁷Rai ti mung manang ni e, nanhte gaw ndai lam ni hpe chye nga chyalu rai nga manit dai. Dai re ai majaw nanhte gaw tara kata ai masha ni a shut ai lam de woi mat wa ai hta n lawm na hte, shim ai asak hkrung lam kaw na n hkrat sum mat na matu a maja nga mu.

¹⁸Nanhte gaw anhte a hkye hkrang la ai Madu Yesu Hkristu a chyeju hte shi hpe chye chyang ai lam hta matut nna galu kaba kunghpan sa wa myit ga; ya e mung, htani htana prat ding sa e mung, Yesu Hkristu kaw hpung shingkang anga nga u ga law.