Read Jinghpaw Common Language Bible 2009 1 YAWHAN 4 Bible Online

1 YAWHAN 4 - Jinghpaw Common Language Bible 2009 bible

1 YAWHAN 4

¹Tsaw ra ai ni e, Wenyi hkam la lu ga ai nga nna tsun ai ni yawng hpe hkum kam nga myit; shanhte hkam la ai ngu ai wenyi gaw Karai Kasang kaw na yu wa ai wenyi rai nga ai kun? jep yu mu; hpa majaw nga yang, masu ai myihtoi ni law law wa shara shagu hkan du taw nga masai.

²Karai Kasang a Wenyi rai n rai chye lu na lam da ndai rai nga ai. Yesu Hkristu gaw shinggyim hkum shan dagraw nna du sa ai, nga nna yin la ai ni kadai mung Karai Kasang kaw na Wenyi hkam la lu ai ni rai ma ai.

³Rai ti mung, dai Yesu a lam n yin la ai kadai mung, Karai Kasang kaw na yu sa ai Wenyi hpe hkap la lu ai ni n rai ma ai. Shanhte hta rawng ai Wenyi chyawm gaw nanhte na yu manit dai hte maren, du magang ra ai, rai sa ya e pyi mungkan ga de sa nga ai Hkristu a hpyen wa a wenyi rai nga ai.

⁴Shu sha ni e, nanhte gaw Karai Kasang hte seng ai ni rai nga myit dai rai nna, dai myihtoi masu ni hpe dang kau manu ai. Hpa majaw nga yang, nanhte hta e rawng nga ai Wenyi gaw mungkan ga hte seng ai ni hta rawng nga ai wenyi hta grau n-gun atsam kaba nga ai.

⁵Dai myihtoi masu ni gaw mungkan hte seng ai ni rai nga ma ai majaw, shanhte gaw mungkan ga a lam ni tsun shaga ma ai. Mungkan ga na ni mung shanhte a ga hpe madat mara ma ai.

⁶Rai ti mung anhte gaw Karai Kasang a maga na ni rai nga ga ai: Karai Kasang hpe chye chyang ai ni kadai mung, anhte a ga hpe madat mara nga ma ai; Karai Kasang a maga na n re ai ni chyawm gaw, anhte a ga hpe madat mara ai n rai. Ndai hku nna anhte gaw teng man ai Wenyi hkam la ai hte shut ai wenyi hkam la ai ni a shai hkat ai lam hpe tsun lu ga ai.

⁷Tsaw ra ai ni e, anhte shada da tsaw ra nga ga; hpa majaw nga yang, tsaw ra ai myit gaw Karai Kasang kaw na rai nga ai. Tsaw ra chye ai wa kadai rai ti mung, Karai Kasang a kasha rai nna Karai Kasang hpe chye chyang nga ai.

⁸Tsaw ra ai myit n rawng ai wa gaw, Karai Kasang hpe chye chyang wu ai n rai, hpa majaw nga yang, Karai Kasang gaw tsaw ra ai myit rai nga ai.

⁹Anhte gaw Kasha a marang e htani htana asak lu la mu ga nga, Karai Kasang gaw shi a Kasha shingtai hpe mungkan ga de shangun dat wu ai hte Karai Kasang anhte hpe tsaw ra ai lam madun mani ai.

¹⁰Tsaw ra ai myit ngu nna tsun ai shaloi; anhte Karai Kasang hpe tsaw ra ai hpe ngu ai n rai, anhte a yubak mara ni hpe raw dat kau ya na matu gawng malai hkungga tai u ga, shi a Kasha hpe shangun dat ai hte tsaw ra mi ai hpe ngu ai rai nga ai.

¹¹Tsaw ra ai ni e, Karai Kasang gaw anhte hpe ndai hte wa tsaw ra mi ai rai yang gaw, anhte mung shada da mai tsaw ra nga ga ai.

¹²Karai Kasang hpe kadai mung galoi mung n mu yu ai rai ti mung anhte shada da tsaw ra nga ga yang gaw, Karai Kasang gaw anhte hte langai sha tai nna nga nga ai rai nna, shi a tsaw ra ai myit gaw anhte hta kup tsup wa lu na ra ai.

¹³Shi a Wenyi anhte hpe jaw da mi ai majaw, anhte shi hte langai sha tai nna nga nga ai lam hpe anhte hkrak chye ga ai.

¹⁴Mungkan ga a hkye hkrang la ai Madu tai u ga, Kawa gaw dai Kasha hpe shangun dat wu ai lam anhte mu lu sagaw ai hte sakse hkam ga ai.

¹⁵Yesu gaw Karai Kasang a Kasha rai nga ai nga nna marai langai ngai yin la ai rai yang, shi gaw Karai Kasang hte langai sha tai nna nga nga ai, Karai Kasang mung shi hte langai sha tai nna nga nga ai.

¹⁶Dai rai nna, anhte a ntsa e Karai Kasang a tsaw ra myit tawn da nga ai lam hpe anhte nan chye ga ai hte kam sham ga ai. Karai Kasang gaw tsaw ra ai myit rai nga ai; dai rai nna tsaw ra ai myit hta asak hkrung ai wa kadai rai ti mung, Karai Kasang hte langai sha tai nna nga nga ai, Karai Kasang mung shi hte langai sha tai nna nga nga ai.

¹⁷Anhte hta shi a tsaw ra ai myit kup tsup wa ai hte daw dan ai nhtoi hta e anhte gaw nden ja ai myit lu la na raga ai. Hpa majaw nga yang ndai mungkan hta anhte a asak hkrung ai lam gaw Hkristu a asak hkrung lam hte maren sha rai nga mali ai.

¹⁸Tsaw ra ai myit hta hkrit kang ai myit n rawng ai; kup tsup ai tsaw ra myit gaw hkrit kang ai myit hpe shaden kau wu ai. Dai rai yang gaw, hkrit kang ai myit rawng ai wa kadai hta mung tsaw ra ai myit n kup tsup lu ai, hpa majaw nga yang, hkrit kang ai myit gaw ari hkrum na lam hte seng nga ai.

¹⁹Karai Kasang gaw shawng nnan e anhte hpe tsaw ra mi ai majaw, anhte mung tsaw ra nga ga ai.

²⁰Marai langai ngai, ngai gaw Karai Kasang hpe tsaw ra nga nngai, nga nhtawm me, shi a kahpu kanau wa hpe n dawng n yawt nga a yang gaw, dai wa gaw masu ai wa rai nga ai. Hpa majaw nga yang, tinang mu lu ai kahpu kanau wa hpe n tsaw ra a yang gaw, tinang n mu lu ai Karai Kasang hpe tsaw ra lu na n rai.

²¹Anhte hpe Hkristu jaw ai hkang da ai ga gaw, “Karai Kasang hpe tsaw ra ai wa gaw, shi a kahpu kanau wa hpe mung tsaw ra lu na,” nga ai rai nga ai.