Read Jinghpaw Common Language Bible 2009 TARA AGYI 1 Bible Online

TARA AGYI 1 - Jinghpaw Common Language Bible 2009 bible

TARA AGYI 1

¹Yawshu si mat ai hpang Israela amyu masha ni gaw dai MADU hpe, “Anhte a amyu bawsang ni hta na kadai mahtang Hkanani masha ni hpe shawng sa gasat ang na ga ta?,” ngu nna san ma ai.

²Dai MADU gaw, “Yuda amyu bawsang shawng sa na rai nga ai. Ngai gaw shanhte hpe mungdan up hkang na ahkang jaw na mawe ai,” ngu nna htan wu ai.

³Yuda amyu masha ni mahtang Simun amyu masha ni hpe, “Anhte hpe masat ya ai lamu ga de anhte hte rau pru sa nna Hkanan masha ni hpe jawm gasat kau ga. Dai hpang nanhte hpe masat ya ai lamu ga de nanhte hte rau anhte pru sa na ga ai,” ngu nna tsun ma ai. Dai rai nna Simun a amyu bawsang ni hte

⁴Yuda amyu bawsang ni majan pa de rau rawt sa wa ma ai. Dai MADU gaw Hkanani hte Perizi masha ni hpe gasat dang kau na awng padang shanhte hpe jaw wu ai rai nna Bezek mare e masha mun mi hpe gasat kau ma ai.

⁵Shanhte gaw dai yang e Adonibezek hpe mu hkrup ma ai rai nna shi hpe gasat ma ai.

⁶Shi hprawng mat wa ai rai tim shi hpe hkan shachyut rim la nhtawm shi a lata yungnu hte lagaw yungnu kaba ni hpe kahtam di kau ya ma ai.

⁷Adonibezek gaw, “Lata yungnu hte lagaw yungnu kaba ni kahtam di kau hkrum ai hkawhkam sanit shi hte gaw nye a sha ku npu e shat ahkyep ahkap hta sha ma ai; ya chyawm gaw shanhte hpe ngai galaw ai zawn Karai Kasang ngai hpe bai tai nu ai,” ngu nna tsun wu ai. Shi gaw Yerusalem mare de woi la hkrum ai hte dai yang e si mat wu ai.

⁸Yuda amyu bawsang gaw Yerusalem mare hpe gasat nhtawm dai mare hpe dang la kau ma ai. Shanhte gaw dai mare masha ni hpe sat kau nna mare hpe wan nat kau ma ai.

⁹Dai zawn galaw ngut ai hpang, shanhte gaw bum ga hte layang ga hkan, dingda maga hkun hkraw ai lamu ga hkan nga nga ai Hkanani masha ni hpe matut gasat ma ai.

¹⁰Shanhte gaw Kiriat Arba ngu shamying ai Hebron mare hta nga ai Hkanani masha ni hpe sa gasat nhtawm, dai yang e nga ai Sheshai, Ahiman hte Talamai amyu lakung ni hpe gasat dang kau ma ai.

¹¹Yuda masha ni gaw dai shara kaw nna Debira mare hpe lung gasat ma ai; dai aten hta mare dai hpe Kiriat Sehpera ngu nna shamying da nga ai.

¹²Shanhte hta na Hkaleb mying ai wa mahtang, “Kiriat Sehpera mare gasat la lu ai wa hpe nye a shayi sha Aksa hpe ya sha na we ai,” ngu nna tsun wu ai.

¹³Hkaleb a kanau Kena a kasha Otniela gaw dai mare hpe gasat dang la wu ai rai nna, Hkaleb gaw shi a shayi sha Aksa hpe ya sha wu ai.

¹⁴Otniela gaw hkungran poi shani e numsha a kawa kaw yi hpyi na matu shi hpe shadut wu ai. Numsha gaw lawze kaw na yu nhtawm Hkaleb gaw shi hpa ra ai lam san wu ai.

¹⁵Dai numsha gaw, “Hka hpawk pru ai shara nkau mi ra nngai, nang ngai hpe jaw ai lamu ga mahtang hkun hkraw ai ga rai nga ai,” ngu nna htan wu ai. Dai rai nna Hkaleb gaw shi hpe lawu lahta hka hpawk ni jaw wu ai.

¹⁶Mawshe a katsa a matu mara rai nga ai Keni masha ni mung Yuda amyu matu ni hte rau Yerihko ngu ai Namhtan hpun mare kaw nna Arad shara a dingda maga na Yuda nam mali de sa nhtawm, dai yang e nga ai Amalek masha ni hte rau nga nga ma ai.

¹⁷Yuda masha ni gaw Simun a masha ni hte rau pru sa nhtawm Zehpat mare hta nga ai Hkanani masha ni hpe rau gasat dang kau ma ai. Dai mare hpe shanhte matsa nna jahten sharun kau nhtawm dai hpe Horma ngu nna shamying da nga ma ai.

¹⁸Dai MADU gaw Yuda masha ni hpe karum la wu ai, shanhte gaw bum ga hpe madu la lu ma ai. Rai ti mung shanhte gaw Gaza hte de a ginwang, Ashkelon hte de a ginwang hte Ekron hte de a ginwang ni hpe lu la ma ai n rai. Dai masha ni gaw panglai hkin-gau mayan hku nga ma ai, shanhte gaw hpri leng ni lu ma ai, dai rai nna Yuda masha ni gaw shanhte hpe n lu gawt shapraw kau lu ma ai.

²⁰Mawshe hkang da nu ai hte maren, Hkaleb hpe Hebron mare jaw ma ai rai nna dai mare na Anak amyu matu hta na ran yu wa ai lakung lama masum hpe shi gawt shapraw kau wu ai.

²¹Rai ti mung, Benyamin amyu bawsang ni chyawm gaw Yerusalem mare e nga ai Yebusi masha ni hpe gawt shapraw kau ma ai n rai; dai Yebusi masha ni mahtang dai ni du hkra Benyamin masha ni hte rau dai mare e anga nga ma ai.

²²Ehprim hte Manashe amyu bawsang ni mung dai prat e Luza ngu nna shamying ai Behtela mare hpe sa htim gasat ma ai rai nna dai MADU mung shanhte hpe karum la wu ai. Shanhte mung mare de kin-yu yu na shangun dat ma ai rai nna masha langai pru wa ai hpe mu ma yang,

²⁴dai wa hpe, “Mare kata de kaning rai shang lu na lam anhte hpe madun dan mi; shaloi nang hpe anhte n machyi shangun na ga ai,” ngu nna tsun ma ai.

²⁵Dai rai nna dai wa mung shanhte hpe madun dan wu ai rai nna, Ehprim hte Manashe amyu bawsang ni mahtang dai wa hte nta masha ni hta kaga, dai mare na masha shagu hte hpe sat kau ma ai.

²⁶Shi gaw hpang e Hiti mung de sa nna, dai yang e mare de nhtawm Luza ngu nna shamying wu ai; dai hpe dai ni du hkra shing nga nna naw mying nga ai.

²⁷Manashe amyu bawsang ni chyawm gaw Bet Shan hte ni nawn ai kahtawng ni, Tanak hte dai hte ni nawn ai kahtawng ni, Dora hte dai hte ni nawn ai kahtawng ni, Iblim hte dai hte ni nawn ai kahtawng ni, Megido hte dai hte ni nawn ai kahtawng ni hkan nga nga ai masha amyu ni hpe n gawt shapraw kau ma ai. Hkanan masha ni gaw dai yang hkan e matut nna nga nga ma ai.

²⁸Israela masha ni n-gun ja wa ai shaloi, shanhte a matu nga nna Hkanani masha ni hpe amu galaw shangun ma ai rai nna, shanhte yawng hpe ya du hkra atsai awai n gawt shapraw kau ma ai.

²⁹Ehprim amyu bawsang ni mung Gezera mare hta nga nga ai Hkanani masha ni hpe n gawt shapraw kau ma ai; Hkanani masha ni gaw dai mare hta shanhte hte rau matut nna nga nga ma ai.

³⁰Zebulun amyu bawsang mung Kitron hte Nahala mare ni hta nga nga ai masha amyu ni hpe n gawt shapraw kau ma ai; dai rai nna, shanhte gaw dai mare ni hta Hkanani masha ni hte rau matut nga nga let shanhte a matu amu bungli galaw shangun nga ma ai.

³¹Ashe amyu bawsang mung Ahko, Sidon, Alab, Akzib, Helaba, Ahpek, hte Rehob mare ni hkan nga nga ai masha amyu ni hpe n gawt shapraw kau ma ai.

³²Shanhte hpe n gawt shapraw kau ma ai rai nna, Ashe amyu bawsang ni hte bu ga madu Hkanani masha ni rau nga nga ma ai.

³³Naphtali amyu bawsang mung Bet Sheme hte Betanat mare ni hta nga nga ai masha amyu ni hpe n gawt shapraw kau ma ai. Naphtali masha ni mung buga hkan nga nga ai Hkanani masha ni hte rau nga nga ma ai; rai ti mung, shanhte a matu amu bungli galaw shangun nga ma ai.

³⁴Amori masha ni gaw Dan a masha ni hpe bum ga de nga nga shangun nna pa ga de n yu wa shangun ma ai.

³⁵Amori masha ni chyawm gaw Here bum, Aiyalon, hte Shalabim mare hkan e matut nna nga nga ma ti mung, Ehprim hte Manashe amyu bawsang ni mahtang shanhte a npu hta tawn da nna shanhte a matu amu bungli galaw shangun da ma ai.

³⁶Edom masha ni a lamu ga jarit gaw Akrabim uhkan kaw nna Sela mare a dingdung daw hku rai nga ai.