Read Jinghpaw Common Language Bible 2009 TARA AGYI 10 Bible Online

TARA AGYI 10 - Jinghpaw Common Language Bible 2009 bible

TARA AGYI 10

¹Abimelek si mat ai hpang, Dodo a kashu, Pua a kasha Tola gaw Israela hpe shalawt dat na matu du sa wa wu ai. Shi gaw Yisahka amyu bawsang hta na rai nhtawm Ehprim a bum ga na Shamira shara e nga nga wu ai.

²Shi gaw hkun masum ning tup Israela amyu a ningbaw tai ya wu ai. Dai hpang shi si mat ai hte Shamira mare e lup makoi da ma ai.

³Tola a hpang, Yaira gaw Gilead mung e paw pru wa ai. Shi gaw Israela hpe hkun lahkawng ning tup lam woi wa nu ai.

⁴Shi gaw shadang sha sumshi lu ai rai nna, dai ni lawze sumshi jawn ma ai. Gilead mung hta mare sumshi lu ma ai majaw dai ni du hkra Yaira a kahtawng ni ngu nna shamying da nga ma ai.

⁵Yaira si mat nna shi hpe Kamon shara e lup makoi da ma ai.

⁶Israela masha ni gaw Bala hpara hte Ashtarot hpara hpe mung, Suri hpara ni, Sidon hpara ni, Moba hpara ni, Amon hpara ni hte Hpilisti masha ni a hpara ni hpe nawku let dai MADU hpe lang mi bai yubak galaw shut kau manu ai. Shanhte gaw dai MADU hpe kau da nhtawm shi hpe nawku ai lam jahkring kau ma ai.

⁷Dai rai nna Israela masha ni hpe dai MADU masin pawt wu ai rai nna Hpilisti hte Amon ni a lata de shanhte hpe ap kau wu ai.

⁸Shanhte gaw Yawdan hka sinpraw hkran na Gilead mung Amori masha ni a lamu ga hta wa nga ai Israela masha ni yawng hpe shi matsat ning tup dip gamyet sha let zingri zingrat di da ma ai.

⁹Amon masha ni gaw Yawdan hka rap nna Yuda, Benyamin hte Ehprim amyu bawsang ni hpe hkap gasat ma ai rai nna Israela masha ni tsin-yam tsindam kaba hkrum kau ma ai.

¹⁰Dai hpang Israela masha ni gaw dai MADU hpe, “Anhte a Karai Kasang hpe kau da nna Bala hpara ni hpe nawku kau saga ai majaw nang hpe yubak galaw shut kau saga ai,” ngu nna jahtau tsun ma ai.

¹¹Dai MADU chyawm gaw shanhte hpe ning ngu nna mahtai jaw ma ai: “Lai sai aten ni hta Egutu masha ni, Amori masha ni, Amon masha ni, Hpilisti masha ni,

¹²Sidon masha ni, Amalek masha ni hte Mao masha ni nanhte hpe dip gamyet sha lai wa manit dai majaw, nanhte ngai kaw hpyi jahtau yu manit dai. Shing re ai aten hta shanhte a lata kaw na ngai nanhte hpe n hkye hkrang la yu nga a ni?

¹³Rai ti mung nanhte ngai hpe kau da nna kaga hpara ni hpe nawku myit dai majaw ngai nanhte hpe bai hkye mawai la na made ai n rai.

¹⁴Nanhte lata la manit dai hpara ni hpe sa jahtau masu. Ya nanhte ru yak tsin-yam tsindam hkrum hkra nga ai aten hta nanhte hpe shanhte hkye mawai la myit ga.”

¹⁵Rai ti mung Israela amyu masha ni mahtang dai MADU hpe, “Anhte yubak galaw shut kau saga ai; nang ra ai hku anhte hpe galaw mi; rai ti mung ya e pyi chyeju hte anhte hpe hkye hkrang la mi,” ngu nna tsun ma ai.

¹⁶Dai rai nna maigan hpara ni hpe shanhte kau tawn da nhtawm dai MADU hpe nawku ma ai; shi gaw Israela masha ni hkrum sha ai tsin-yam tsindam hpe masin yu machyi da wu ai.

¹⁷Dai hpang Amon hpyen luksuk gaw majan a matu ra ai amu ni hpe shajin shachyip da nhtawm Gilead mung e dap jung nga ma ai. Israela masha ni mung sa hpawng nna Gilead mung Mizpa e dap jung da ma ai.

¹⁸Dai yang e, Israela amyu masha ni hte amyu bawsang ni a ningbaw ni gaw langai hte langai hpe, “Amon masha ni hpe kadai wa woi awn nna htim gasat mayu myit ta? Gilead mung na masha nlang ni a ningbaw kadai tai na rai nga a ta?,” ngu nna san hkat ma ai.