Read Jinghpaw Common Language Bible 2009 TARA AGYI 11 Bible Online

TARA AGYI 11 - Jinghpaw Common Language Bible 2009 bible

TARA AGYI 11

¹Gilead mung na Yephta mying ai share shagan hpyenla langai mi gaw shawa num a kasha rai nga ai. Shi a kawa Gilead a madu jan hta kaga shadang sha ni mung lu wu ai rai nna,

²dai ni kaba wa jang Yephta hpe nta kaw na pru mat wa na matu jawm shadut ma ai. Shanhte gaw shi hpe, “Nang gaw liknga kasha rai nga ndai majaw anhte a kawa kaw na sali wunli hpa mung hkam la lu na ndai n rai,” ngu nna tsun ma ai.

³Yephta gaw shi a kahpu kanau ni kaw na hprawng mat wa nhtawm Toba mung e sa nga nga wu ai. Dai yang na pagawn para rai nga hkawm ai masha hpung mi hpe shi yu sharawng wu ai rai nna shanhte mung shi hte rau brak hkawm nga ma ai.

⁴Aten ram ram na mat ai hpang, Amon masha ni gaw Israela masha ni hpe sa gasat ma ai.

⁵Dai majan byin ai shaloi, Gilead mung na ningbaw ni mahtang Toba mung na Yephta hpe bai sa woi la ma ai.

⁶Shanhte gaw, “Amon masha ni hpe sa gasat lu myit ga, anhte hpe woi awn la mi,” ngu nna tsun ma ai.

⁷Rai ti mung Yephta mahtang, “Nanhte ngai hpe n kam yu mat hkra n dawng n yawt myit dai hte nye wa nta kaw na pru mat wa na matu mung, ngai hpe shadut kau yu manit dai. Ya yak hkak jam jau hkrum jang she nanhte hpa majaw ngai kaw sa wa myit ni?,” ngu nna hkap htan wu ai.

⁸Shanhte gaw Yephta hpe, “Gilead mung masha ni yawng hpe woi awn let Amon masha ni hpe anhte hte rau pru sa nna htim gasat na matu nang hpe anhte ra ga ai majaw nang kaw ya anhte kayin sa wa ga ai,” ngu nna tsun ma ai.

⁹Yephta gaw shanhte hpe, “Amon masha ni hpe gasat shamyit kau na matu nanhte ngai hpe dum nta de woi wa myit dai hte maren, dai MADU ngai hpe awng padang jaw ya ai rai yang nanhte a du ngai tai na we ai,” ngu nna tsun wu ai.

¹⁰Shanhte mung, “Dai MADU gaw anhte a sakse tai nga u ga, anhte myit hkrum ya na ga ai,” ngu nna bai htan ma ai.

¹¹Yephta mung Gilead ningbaw ni hte rau wa wu ai; mung masha ni mung shi hpe shanhte a du hte ningbaw tai shangun ma ai. Yephta mung shi a lam nlang Mizpa shara, dai MADU a man e tsun dan wu ai.

¹²Yephta gaw Amon hkawhkam hpang de kasa ni hpe shangun dat nhtawm, “Anhte hte hpa ra rawng nga a ta? Hpa majaw nang nye a mungdan hpe gasat la mayu n ta?,” ngu nna san wu ai.

¹³Amon hkawhkam gaw Yephta a kasa ni hpe, “Israela masha ni Egutu mung na pru wa ai shaloi, nye a lamu ga ngu na Arnon hka kaw nna Yabok hka hte Yawdan hka du hkra shanhte la kau ya mi ai. Ya chyawm gaw dai hpe angwi apyaw hte bai nhtang jaw ya mi,” ngu nna htan wu ai.

¹⁴Yephta gaw Amon hkawhkam hpang de kasa ni hpe bai shangun dat nhtawm,

¹⁵ning ngu mahtai jaw dat wu ai: “Moba lamu ga hpe mung, Amon lamu ga hpe mung, Israela ni kashun la ma ai, nga ai ga gaw n teng nga ai.

¹⁶Dai zawn byin ai lam gaw ndai hku rai nga ai: Israela amyu masha ni Egutu mung na pru wa ma ai shaloi, shanhte gaw Nawng Hkyeng du hkra nam mali hku ga lai wa nna Kadesha de du wa ma ai.

¹⁷Dai hpang Edom hkawhkam hpang de shanhte kasa shangun dat nhtawm shi a mungdan hku ga lai wa na ahkang hpyi ma ai. Rai ti mung Edom hkawhkam gaw shanhte hpe ahkang jaw ai n rai; dai zawn Moba hkawhkam hpang de mung ahkang hpyi yu mu yang, shi a mungdan hku ga lai wa na ahkang shanhte hpe n jaw ma ai; dai rai nna Israela masha ni Kadesha mare e nga nga ma ai.

¹⁸Dai hpang shanhte gaw nam mali hku ga sa wa let Moba mung a sinpraw maga, Arnon hka wora hkran de du hkra Edom hte Moba mung ni hpe gawai let hkawm sa wa ma ai. Dai yang hkan shanhte dap jung ma ai; rai ti mung dai shara gaw Moba a lamu ga jarit rai nga ai majaw Arnon hka hpe n rap ma ai.

¹⁹Shaloi, Israela masha ni gaw Heshbon mare e hkaw dung ai Sihon hpang de kasa ni hpe shangun dat nhtawm shi a mungdan hku ga lai wa na ahkang shi kaw hpyi wu ai.

²⁰Rai ti mung Sihon mahtang Israela hpe n kam wu ai majaw shi a hpyen luksuk hpe woi nhtawm Yahaza e dap jung let Israela hpe hkap gasat wu ai.

²¹Rai ti mung, dai MADU Israela a Karai Kasang gaw Sihon hte shi a hpyen luksuk hpe dang kau na awng padang Israela ni hpe jaw wu ai rai nna Amori masha ni nga ai lamu ga yawng hpe Israela masha ni madu la kau ya ma ai.

²²Shanhte gaw Amori mung ting ngu na dingda maga Arnon hka kaw nna dingdung maga Yabok hka du hkra, sinpraw maga nam mali kaw nna sinna maga Yawdan hka du hkra madu la ma ai.

²³Dai re ai majaw dai MADU Israela a Karai Kasang gaw Israela amyu masha ni a matu nga nna Amori masha ni hpe gawt shapraw kau ai she rai nga ai.

²⁴Ya dai hpe nang bai madu la na shakut mayu nga n ni? Na a hpara Hkemosha nang hpe jaw ai made nang madu la lu na ndai; rai ti mung dai MADU anhte a Karai Kasang anhte hpe jaw mi ai hte maren, anhte gaw lam magup hpe madu la na rai ga ai.

²⁵Nang gaw Moba Hkawhkam Zipora a kasha Balak hta grau kaja nga ai ngu myit nawn da wu ni? Shi gaw Israela hpe galoi mung grang dakat yu a ni? Shi gaw anhte hpe majan baw yu nu ni?

²⁶Israela masha ni Heshbon mare hte Aroera mare ni hte de a grup yin na kahtawng ni hte Arnon hka kau dingyang na mare ni hpe masum tsa ning tup madu la nga ai laman hte ting hta, dai ni hpe nanhte hpa majaw bai n up la nga myit ni?

²⁷Ngai gaw nang hpe hpa mung n galaw shut kau nngai; nang chyawm gaw ngai hpe majan baw nna shut kau nit dai. Dai MADU gaw tara agyi rai nga ai majaw Israela hte Amon masha ni a lapran e, dai ni shi daw dan ya na ra ai,” ngu nna tsun wu ai.

²⁸Rai ti mung Amon hkawhkam chyawm gaw Yephta kaw na lu la ai shiga hpe hpa zawn n nawn ya wu ai.

²⁹Shaloi dai MADU a wenyi gaw Yephta a ntsa e du nna Gilead hte Manashe mung hku ga lai mat wa nhtawm Gilead mung na Mizpa mare de nhtang wa let Amon mung de sa wa wu ai.

³⁰Yephta gaw dai MADU hpe, “Amon masha ni hpe gasat dang lu ai awng padang nang ngai hpe jaw ai rai yang,

³¹awng padang hte majan pa kaw nna ngai nhtang wa ai shaloi, ngai hpe shawng hkap tau la na matu nta kaw na pru sa wa ai wa hpe wan nat hkungga shatai nna nawng jau na we ai. Dai wa hpe shagu hkungga zawn ngai nang hpe nawng ya na de ai,” ngu nna ga sadi tawn da wu ai.

³²Dai rai nna Yephta mung Amon masha ni hpe gasat na matu hka rap sa wa wu ai. MADU mung shi hpe awng padang jaw ya wu ai.

³³Shi gaw Aroera mare kaw nna Minit mare grup yin na mare hkun ting hte Abela Keramim du hkra gasat kau wu ai. Dai hkan e Amon masha ni asi asat sat kau ai hkrum nna Israela ni a man e sum mat ma ai.

³⁴Yephta gaw shi a dum nta nga ai Mizpa mare de nhtang wa wu yang, dai yang e shi a shayi sha shup sheng dum let ka manawt nhtawm shi hpe hkap tau la na nga, pru sa wa nga ai. Dai numsha gaw shayi sha shingtai rai nga ai.

³⁵Yephta gaw shi hpe mu jang yawn let shi a hpun palawng ni hpe gang je kau nhtawm, “O nye a kasha e! Nang gaw nye a myit masin hpe shadaw ya nga ndai! Na a majaw ngai hpe hpa majaw nchyi nmu shabyin dat n ta? Dai MADU hpe ngai ga sadi shaka kau se ai; dai hpe ngai bai shaw la lu na n rai ni ai!,” ngu nna tsun wu ai.

³⁶Shayi sha gaw shi hpe, “Dai MADU hpe nang ga sadi tawn da nit dai rai yang mung na a gumlau hpyen ni rai nga ai Amon masha ni hpe dai MADU nang hpe matai htang shangun nit dai majaw, nang ga sadi tsun da nit dai hte maren ngai hta galaw e,” ngu nna tsun wu ai.

³⁷Rai ti mung shayi sha mahtang kawa hpe, “Nye a matu ndai lam langai mi galaw ya e. Ngai gaw galoi mung dinghku n de lu na ni ai majaw nye a manang jan ni hte rau bum ga de lung wa nna hkrap ngu hkrap ngoi lu hkra ngai hpe chyu sha shata lahkawng dat dat e,” ngu nna hpyi wu ai.

³⁸Shi gaw shayi sha hpe shata lahkawng ndat da nna pru sa na matu tsun wu ai. Shaloi shi hte shi a manang ni bum ga de lung wa nhtawm num n wa na sai rai nga ai majaw hkrap ngu hkrap ngoi nga wu ai.

³⁹Shata lahkawng lai jang, shi gaw shi a kawa hpang de bai nhtang wa wu ai. Shi mung dai MADU hta ga sadi tawn da nu ai hte maren galaw wu ai. Shi gaw hkawn jet naw rai nga ai. Dai kaw nna ndai amu gaw Gilead masha Yephta a shayi sha a majaw numsha ni gaw shaning shagu mali ya ya sharung shayawt ai htung Israela amyu hta nga wa sai.