Read Jinghpaw Common Language Bible 2009 TARA AGYI 13 Bible Online

TARA AGYI 13 - Jinghpaw Common Language Bible 2009 bible

TARA AGYI 13

¹Israela masha ni dai MADU hpe bai shut hpyit kau ma ai rai nna, shi gaw Hpilisti masha ni hpe shaning mali shi ning tup up hkang shangun wu ai.

²Dai aten hta Zoara mare na Mano mying ai wa langai mi nga nga ai. Shi gaw Dan a amyu bawsang hta na masha rai nga ai. Shi a madu jan gaw kashu kasha galoi mung n shaprat yu nga ai.

³Dai MADU a lamu kasa gaw shi kaw dan pru nna, “Nang gaw kashu kasha galoi mung n lu yu nga ti mung, kade n na yang, na-um nasin rai nna shadang sha shangai na rin dai.

⁴Sabyi ntsin hpe mung, chyaru hpe mung n lu ai sha sadi nga u; hkum da ai lusha hpa hpe mung hkum sha et;

⁵na a shadang sha shangai ai hpang, shi a kara hpe nang galoi mung rep ya lu na n rai; hpa majaw nga yang, shi shangai wa ai shani kaw nna Nazari [2] langai zawn Karai Kasang hta ap nawng da hkrum nga nu ai. Shi gaw Israela hpe Hpilisti masha ni a lata kaw na hkye mawai la ai amu galaw hpang na ra ai.

⁶Dai hpang numsha gaw shi a madu wa hpang de sa nhtawm, “Karai Kasang a masha langai mi ngai kaw sa nna hkrit hkungga mai ai Karai Kasang a lamu kasa hpe zawn shi mada yu wu ai. Shi kanang na sa wa ai hpe mung ngai n san yu we ai; shi mung shi a mying ngai hpe n tsun dan nga ai.

⁷Rai ti mung ngai na-um nasin rai nna shadang sha shangai wa na lam hpe chyawm gaw shi ngai hpe tsun wu ai. Shi gaw sabyi ntsin hpe mung, chyaru hpa hpe mung n lu ai sha, hkum da ai lusha hpa hpe mung n sha na lam, ngai hpe tsun wu ai; hpa majaw nga yang, shi hkrung nga dingsa Nazari langai zawn Karai Kasang hta ap nawng da hkrum na rai nga wu ai,” ngu nna tsun dan wu ai.

⁸Dai hpang Mano gaw dai MADU hpang de, “MADU e, chyeju hte dai Karai Kasang a masha wa hpe an hpang de bai nhtang sa shangun nhtawm shi shangai wa jang dai ma hpe an kaning rai galaw na lam tsun dan mi,” ngu nna hpyi nem wu ai.

⁹Karai Kasang mung Mano san ai hte maren galaw wu ai rai nna dai numsha yi e dung nga yang, shi a lamu kasa gaw shi kaw bai nhtang sa wa wu ai. Shi a madu wa Mano chyawm gaw shi hte rau n nga nga ai;

¹⁰dai rai nna, shi gaw shi a madu wa hpang de alawan gat sa wa nhtawm, “Yu u! Ma ni ngai kaw sa yu sai dai masha wa nan ngai kaw bai dan pru ra ai,” ngu nna tsun dan wu ai.

¹¹Mano gaw rawt nna shi a madu jan kaw hkan nang wu ai. Shi gaw dai wa hpang de sa nhtawm, “Nye a madu jan kaw ga sa shaga ai wa gaw nang rai nga n ni?,” ngu nna san wu ai. Shi mung, “Rai nga nngai,” ngu nna htan wu ai.

¹²Dai hpang Mano gaw, “Na a ga teng wa lit dai shaloi, dai shadang sha hpa galaw na rai ta? Shi gaw kaning re ai asak hkrun lam hpe lam woi awn ang na rai ta?,” ngu nna san wu ai.

¹³Dai MADU a lamu kasa gaw, “Ngai shi hpe tsun sai lam magup hpe na a madu jan teng teng galaw na rai wu ai.

¹⁴Sabyi hta na pru ai hpa hpe mung shi sha lu na n rai; sabyi ntsin hte chyaru hpe shi lu lu na n rai; hkum da ai lusha hpe mung sha lu na n rai. Ngai shi hpe tsun sai lam magup hpe sha shi galaw lu na rai wu ai,” ngu nna htan wu ai.

¹⁵Dai MADU a lamu kasa rai nga ai hpe n chye wu ai majaw Mano gaw shi hpe, “Chyeju hte garai hkum pru mat wa et, na a matu bainam kasha langai mi hpe an sat shadu ya lu n-ga,” ngu nna shi hpe tsun wu ai. Rai ti mung lamu kasa mahtang, “Ngai hkring nga ai rai tim na a malu masha hpe ngai sha na nngai n rai. Rai ti mung dai hpe hkyen lajang ya mayu ai rai yang gaw dai MADU hpe hkungga hku nna nat na rai ndai,” ngu nna tsun wu ai.

¹⁷Mano gaw, “Nang tsun ai ga ni teng tup dik wa jang, nang hpe an shagrau sha-a lu u ga, na a mying an hpe tsun dan mi,” ngu nna tsun htang wu ai.

¹⁸Dai lamu kasa gaw, “Nan hpa majaw nye a mying chye mayu nga myit ni? Dai gaw mauhpa amying rai nga ai,” ngu nna tsun wu ai.

¹⁹Dai rai nna bainam kasha langai hte nsi naisi loi mi hpe Mano la nhtawm mauhpa amu galaw ai dai MADU hpe lunghkrung hkungri ntsa e nawng ya wu ai.

²⁰Tawn hkungri kaw na wan numli dingchyung lung wa ai shaloi, dai MADU a lamu kasa gaw wan numli ni hta sumsing lamu de lung mat wa ai hpe Mano hte shi a madu jan yan mu dat ma ai. Mano mahtang dai masha gaw dai MADU a lamu kasa rai nga ai hpe myit dum wa wu ai rai nna shi hte shi a madu jan ga de gum dagup mat ma ai. Dai hpang shan mung dai lamu kasa hpe galoi mung bai n mu mat ma ai.

²²Mano gaw shi a madu jan hpe, “An gaw Karai Kasang hpe mu kau saga ai majaw teng teng si mat na saga ai!,” ngu nna tsun wu ai.

²³Rai ti mung shi a madu jan mahtang, “Dai MADU an hpe sat kau mayu ai rai yang, an a hkungga ni hpe shi hkap la na n rai; ndai zawn re ai amu yawng shi an hpe madun dan na n rai; dai zawn re ai amu ya an hpe tsun dan na wu ai n rai,” ngu nna htan wu ai.

²⁴Dai numsha mung shadang sha shangai ai rai nna, shi hpe Samson ngu nna shamying wu ai. Dai ma mung kaba wa ai hte dai MADU shi hpe shaman ya wu ai.

²⁵Zoara hte Eshtola na Dan amyu dap hta shi nga nga yang, dai MADU a daru magam n-gun shi hpe jaw hpang wu ai.