Read Jinghpaw Common Language Bible 2009 TARA AGYI 15 Bible Online

TARA AGYI 15 - Jinghpaw Common Language Bible 2009 bible

TARA AGYI 15

¹Ya aten ram ram na mat ai hpang, Samson gaw dai hkaulan mam shu la ai aten laman bainam kasha langai mi dun let shi a madu jan hpang de sa chyai na matu sa wa wu ai. Shi gaw dai numsha a kawa hpe, “Nye a madu jan a gawk de ngai shang mayu nngai,” ngu nna tsun wu ai. Rai ti mung shi gaw shi hpe n shang shangun wu ai.

²Shi gaw Samson hpe, “Nang gaw shi hpe n dawng nga nit dai, ngu ngai teng teng myit nawn kau we ai majaw na a manang wa hpe ngai ya sha kau se ai. Rai ti mung shi a kanau jan mahtang shi hta grau tsawm nga ai rai nna shi a malai nang shi hpe la lu nga ndai,” ngu nna tsun wu ai.

³Samson gaw, “Hpilisti masha ni hpe ndai lang mi ngai galaw ai amu a majaw ngai hta lit lu na n rai!,” ngu nna tsun wu ai.

⁴Dai rai nna chyahkyawn masum tsa hpe shi sa rim la wu ai. Dai ni a nmai ni hpe lahkawng yep yep di shajup nhtawm makyit ai shara hta wan shingnan hpe tsat bang da wu ai.

⁵Dai hpang wan shingnan ni hta wan shachyi dat nhtawm Hpilisti masha ni a hkaulan yi ni de dat shaprang dat wu ai. Ndai hku nna dan da sai hkaulan sha n-ga, yi hkan naw nga ai hkaulan hte tsanlun si ni yawng hpe mung nat kau wu ai.

⁶Hpilisti masha ni gaw ndai amu hpe kadai wa galaw kau nu ai hpe san ma ai shaloi, Timna mare na katsa wa gaw Samson a madu jan hpe Samson a manang wa a lata de jaw ya wu ai majaw Samson gaw ndai amu hpe galaw kau nga nu ai hpe shanhte chye ma ai. Shaloi Hpilisti masha ni sa nna dai numsha hpe mung, kawa a nta hpe mung nat kau ya ma ai.

⁷Samson gaw shanhte hpe, “Nanhte dai hku galaw myit hka i! Dai hku rai yang, nanhte hpe ngai matai htang lu ai aten du hkra ngai tawn da na mawe ai n rai ngu nna dagam se ai,” ngu nna tsun wu ai.

⁸Shi gaw shanhte hpe mazut ai hku htim gasat ai hte shanhte hta na law law hte hpe sat kau wu ai. Dai hpang Etam e nga ai n-gam na lungpu kata hta shi sa nga nga wu ai.

⁹Hpilisti masha ni sa nna Yuda mung e dap jung nhtawm Lehi mare hpe gasat ma ai.

¹⁰Yuda masha ni gaw shanhte hpe, “Nanhte hpa majaw anhte hpe gasat nga myit ni?,” ngu nna san ma ai. Shanhte mahtang, “Samson shi anhte hpe di mi ai zawn shi hpe di na matu hte Samson hpe bawng masha hku woi la na anhte du sa ga ai,” ngu nna htan ma ai.

¹¹Dai rai nna Yuda lasha hkying masum hte gaw Etam e nga ai n-gam na lungpu de sa wa nhtawm Samson hpe, “Hpilisti masha ni gaw anhte hpe up hkang ai ni rai nga ma ai hpe nang n chye n ni? Anhte hta hpa rai ning di nang galaw kau nu ta?,” ngu nna tsun ma ai. Shi gaw, “Shanhte ngai hpe galaw mi ai zawn sha ngai shanhte hpe galaw nngai,” ngu nna htan wu ai.

¹²Shanhte gaw, “Shanhte a lata de nanhte hpe ap ya lu hkra ngu, nang hpe gyit la na matu, ndai yang e anhte du sa raga ai,” ngu nna tsun ma ai. Samson mahtang, “Nanhte nan ngai hpe n sat kau na ga ai, ngu ai ga ngai hpe jaw mi,” ngu nna tsun wu ai.

¹³Shanhte mung, “Mai sa, nang hpe chyu sha anhte gyit nna, shanhte a lata de ap ya na ga ai. Anhte nang hpe sat na ga ai n rai,” ngu nna tsun ma ai. Shanhte gaw sumri nnan lahkawng hte shi hpe gyit nhtawm dai lungbra n-gam kaw na woi wa ma ai.

¹⁴Shi gaw Lehi mare de du ai shaloi, Hpilisti masha ni shi hpang de kagat sa wa nhtawm shi hpe jahtau ma ai. Dai MADU a daru magam n-gun gaw shi hpe akajawng sha n-gun shaja ya ai rai nna saman ri hkru mat ai zawn shi a lata lahpum ni hpe gyit gumbat da ai sumri ni hpe shadi kau wu ai.

¹⁵Dai hpang mi sha si mat sai lawze langai a shakap nra hpe shi mu hkrup wu ai. Shi gaw dai hpe gum let hta la nhtawm masha hkying mi hpe dai hte sat kau wu ai.

¹⁶Dai rai nna Samson mahkawn hkawn wu ai: “Lawze langai a shakap nra hte masha hkying mi hpe sat kau ni ai; Lawze langai a shakap nra hte ngai shanhte hpe sumpum kawng da mase ai.”

¹⁷Dai hpang shi gaw shakap nra hpe kabai kau wu ai. Shing rai byin lai wa sai dai shara hpe Ramat Lehi ngu nna shamying wu ai.

¹⁸Dai hpang Samson gaw grai hpang gara ai rai nna dai MADU hpe shi shaga nhtawm, “Nang gaw ndai awng padang kaba ngai hpe jaw nit dai; Ya ngai gaw hpang gara ai hte si wa nna ndai tara maigan masha Hpilisti masha ni a lata hta rim hkrum na rai ni?,” ngu nna tsun wu ai.

¹⁹Dai hpang Karai Kasang gaw Lehi shara dai yang na lamu ga hta nhkun langai hpaw ya nhtawm dai kaw na hka pru nga ai. Samson mung dai ntsin lu nna nsa awai la lu ai hte n-gun ja hpang wa wu ai. Dai re ai majaw hka hpawk dai hpe Hakore ngu nna shamying da ma ai. Dai gaw Lehi mare hta naw nga nga ai.

²⁰Hpilisti masha ni dai mung hpe up nga yang, Samson mung Israela hpe hkun ning tup woi awn nga ai.