Read Jinghpaw Common Language Bible 2009 TARA AGYI 17 Bible Online

TARA AGYI 17 - Jinghpaw Common Language Bible 2009 bible

TARA AGYI 17

¹Lang mi, Ehprim bum ga e Mihka mying ai masha langai mi nga ai.

²Shi gaw shi a kanu hpe, “Marai langai ngai nang kaw na gumhpraw hkying mi latsa lagu la kau ya ai shaloi, dai lagut wa hpe nang matsa kau nga ndai. Nang dai hku galaw ai hpe ngai na nngai. Yu u, dai gumhpraw ngai lu nngai. Dai hpe la ai wa gaw ngai rai nga nngai,” ngu nna tsun wu ai. Shaloi shi a kanu gaw, “Ngai sha e, dai MADU gaw nang hpe shaman ya u ga law!,” ngu nna tsun wu ai.

³Shi chyawm gaw kanu hpe gumhpraw bai nhtang jaw nhtawm, “Nye a kasha ntsa e hkrat wa ai matsa ga jahkring kau na matu gumhpraw dai hpe ngai nan dai MADU kaw dagam let ap nawng da se ai. Gumhpraw hte sup ai hpun hpara sumla langai galaw ai hta dai hpe lang na rai nga ai. Dai rai nna ya ngai nang hpe dai gumhpraw bai nhtang jaw na de ai,” ngu nna tsun wu ai.

⁴Dai hpang shi gaw gumhpraw dai shi a kanu hpe bai ap ya wu ai. Kanu mung gumhpraw lahkawng tsa la nhtawm hpara sumla hpe hpun hte tawk nna gumhpraw hte jaw ai amu galaw ai janghkam wa hpe sa jaw wu ai. Dai gaw Mihka a nta e tawn da nga ai.

⁵Dai Mihka ngu ai wa mung shi hta nawku shara lu wu ai. Hpara sumla nkau mi hte hkinjawng palawng ni hpe shi galaw nhtawm, shi a kasha langai mi hpe shi a hkinjawng aya hta san tawn da wu ai.

⁶Dai aten hta Israela amyu hta hkawhkam n nga nga ai; kadai mung shi ra sharawng ai hku galaw ma ai.

⁷Dai aten e nan, Yuda mung Betlehem mare hta Lewi shabrang langai mi nga nga ai.

⁸Shi gaw nga na shara tam la na matu Betlehem mare kaw na pru sa wa wu ai. Shi hkawm sa wa wu yang, Ehprim bum ga na Mihka a nta de du wu ai.

⁹Mihka gaw shi hpe, “Nang gaw kanang na du sa wa n ni?,” ngu nna san wu ai. Shi chyawm gaw, “Ngai gaw Yuda mung Betlehem mare na Lewi masha rai nga nngai. Ngai gaw shingbyi shara langai tam hkawm nga nngai,” ngu nna htan wu ai.

¹⁰Mihka gaw, “Ngai kaw nga ga. Ngai hpe hpaji jaw ai wa hte nye a hkinjawng tai u, shaloi laning mi hta gumhpraw shi, hpun palawng hte lusha ngai nang hpe jaw na de ai,” ngu nna tsun wu ai.

¹¹Dai Lewi shabrang wa mung Mihka hte rau nga na myit hkrum ya wu ai rai nna shi a kasha langai mi zawn tai wa nu ai.

¹²Mihka gaw shi a hkinjawng zawn shi hpe san da nu ai rai nna Mihka a nta hta shi nga nga wu ai.

¹³Mihka gaw, “Ya chyawm gaw nye a hkinjawng tai ya ai Lewi masha langai mi lu nga nngai rai nna dai MADU ngai hpe ngamu ngamai shangun na gaw, ngai chye nngai,” ngu nna tsun wu ai.