Read Jinghpaw Common Language Bible 2009 TARA AGYI 18 Bible Online

TARA AGYI 18 - Jinghpaw Common Language Bible 2009 bible

TARA AGYI 18

¹Dai aten hta, Israela amyu hta hkawhkam kadai mung n nga nga ai. Dai aprat e, Dan amyu bawsang mahtang Israela amyu bawsang ni hta shanhte lu la ang ai sali ga garai n lu la ma ai majaw dai hpe madu la lu na matu hkan tam ma ai.

²Dai re ai majaw, Dan a masha ni gaw amyu bawsang hta rawng ai dinghku masha ni yawng hta na magrau grang ai masha manga hpe lata la nhtawm dai mung ga hpe sa yu maram na matu matsun maroi ga hte hpawn Zoara hte Eshtaola mare kaw nna shanhte hpe shangun dat ma ai. Ehprim bum ga de shanhte du shang wa ma ai shaloi Mihka a nta e manam nga ma ai.

³Dai yang e shanhte nga nga ma yang, Lewi shabrang wa a nsen hpe shanhte chye matsing ma ai rai nna shi kaw sit lung wa nhtawm, “Ndai yang e nang hpa sa galaw nga n ta? Nang hpe ndai shara de kadai woi sa a ta?,” ngu nna san ma ai.

⁴Shi gaw, “Shi a hkinjawng tai let daw jau amu galaw na matu Mihka hte ngai jahkrum da ai lam nga nngai,” ngu nna htan wu ai.

⁵Shanhte gaw shi hpe, “Anhte hkawm sa ai hkrun lam awng dang, n awng dang na, chyeju hte Karai Kasang kaw san ya mi,” ngu nna tsun ma ai.

⁶Dai hkinjawng wa gaw, “Dai lam nanhte hpa mung myit n ru ra myit dai. Dai MADU gaw ndai hkrun lam hta nanhte hpe bau sin lanu lahku ya nga ai,” ngu nna htan wu ai.

⁷Dai marai manga hte gaw pru mat wa nhtawm Laisha mare de sa wa ma ai. Dai yang e nga ai masha ni gaw Sidon masha ni zawn kade sha shim ai hte nga nga ma ai hpe shanhte sa mu ma ai. Shanhte gaw kadai hte mung ga li ga law, ndang kalang n nga ai sha, ngwi pyaw sim sa ai hte nga nga ai masha ni rai nga ma ai; shanhte hta ra kadawn ai lam hpa mung n nga ma ai. Shanhte gaw Sidon masha ni hte tsan gang ai shara hta nga nga ma ai rai nna kaga masha kadai hte mung makyit mahkai ai lam n nga ma ai.

⁸Masha marai manga hte Zoara hte Eshtaola mare de bai nhtang wa ma yang, shanhte kaning rai hkan tam maram yu manu ai lam hpe hkap san ma ai.

⁹Shanhte gaw, “Sa marit, Laisha mare hpe anhte htim gasat ga. Anhte yu da ai lamu ga dai gaw grai kaja nga ai. Ndai yang e hpa amu mung n galaw ai sha hkum nga nga masa; tin tin rai nga mu! Dai mung de shang nna madu la saga!

¹⁰Nanhte dai de du myit dai shaloi, arai lama mi hpe pyi n tsen ai myit n rawng ai masha ni hpe nanhte sa mu na rai myit dai; dai mung gaw kaba ai mung rai nga ai; masha langai mi shi ra ai lam magup hpe lu la mai ai ga rai nga ai. Karai Kasang gaw dai lamu ga nanhte hpe jaw ya manit dai,” ngu nna htan mu ai.

¹¹Dai re ai majaw Zoara hte Eshtaola shara kaw na Dan a amyu bawsang marai kru tsa hte gaw majan gasat na matu pru sa wa ma ai.

¹²Shanhte lung wa nhtawm Yuda mung Kiriat Yarim mare a sinna maga e dap wa jung nga ma ai. Dai rai nna shara dai hpe Dan a dap ngu nna naw shamying da nga ma ai.

¹³Dai kaw nna bai rawt sa wa ma yang, Ehprim bum ga e nga ai Mihka a nta de du ma ai.

¹⁴Dai hpang Laisha mare grup yin hkan sa yu maram yu sai masha manga hte gaw shanhte a manang ni hpe, “Ndai yang na nta langai ngai hta gumhpraw hte sup da ai hpun hpara sumla nga ai hpe nanhte chye nga myit ni? Dai yang e kaga hpara sumla ni hte sinda magap langai mi mung nga nga ai. Anhte hpa galaw ang ai ngu nna nanhte myit nga myit ni?,” ngu nna tsun ma ai.

¹⁵Dai re ai majaw Lewi shabrang wa nga ai Mihka a nta de sa nhtawm shi kaning rai nga ai lam Lewi masha wa hpe san yu ma ai.

¹⁶Dai aten hta majan gasat sa nga ai Dan amyu masha kru tsa gaw chyinghka lam e tsap nga ma ai.

¹⁷Dai mungdan hpe kin-yu sa yu ai marai manga hte gaw nta nhku de shang nna gumhpraw hte sup da ai hpun hpara sumla, kaga hpara sumla ni hte hkinjawng hpun palawng hpe la kau ma ai; hkinjawng wa chyawm gaw laknak hpai ai masha kru tsa hte rau chyinghka lam e tsap nga ai.

¹⁸Dai masha ni gaw Mihka a nta de shang nna dai chyoi pra ai arai ni hpe la kau ma ai shaloi, “Nanhte hpa galaw nga myit ni?,” ngu nna hkinjawng wa san wu ai.

¹⁹Shanhte gaw shi hpe, “Atsin sha nga u, ga hkum mi mung hkum shaga et; anhte kaw hkan rit; anhte hpe hpaji jaw ai wa hte hkinjawng tai ya mi. Masha langai woi awn ai dinghku a matu hta Israela amyu bawsang ting a matu hkinjawng tai na gaw na a matu grau n kaja nga a ni?,” ngu nna tsun ma ai.

²⁰Dai lam gaw hkinjawng wa hpe grai kabu shangun nga sai majaw dai chyoi pra ai arai ni hpe la lang nhtawm shanhte hte rau hkawm mat wa wu ai.

²¹Shanhte gaw kayin wa nhtawm shanhte a ma kaji ni, yam nga uhpung hte sut rai ni hpe shawng shangun nna pru sa wa ma ai.

²²Shanhte gaw nta kaw nna ram ram tsan mat wa sayang she Mihka gaw shi a htingbu ni hpe shaga la nna majan gasat sa wu ai. Shanhte gaw Dan a masha ni hpe hkan shachyut dep ma ai rai nna,

²³shanhte hpe jahtau ma ai. Dan a masha ni mung kayin yu let Mihka hpe, “Hpa baw wa rai sata? Ndai masha uhpung mi hpa majaw hkan nang nga ma ta?,” ngu nna san ma ai.

²⁴Mihka mahtang, “Hpa baw wa rai sata?,” nga ai gaw nanhte kaning ngu lachyum shapraw mayu nga myit ni? Ya nanhte gaw nye a hkinjawng hte ngai tawk ai hpara sumla hpe la mat wa myit dai. Dingsa sa hpai mat wa myit hka! Ngai hta hpa naw nga sata?,” ngu nna htan wu ai.

²⁵Dan a masha ni mung, “Nang hpa mung n shaga ai nga yang grau kaja na ndai; ndai masha ni masin pawt wa nna nang hpe htim gasat kau na mara ai. Shaloi nang hte na a dinghku masha ting si mat na rai myit dai,” ngu nna tsun ma ai.

²⁶Dai hpang shanhte mung hkawm matut mat wa ma ai. Shanhte mahtang shi a matu nau wa n-gun ja nga ma ai hpe Mihka mu jang shi a nta de nhtang mat wa wu ai.

²⁷Dan a masha ni dai hkinjawng wa hte Mihka galaw ai arai ni hpe woi mat wa ai hpang, ngwi pyaw sim sa ai mare, Betrehob kadit na Laisha mare hta atsin sha nga ai masha ni hpe htim gasat kau ma ai. Shanhte gaw mare masha ni hpe sat kau nhtawm mare hpe mung nat kau ya ma ai. Laisha mare gaw Sidon mare hte tsan ai majaw mung, kaga masha ni hte makyit mahkai n nga ai majaw mung shanhte hpe hkye la na masha kadai mung n nga nga ai. Dan a masha ni mung mare hpe bai de nna dai yang e nga nga ma ai.

²⁹Laisha mare dai hpe shanhte a kaji daju Yaku a kasha Dan a mying hkan nna Dan ngu nna shanhte galai shamying da ma ai.

³⁰Dan a masha ni mahtang nawku na matu hpara sumla shadun ma ai rai nna Mawshe a kashu, Gershom a kasha Yonahtan hte shi a matu mara ni gaw dai masha ni bawng dung mat ai shani du hkra Dan amyu bawsang a matu hkinjawng tai let daw jau ma ai.

³¹Karai Kasang hpe nawku ai Sum gaw Shilo e naw nga nga dingsa Mihka galaw ai hpara sumla mung dai yang e naw nga nga ai.