Read Jinghpaw Common Language Bible 2009 TARA AGYI 19 Bible Online

TARA AGYI 19 - Jinghpaw Common Language Bible 2009 bible

TARA AGYI 19

¹Israela amyu hta hkawhkam garai n nga ai aprat e, Ehprim bum ga hte tsawmra mi tsan ai shara hta Lewi masha langai mi nga nga ai. Shi gaw Yuda mung Betlehem mare na numsha langai mi hpe shi a lashi num shatai la wu ai.

²Rai ti mung numsha dai gaw shi a madu wa hpe pawt nna Betlehem mare e nga ai kawa a nta de wa mat wa nhtawm dai yang e shata mali nga nga wu ai.

³Dai hpang dai wa gaw shi a nta de bai nhtang wa lu na matu shi hpe shalen la na nga, shi hpang de hkan sa na daw dan wu ai. Shi hte rau shi a shangun ma langai, lawze lahkawng woi nna rawt sa mat wa wu ai. Dai numsha mung Lewi wa hpe nta de woi shang wa ai rai nna shi a kawa dai wa hpe mu ai shaloi, shi hpe kabu gara ai hte hkalum la wu ai.

⁴Dai numsha a kawa mung shi nga na matu aja awa shadut wu ai rai nna, masum ya tup nga nga wu ai. Shan la yan mung lu sha let dai yang e masum na tup nga kau ma ai.

⁵Mali ya ngu na jahpawt aten hta, shan gaw jau jau rawt nna hkawm sa na matu shajin da ma ai. Rai ti mung dai numsha a kawa mahtang Lewi wa hpe, “Lama ma shawng naw sha la mu; dai gaw nan hpe n-gun kaja lu shangun na ra ai. Dai hpang mahtang nan hkawm sa lu na rai myit dai,” ngu nna tsun wu ai.

⁶Dai rai nna dai masha lahkawng yan gaw dung let rau lu rau sha rai ma ai. Shaloi dai numsha a kawa mahtang Lewi wa hpe, “Chyeju hte dai na lana mi sha gaw grai pyaw ai hte naw nga la u,” ngu nna tsun wu ai.

⁷Dai Lewi wa chyawm gaw hkawm sa sana ngu nna rawt wu ti mung naw hkring nga na matu katsa wa shadut wu ai majaw dai yang e lana mi naw nga kau wu ai.

⁸Manga ya ngu na jahpawt jau jau e pru wa na nga rawt hpang wa wu ti mung dai numsha a kawa mahtang, “Chyeju hte lama ma naw sha la u; jan kayau mat wa ai aten du hkra naw la mu,” ngu nna tsun wu ai. Dai masha lahkawng yan mung rau bai lu sha ma ai.

⁹Dai wa gaw shi a lashi num hte shangun ma ni hte mung lang mi bai sa wa na nga rawt pru ma yang, kawa gaw, “Yu mu, jan pyi du wa sai; dai na naw hkring yang mai na myit dai. Ya kade n na yang, nsin sin na sai, ndai yang e nga nna aten kaja hpe hkam la mu. Hpawt de mahtang hkawm sa na matu jau jau rawt nna nta ga de wa masit,” ngu nna tsun wu ai.

¹⁰Rai ti mung dai wa chyawm gaw dai yang e n kam nga shalai kau sai majaw shi hte shi a lashi num hte rau shan a shangun ma hte lawze lahkawng hta daw htaw let hkawm hpang wa ma ai. Shanhte gaw Yebu mare makau (dai gaw Yerusalem) de du shang wa ma yang jan du nga sai majaw shi a shangun ma wa gaw shi a madu hpe, “Sa, Ndai Yebusi mare e anhte hkring nna shana nga shalai kau ga,” ngu nna tsun wu ai.

¹²Rai ti mung shi a madu chyawm gaw, “Israela amyu n re ai masha ni nga ai mare hta anhte hkring lu na ga ai n rai; loi mi tsan hkra naw lai mat wa nhtawm Gibea shing n rai Rama mare langai ngai hta nga shalai kau na re,” ngu nna tsun wu ai.

¹⁴Dai re ai majaw shanhte gaw Yebu hpe lai kau da nhtawm matut hkawm mat wa ma ai. Shanhte gaw dai Benyamin amyu bawsang a lamu ga na Gibea mare de du wa ma ai shaloi jan shang mat sai.

¹⁵Shanhte gaw dai yang e nga shalai na nga kayin sa wa ma ai. Shanhte gaw mare kata de shang nna mare lam e dung nga ma ti mung nta de wa manam shangun na masha kadai mung n hkap la ma ai.

¹⁶Shanhte dai yang e nga nga ma yang, dingla langai mi shi a yi amu galaw shangut da nhtawm lai wa nga ai. Shi gaw moi kaw nna Ehprim bum ga masha rai ti mung ya chyawm gaw Gibea mare e nga nga wu ai. (Dai yang e nga ai kaga masha ni mahtang Benyamin amyu bawsang hta na rai ma ai.)

¹⁷Dai dingla wa gaw dai mare kata nmaw lam e bu hkawm ai wa hpe yu matsing nna shi hpe, “Nang kanang na rai wa n ta? Ya gara de sa wa nga n ta?,” ngu nna san wu ai.

¹⁸Dai Lewi masha wa gaw, “Anhte gaw Yuda mung Betlehem mare de sa nga nna, ya Ehprim bum ga dai MADU a nta de hkawm sa wa ga ai. Kadai mung lana mi sha pyi n hkap hkalum la mayu ma ai.

¹⁹Anhte gaw anhte a lawze ni a matu ushat hte yihku mung, nye a lashi num jan, nye a matu hte nye a shangun ma a matu muk hte sabyi ntsin mung lu ga ai. Anhte hta ra ai hpa mung anhte lu ga ai,” ngu nna tsun dan wu ai.

²⁰Dai dingla wa gaw, “Nye a nta hta nanhte hpe hkalum la na nngai! Ngai gaw nanhte hpe lanu lahku la na made ai. Nanhte dai nmaw lam e n nga shalai ra na rai myit dai,” ngu nna tsun wu ai.

²¹Dai rai nna shi gaw shanhte hpe shi hte rau nta de woi wa nhtawm shanhte a lawze ni hpe ushat jaw ya wu ai. Shanhte mung lagaw shin nna lusha sha ma ai.

²²Shanhte gaw apyaw sha nga nga ma yang, dai mare na n hkru n hkra ngang gayut ai masha nkau mi gaw dai hpe sa wang nhtawm nta chyinghka ni hpe sa adup hpang ma ai. Shanhte gaw dai dingla wa hpe, “Nang hte rau nta de shang wa sai masha wa hpe shapraw ya mi! Anhte shi hte nga sha mayu ga ai!,” ngu nna tsun ma ai.

²³Rai ti mung dingla wa mahtang pru nna shanhte hpe, “Nye a manang ni e, dai hku gaw n mai na re! Chyeju hte dai zawn re ai n shawp nna matsat shabat re ai amu hpe hkum galaw myit! Ndai wa gaw nye a manam she rai nga ai.

²⁴Yu mu! Ndai yang e shi a lashi num hte nye a shayi sha hkawn jet langai nga nga ai. Dai yan hpe ngai shapraw ya na made ai; shan hte kanawn lu na rai myit dai. Nanhte ra ai hku shan hpe di mu. Rai ti mung ndai masha wa hpe dai zawn re ai n shawp n kap ai amu hkum galaw myit!,” ngu nna tsun wu ai.

²⁵Rai ti mung dai masha ni gaw shi a ga madat ya ma ai n rai. Shaloi Lewi masha wa gaw shi a lashi num hpe woi la nna shinggan e shanhte hpe ap ya wu ai. Shanhte gaw jahpawt du hkra n hkring ai sha shana tup jawm roi rip ai hte shut kau ma ai.

²⁶Dai numsha gaw nhtoi htoi jang shi a madu wa nga ai dai dingla wa a nta chyinghka lam e wa taw nga ai. Shi gaw nhtoi htoi sayang mung dai yang e naw nga nga ai.

²⁷Shi a madu wa gaw dai jahpawt e rawt wa nna hkawm sa na nga, chyinghka hpaw dat wu yang, chyinghka hkinbawng hta shi a lata mara da let nta man e galeng taw nga ai shi a lashi num hpe mu wu ai.

²⁸Shi gaw, “Rawt u, anhte wa saga,” ngu nna tsun wu ai. Rai ti mung shi n htan mat sai. Dai rai nna shi gaw shi a hkum hpe lawze ntsa e nda tang rai mara nna, nta lam de hkawm hpang mat wa ma ai.

²⁹Shi du jang, nta kata de shang nhtawm nhtu langai wa la wu ai. Dai hpang shi a lashi num a hkum hpe daw shi lahkawng kahtam di nhtawm Israela amyu bawsang shi lahkawng hpang de langai hpra hpra shagun dat ya wu ai.

³⁰Dai hpe mu chye ai masha shagu hte gaw, “Dai zawn re ai amu anhte galoi mung n na yu ga ai! Israela masha ni Egutu mung kaw na pru wa ai shani kaw na ya du hkra dai zawn re ai amu galoi mung n byin yu nga ai! Ndai amu hte seng nna lam lama ma anhte galaw ra na ga ai! Dai gaw kaning hku byin wa na rai ta?,” ngu nna tsun ma ai.