Read Jinghpaw Common Language Bible 2009 TARA AGYI 2 Bible Online

TARA AGYI 2 - Jinghpaw Common Language Bible 2009 bible

TARA AGYI 2

¹Dai MADU a lamu kasa gaw Gilgala kaw nna Bohkim de sa wa nhtawm, Israela amyu masha ni hpe, “Ngai gaw nanhte hpe Egutu mung kaw nna woi shapraw wa let, nanhte a kaji kawa ni hpe ga sadi jaw da ai mungdan de woi wa ni ai. Ngai gaw, ‘Nanhte hte tawn da ai ga shaka hpe galoi mung n jahten kau na we ai.

²Nanhte mung ndai mung e nga ai masha amyu ni hte ga shaka hpa mung tawn da lu na myit dai n rai. Nanhte gaw shanhte a tawn hkungri ni hpe hpya kadawng kau ya na rai myit dai,’ ngu nna tsun wu ai. Rai ti mung nanhte gaw ngai tsun matsun ai hku n galaw nga myit dai. Nanhte mahtang nhtan shai ai hku sha agalaw nga myit dai!

³Dai rai nna nanhte rawt lung wa myit yang, dai masha amyu ni hpe ngai n gawt shapraw kau ya sana, ngu ya nanhte hpe ngai tsun made ai. Shing rai shanhte gaw nanhte a gumlau hpyen tai nhtawm, shanhte a hpara ni hpe nawku wa hkra mahkam hkam hkrum na rai myit dai,” ngu nna tsun wu ai.

⁴Lamu kasa gaw dai lam tsun wu ai shaloi, Israela amyu masha ni yawng jahtau hkrap hpang wa ma ai;

⁵dai rai nna shara dai hpe Bohkim ngu nna shamying ma ai. [1] Shanhte gaw dai yang e dai MADU hpe shagu hkungga ni nawng ya ma ai.

⁶Yawshu gaw Israela amyu masha ni hpe dat dat wu yang, langai hte langai gaw tinang lu la ang ai sali ga hpe madu la na nga, lam ang ai hku pru sa wa ma ai.

⁷Israela amyu masha ni gaw dai MADU hpe Yawshu a prat tup hta nawku daw jau ma ai; shi n nga mat wa ai hpang e mung Israela a matu dai MADU galaw dan nu ai galu kaba ai amu ni yawng hpe mu dep dat ai ningbaw ni a prat hta mung dai MADU hpe matut nna nawku daw jau ma ai.

⁸Nun a kasha dai MADU a shangun kasa Yawshu gaw asak latsa e shi ning hta si mat wa sai.

⁹Shi hpe Gasha Bum a dingdung maga, Ehprim bum ga na shi a lamu ga sali rai nga ai Timnat Sera shara hta lup makoi da nga ma ai.

¹⁰Dai ban prat ting na ni mung si htum mat nna htawm hpang na ban prat masha ni gaw dai MADU Israela a matu hpa galaw nu ai hpe mung malap kau ma ai.

¹¹Dai hpang Israela amyu masha ni gaw dai MADU hpe yubak galaw shut kau nhtawm Bala hpara ni hpe daw jau hpang wa manu ai.

¹²Egutu mung na shanhte hpe woi wa ai Karai Kasang, dai MADU shanhte a kaji kawa ni a Karai Kasang hpe nawku ai lam shanhte kau da nna grup yin na masha amyu ni a hpara ni hpang de hkan mat wa nhtawm, dai ni hpe nawku gum dagup ai hte dai MADU hpe pawt sindawng shangun ma ai.

¹³Shanhte gaw dai MADU hpe nawku daw jau ai amu jahkring kau nhtawm Bala hpara hte Ashtarot hpe daw jau ma ai.

¹⁴Shing rai dai MADU gaw Israela hpe masin yu kahtet wu ai majaw shanhte hpe htim gasat nna kashun kashe di nhtawm hpya kau na ni a lata hta ap ya kau wu ai. Shi gaw shanhte hpe grup yin na masha hpyen ni a lata de ap kau ya wu ai majaw Israela masha ni shanhte hkum hpe loi mi pyi n makawp maga la lu na rai ma ai.

¹⁵Shanhte majan pa de rawt ai aten shagu dai MADU gara hku galaw na hpe tsun da nu ai hte maren, shanhte hpe ninghkap wu ai. Shanhte gaw tsin-yam tsindam kaba hkrum sha nga ma ai.

¹⁶Shaloi dai MADU gaw shanhte hpe hpya lu hpya sha ai ni a lata na hkye la nhtawm Israela ningbaw ni hpe jaw ya wu ai.

¹⁷Rai ti mung Israela masha ni gaw shanhte a ningbaw ni a ga hpe n madat hkraw nga ma ai. Israela gaw dai MADU hta sadi sahka myit n rawng nga manu ai majaw kaga hpara ni hpe nawku ma ai. Dai MADU a hkang da ai ga ni hpe shanhte a kawa ni madat mara hkan sa nga ma ti mung, ndai ban prat nnan amyu masha ni mahtang n hkan n sa mat ma ai.

¹⁸Dai MADU gaw Israela hpe ningbaw jaw ai shaloi, dai MADU gaw dai ningbaw wa a prat tup hta shi hpe karum la nhtawm gumlau hpyen ni a lata kaw nna amyu masha ni hpe hkye hkrang la wu ai. Shanhte hkrum sha ai nni nkri hte dip gamyet sha hkrum ai madai sharung nsen ni a majaw dai MADU shanhte hpe matsan dum la wu ai.

¹⁹Rai ti mung dai ningbaw wa si mat jang, dai amyu masha ni mi na lam dingsa de bai hkan mat wa nhtawm lai sai ban masha ni galaw ai amu hta grau sawng ai hku hkan galaw ma ai. Shanhte gaw hpara shaje ni hpe nawku nhtawm shanhte hta nan rawng nga ai n hkru n shawp lam ni hpe du ja ai hte matut galaw nga ma ai.

²⁰Shaloi dai MADU gaw Israela hpe pawt sindawng nna, “Ndai amyu masha ni gaw shanhte a kaji kawa ni hkan shatup na, ngai hkang da ai ga shaka hpe jahten sharun kau manu ai.

²¹Shanhte gaw nye a ga n madat ai hte n hkan n sa nga manu ai majaw, Yawshu si mat ai shaloi mungdan e naw ngam nga ai masha amyu baw kadai hpe mung ngai loi mi mung n gawt shapraw na ni ai.

²²Shanhte a kaji kawa ni hkan shatup ai zawn ndai Israela amyu masha ni nye a lam ni hta hkan sa na ma ai kun, n hkan na ma ai kun, ngai shanhte hpe lang nna mahtai tam shapraw ya na we ai,” ngu nna tsun wu ai.

²³Dai rai nna dai MADU gaw amyu baw ni hpe mungdan kata hta naw nga na ahkang jaw wu ai rai nna shi gaw Yawshu hpe awng padang n jaw, shi si mat ai hpang mung shanhte hpe n shachyut shapraw kau ya wu ai.