Read Jinghpaw Common Language Bible 2009 TARA AGYI 20 Bible Online

TARA AGYI 20 - Jinghpaw Common Language Bible 2009 bible

TARA AGYI 20

¹Dingdung maga Dan mare kaw nna dingda maga Berasheba du hkra nga ai Israela amyu masha ni yawng hte, sinpraw hkran Gilead mung na ni mung saw shaga ai ga htan ya ma ai. Shanhte gaw Mizpa mare e hkum langai hku dai MADU a man e zup hpawng ma ai.

²Israela amyu bawsang ni yawng a ningbaw ni gaw Karai Kasang a masha ni hte rau hpawng nga ma ai rai nna lagaw dap hta shang lawm ai hpyenla hkrai 400,000 rai nga ai.

³Dai aten hta kaga Israela masha ni yawng Mizpa e zup hpawng nga masai lam Benyamin masha ni na ma ai. Israela amyu masha ni gaw, “Hpa baw shut hpyit kau manit ni? Anhte hpe dai lam tsun dan mi,” ngu nna san ma ai.

⁴Sat kau hkrum sai lashi num a madu wa Lewi masha gaw, “Nye a lashi num hte ngai gaw Benyamin a lamu ga na Gibea de sa nna lana mi nga shalai saga ai.

⁵Gibea mare masha ni ngai hpe sa gasat na nga, shana e nta hpe wang shinggrup da ma ai. Ngai hpe sat kau na matu shanhte shatawng shada ma ai; dai hku n re ai sha, nye a lashi num hpe roi rip kau ya mu ai majaw shi si mat nga sai.

⁶Ngai gaw shi a si mang hpe la nhtawm dai hpe kahtam daw nna Israela amyu bawsang shi lahkawng hpang de langai hpra hpra shagun dat ya nngai. Dai masha ni gaw ndai n hkru n shawp nna matsat shabat re ai amu anhte hta shut hpyit kau manu ai.

⁷Ndai yang e nga nga myit dai nanhte Israela masha ni yawng hte e, ndai amu hpe anhte kaning rai galaw sa wa na rai nga ga ta?,” ngu nna htan wu ai.

⁸Amyu masha ni yawng rau sha rawt tsap let, “Anhte kadai mung tinang sum, tinang nta de n wa saga.

⁹Da ndai gaw anhte kaning rai galaw sa wa na lam rai nga mali ai; hpaida da nna Gibea hpe gasat na masha nkau mi hpe lata la ga.

¹⁰Israela masha ni gaw marai shi hta langai ngai hku hpyen gasat ai luksuk ni a matu lusha jarit htawk karum nna, kaga ni chyawm gaw Israela hta shanhte shut hpyit kau manu ai ndai zawn matsat shabat re ai arawn alai galaw shapraw ai Gibea masha ni hpe ari sa jaw na rai nga ai,” ngu nna tsun mu ai.

¹¹Dai rai nna Israela masha ni yawng gaw mare hpe htim gasat na matu yaw shada ai lam langai sha hte jawm zup hpawng nga ma ai.

¹²Israela amyu bawsang ni gaw Benyamin amyu bawsang ting a lamu ga nga manga de kasa ni hpe shangun dat nhtawm, “Nanhte shut hpyit kau manit dai ndai ru hka amu gaw kaning re ai rai ta?

¹³Ndai zawn n hkru n shawp ai amu Israela hta na tsan kau na matu dai ni hpe anhte sat kau na ga ai majaw, Gibea mare hta dai zawn ngang gayut ai masha ni hpe ya jang anhte a lata de ap ya mi,” ngu nna tsun ma ai. Rai ti mung Benyamin masha ni chyawm gaw kaga Israela masha ni tsun ai ga hpe hpa zawn n nawn ya ma ai.

¹⁴Benyamin a lamu ga hta nga ai mare yawng kaw na masha ni gaw kaga Israela amyu masha ni hpe htim anut kau na nga, Gibea mare de du nga ma ai.

¹⁵Shanhte gaw dai shani jang shanhte a mare ni hta na hpyenla mun lahkawng hkying kru hte hpe shaga shapraw da ma ai. Dai hta kaga, lapai lata chye lang nna kara singgawng mi pyi n shai hkra lungdin chye nwat kabai ai laksan masha sanit tsa hpe mung Gibea masha ni hta shinggyin hpawng da ma ai.

¹⁶

¹⁷Israela amyu bawsang ni hta chyawm gaw Benyamin amyu bawsang ni hpe n hti ai sha, hpyen amu hkrak sharin da lu sai hpyenla 400,000 hpe zup hpawng da nga ma ai.

¹⁸Israela masha ni gaw Behtela mare na nawku ai shara de lung wa nhtawm, “Benyamin amyu masha ni hpe gara amyu bawsang mahtang shawng gasat ang na rai ga ta?,” ngu nna dai yang e Karai Kasang hpe san ma ai. Dai MADU gaw, “Yuda amyu bawsang ni shawng rai u ga,” ngu nna htan wu ai.

¹⁹Dai rai nna Israela masha ni hpang jahpawt e rawt nna Gibea mare makau e dap jung ma ai.

²⁰Shanhte gaw Benyamin hpyen luksuk hpe gasat na nga pru sa nhtawm mare de man yawng ai shara e hpyenla ni hpe jahkrat tawn da ma ai.

²¹Benyamin a hpyen luksuk ni mung mare kaw nna pru nhtawm Israela hpyenla mun lahkawng hkying lahkawng hte hpe jan garai n du yang sat kau ma ai.

²²Israela masha ni gaw nawku ai shara de sa nhtawm dai MADU a man e shana de du hkra sharung shayawt nga ma ai. Shanhte gaw shi hpe, “Anhte a kanau Benyamin amyu matu ni hpe ya kalang mi bai sa gasat mai nga ga ni?,” ngu nna san ma ai. Dai MADU mung, “Sa gasat mu,” ngu nna htan wu ai. Dai rai nna Israela hpyen luksuk gaw myit n-gun lu la ai hte shawng shani e shanhte sa gasat ai shara hta nan shanhte a hpyenla ni hpe sa tawn da ma ai.

²³

²⁴Shanhte gaw lahkawng lang ngu na Benyamin a hpyen luksuk ni nga ai de rawt lung wa ma ai.

²⁵Ndai lahkawng lang ngu na majan hta mung Benyamin amyu matu ni Gibea mare kaw nna pru sa nhtawm hpyen hpaji sharin da sai Israela hpyenla mun mi hkying matsat hpe dai lang sat kau lu ma ai.

²⁶Dai hpang amyu masha ni yawng Behtela mare de lung wa nhtawm sharung shayawt nga ma ai. Shanhte gaw dai yang na dai MADU a man e dung nga let shana de du hkra n lu n sha rai ma ai. Shanhte gaw dai MADU a man e mahku hkungga ni hte hkum ting nat nawng ai shagu hkungga nkau mi nawng jau ma ai.

²⁷Dai nhtoi ni hta Behtela mare dai yang e Karai Kasang a Ga Shaka Sumpu nga nga ai rai nna, Arun a kashu, Eleaza a kasha Hpineha gaw dai hpe woi hpareng nga wu ai. Shaloi amyu masha ni gaw dai MADU hpe, “Anhte a kanau Benyamin a amyu matu ni hpe bai pru gasat mai na kun, shing n rai n mai na ga ai kun?,” ngu nna san ma ai. Dai MADU gaw, “Gasat mu. Hpawt de ngai nanhte hpe awng padang jaw ya na made ai,” ngu nna htan wu ai.

²⁸

²⁹Dai rai nna Israela masha ni gaw Gibea mare grup yin hkan e hpyenla nkau mi hpe lagyim up da nga ma ai.

³⁰Dai hpang masum ya ngu na shani e, Israela masha ni gaw Benyamin a hpyen luksuk hpang de rawt lung wa nhtawm shawng e shanhte galaw yu manu ai zawn Gibea mare de man yawng ai shara e shanhte a hpyenla ni hpe jahkrat tawn da ma ai.

³¹Benyamin amyu matu ni gaw shanhte hpe htim gasat na nga pru wa ma ai rai nna mare kaw nna tsan mat wa ma ai. Dai rai nna shawng shani na zawn Behtela de lung wa ai lam hte Gibea pa kahtawng hkan sa wa ai lam hkan Israela masha nkau mi hpe sat hpang wa manu ai. Israela masha sumshi daram hpe shanhte sat kau lu ma ai.

³²Benyamin amyu matu ni gaw, “Shawng e anhte gasat kau lu ga ai zawn shanhte hpe anut kau ga,” ngu nna tsun ma ai. Rai ti mung, Israela masha ni mahtang mare hte tsan mat hkra nmaw lam hku shanhte hpe woi shalen mat wa let htingnut masu na hpaji daw da nga ma ai.

³³Dai rai nna Israela dap dung luksuk ni hprawng yen mat wa nhtawm Balatama shara e hpyen hpung bai hpaw la ma ai. Gibea mare hpe wang shinggrup da nga ai ni chyawm gaw shanhte lagyim up nga ai shara ngu na dai mare a grup yin na lungrawk bum ga kaw na akajawng sha rawt pru wa ma ai.

³⁴Israela masha ni yawng hta na laksan lata shaw la ai hpyenla mun mi hte Gibea mare hpe htim gasat nga ai rai nna dai gasat gala ai gaw laja lana rai nga ai. Benyamin amyu matu ni mahtang shamyit kau ai hkrum na hpe n chye nga ma ai.

³⁵Dai MADU gaw Benyamin a hpyen luksuk hpe dang kau lu na awng padang Israela hpe jaw wu ai rai nna, dai shani e gumlau hpyen 25,100 hte hpe Israela ni sat kau lu ma ai.

³⁶Dai majaw Benyamin amyu matu ni gaw shanhte sum mat masai lam hpe chye nga masai. Israela a dap dung hpyen luksuk gaw Gibea mare grup grup de shanhte lagyim up da manu ai masha ni hpe kam ma ai majaw, Benyamin amyu matu ni kaw na kanut mat wa ma ai.

³⁷Dai masha ni gaw Gibea mare de tin tin kagat shang mat wa nhtawm dai mare kata de abram hkawm let dai yang na masha shagu hte hpe sat kau ma ai.

³⁸Israela a dap dung luksuk hte makoi lagyim nga ai masha ni mahtang kumla langai lajang da manu ai rai nna dai mare kaw na sumwi zawn re ai wan hkut kaba lung wa ai hpe shanhte mu ai shaloi,

³⁹majan pa de gasat sa wa let kayin htingnut mat wa ma ai. Dai aten hta Benyamin amyu matu ni mahtang Israela masha sumshi hpe sat kau rau manu ai. Shanhte nan chyawm gaw, “Shawng e anhte gasat kau lu saga ai zawn, shanhte hpe anhte anut kau lu saga ai,” ngu nna tsun ma ai.

⁴⁰Dai hpang masat kumla gaw dan pru wa ai hte mare na wan hkut sumwi gaw lamu de dingchyung rai lung hpang wa nga ai. Shing rai nga yang, Benyamin amyu matu ni shingdu de kayin yu mu ai shaloi mare ting wan numli ni mawng lung nga ai hpe yu mau nga ma ai.

⁴¹Dai hpang Israela masha ni nhtang kayin wa ma yang, shamyit kau ai hkrum na lam hpe shanhte chye ma ai majaw Benyamin amyu matu ni hkrit mat nga ma ai.

⁴²Shanhte mung Israela masha ni kaw na htingnut mat wa nhtawm nam mali de kagat hprawng mat wa ma ai; rai ti mung shanhte hprawng lawt lu nga ma ai n rai. Shanhte gaw dap dung luksuk hte ya mare kata na pru wa ai masha ni a lapran e matep rim hkrum ma ai rai nna shamyit jahten kau ai hkrum nga ma ai.

⁴³Israela masha ni mung gumlau hpyen wa hpe mahkam hkam da manu ai hte Gibea mare a sinpraw jahtum jut du hkra shanhte shachyut kau ma ai. Shanhte hkan dep ai ni hpe mung sat kau ma ai.

⁴⁴Benyamin amyu matu ni hta na share shagan hpyenla mun mi hkying matsat sat kau ai hkrum ma ai.

⁴⁵Bai kaga ni mung nam mali na Rimon lungbra maga de kayin hprawng mat ma ai. Shanhte hta na hkying manga hte gaw nmaw lam dingyang hkan sat kau ai hkrum ma ai. Israela masha ni gaw naw ngam nga ai ni hpe Gidom du hkra matut shachyut nhtawm masha hkying lahkawng hte hpe sat kau lu ma ai.

⁴⁶Dai shani e sat kau hkrum ai Benyamin amyu matu ni yawng mun lahkawng hkying manga rai nga ai; shanhte yawng gaw share shagan ai hpyenla ni hkrai rai ma ai.

⁴⁷Rai ti mung masha kru tsa hte gaw nam mali na Rimon lungbra de hprawng lawt lu ma ai rai nna dai yang e shata mali tup sa nga nga ma ai.

⁴⁸Israela masha ni gaw naw ngam nga ai Benyamin amyu matu ni hpang de nhtang kayin wa nhtawm numsha lasha, ma kaji hte yam nga yawng hte hpe mung sat kau ma ai. Shanhte gaw dai shara hkan nga ai mare shagu hpe nat kau ma ai.