Read Jinghpaw Common Language Bible 2009 TARA AGYI 5 Bible Online

TARA AGYI 5 - Jinghpaw Common Language Bible 2009 bible

TARA AGYI 5

¹Dai shani e Debora hte Abinoam a kasha Barak yan gaw ning ngu nna mahkawn hkawn ma ai:

²Dai MADU hpe shakawn mu! Israela ni gaw gasat na matu daw dan nga masai; amyu masha ni kabu gara ai hte tinang myit hku shang lawm nga ma ai.

³Hkawhkam ni e, na la mu! Up hkang du ni e, madat la mu! Ngai gaw dai MADU Israela a Karai Kasang hpe mahkawn let sumpyi dum shapyaw na nngai.

⁴MADU e, nang gaw Seira bum ni kaw na pru nhtawm, Edom ginwang kaw na pru sa wa ai shaloi, ginding aga ashun nna lamu kaw na marang htu hkrat nga ai. Rai sa, sumwi ni hta na hka ru hkrat wa nga ai.

⁵Bum ni gaw Sina Bum e nga ai dai MADU a man e mung, dai MADU Israela a Karai Kasang a man e mung gari ashun nga ai.

⁶Anat a shadang sha Shamga a lak htak hte Yaela a aprat hte hta, hpaga nmaw lam katsi mat nna, bu hkawm ai ni masun lam ni hpe she lang mat masai.

⁷Israela a mare ni kau da hkrum ai hte tsap marawng nga sai, Debora e, nang gaw Israela a matu kanu zawn nang du sa ai aten du hkra dai mare ni kaman tsap nga sai.

⁸Israela masha ni hpara nnan lata la ma ai shaloi, mungdan kata majan pru nga ai; Israela mun mali hta ninggang langai hpai lu a ni? Nri langai hpai lu a ni?

⁹Nye a myit masin gaw Israela du ni hte mung, kabu gara myit hte tinang myit hku shang lawm nga ai ni hte mung rau rai nga ai. Dai MADU hpe shakawn mu!

¹⁰Lawze hpraw jawn ai ni, gumra lahkum ni hta dung ai ni hte, shara shagu hkan hkawm ai ni e, de a lam tsun dan mu.

¹¹Madat mu! Garu kachyi nga ai shawa masha ni gaw hka htung ni hpe shinggrup nhtawm, dai MADU a awng padang lam ni hpe mung, Israela amyu masha ni a awng padang lam ni hpe mung tsun dan nga ma ai. Dai hpang MADU a amyu masha ni shanhte a mare ni kaw na yu sa ma ai.

¹²Hprang u, Debora, hprang u! Hprang u! Mahkawn mangoi u! Hprang u! Abinoam a shadang sha Barak e, Shawng de rawt sa u, Na a bawng masha ni hpe woi mat wa u!

¹³Shaloi kam ging ai ni shanhte a ningbaw ni hpang de yu sa nna; dai MADU a amyu masha ni gaw shi hpang de du sa nna htim gasat na jin jin rai ma ai.

¹⁴Shanhte gaw Ehprim kaw nna kadit de yu sa nhtawm, Benyamin amyu bawsang hte de a amyu masha ni a hpang ningdim e hkan ma ai. Mahkira kaw na hpyen du ni pru nhtawm; Zebulun kaw na du salang ni yu wa nga ai.

¹⁵Yisahka hta na ningbaw ni Debora hta lawm nna; rai sa, Yisahka zawn Barak mung dan dawng nga ai, shanhte gaw wora kadit de shi kaw hkan ma ai. Rai ti mung Rubin amyu bawsang ni karan mat nna; shanhte n lu daw dan hparan la nga masai.

¹⁶Shanhte gaw hpa majaw sagu ni a shingdu e gyem nga ma ni? Sagu hpung ni hpe shaga ai sagu rem ni a nsen madat mai ai n rai ni? Rai sa, Rubin a amyu bawsang gaw ga karan mat nna, shanhte n lu daw dan hparan la nga masai.

¹⁷Gad a amyu bawsang gaw Yawdan hka a sinpraw hkran e nga nga ma ai, Dan a amyu bawsang gaw sanghpaw li a majaw dung nan taw nga ma ai. Ashe amyu bawsang mung panglai hkin-gau e nga nga ai; shanhte gaw hka kau mayan hkan nga nga ma ai.

¹⁸Rai ti mung Zebulun hte Naphtali amyu masha ni gaw majan pa hta asak dan hkawm sa ma ai.

¹⁹Megido hka shi makau na Tanak shara hta hkawhkam ni sa gasat nga masai; Hkanan hkawhkam ni gasat ma ai, rai ti mung shanhte gaw gumhpraw lanep n hta ma ai.

²⁰Sumsing lamu na shagan ni mung shanhte a lam hku hkawm lai nhtawm, Sisera hpe gasat ma ai.

²¹Kishon mawru hka ngu ai agre lwi ai Kishon hka nu gaw shanhte hpe shayawng kau sai. Ngai rawt lung wa na nngai, n-gun hte rawt shanang sa wa na nngai!

²²Dai hpang gumra ni gumtawng bukbak wa nhtawm, dai ni a lagaw lahkru hkindit dukdak kadu malu ai.

²³Dai MADU a lamu kasa gaw, “Meroza mare gaw dagam kau ai hkrum nu ga, dai yang e nga ai ni dagam dala, hkrum mu ga, Shanhte gaw shi a matu majan gasat na hpyenla ni hte rau dai MADU hpe n sa karum la ma ai,” ngu nna tsun ai.

²⁴Keni masha Hebera a madu jan Yaela gaw numsha danghta hta grau a htum lu nu ai; sum ni hta nga ai numsha danghta ni hta grau a htum nu ai.

²⁵Sisera lu hka ntsin hpyi ti mung shi gaw chyu mahtang jaw wu ai; shi hpe tsawm ai ban hta nga chyu sau pa sak jaw wu ai.

²⁶Shi gaw sum mailak hpe lata maga mi hte la nna maga mi hta bungli galaw masha a sumdu lang da nga ai; shi gaw Sisera a baw pungkum hpe adit grawp kau ai hte shi a abaw hkrang hkra dit dinghkren ya wu ai.

²⁷Shi gaw lahput lagaw kya daw mat nna, Yaela a galaw nhpang e kadawng taw nga sai. Shi a lagaw nhpang e shi a lahput ni kya daw mat nna kadawng taw mat sai; shi gaw ga e kadang mat nna si mat sai.

²⁸Sisera a kanu gaw hkuwawt hku mada yu let; dai hkinchyi hku hku shingdu kaw na sa yu azi nhtawm, “Hpa majaw shi a leng lau n du wa hkraw ai i? “Hpa majaw shi a gumra leng ni nhtang wa maga de lanyan ma ai i?,” ngu nna san wu ai.

²⁹Shi a numsha manang ni shi hpe htan mu ai hte shi gaw shi a kraw e lang hte lang ning ngu tsun wu ai:

³⁰“Shanhte gaw lu la ai lanep arai ni hpe rim karan la na matu mung; hpyenla shagu a matu mahkawn langai shing n rai lahkawng hpra hpra, Sisera a matu jaw shatsawm da ai sumpan; hkawhkam jan a du hta mawn ya na matu maka ka ai hpun palawng ni hpe chyu sha tam nga ma ai.”

³¹O MADU e, na a gumlau hpyen ni yawng dai zawn si htum mat mu ga law, rai ti mung na a manang ni mahtang rawt lung wa ai ajan zawn htoi tu nga mu ga law! Dai mung hta shaning mali shi ning tup ngwi pyaw sim sa nga sai.