Read Jinghpaw Common Language Bible 2009 TARA AGYI 8 Bible Online

TARA AGYI 8 - Jinghpaw Common Language Bible 2009 bible

TARA AGYI 8

¹Dai hpang Ehprim masha ni gaw Gidon hpe, “Midian masha ni hpe nang sa gasat yang, anhte hpe hpa majaw n shaga n ta?,” ngu nna tsun ma ai. Dai lam a majaw shanhte ahkup ahka nga mat hkra aput shatsang ma ai.

²Rai ti mung shi mahtang, “Nanhte galaw lu ai hta hpa mung ngai jan galaw lu nga nngai n rai. Ehprim masha ni kaji sha mi galaw ai amu gaw nye a lakung lama ni yawng jawm galaw ai amu hta pyi grau manu dan nga myit dai.

³Hpang jahtum e nanhte gaw Karai Kasang a daru magam n-gun hte Midian du Oreb hte Zeeb hpe sat kau lu myit dai. Dai hte shadawn mai na zawn re ai amu ngai hpa galaw lu a ta?,” ngu nna tsun wu ai. Dai ga hpe shi tsun ai shaloi, shanhte a masin kawp mat ma ai.

⁴Dai aten hta Gidon hte shi a masha masum tsa hte gaw Yawdan hka de sa nna dai hka hpe rap ma ai. Shanhte gaw ba kalawp nga ma ti mung, gumlau hpyen ni hpe naw hkan shachyut ma ai.

⁵Shanhte gaw Suhkot mare de du mat wa ma yang, shi gaw dai mare masha ni hpe, “Chyeju hte nye a masha ni hpe muk pa loi mi jaw ya mi. Shanhte grai hki ba mat masai; ngai mung Midian hkawhkam Zeba yan Zalmuna hpe hkan shachyut nga nngai,” ngu nna tsun wu ai.

⁶Rai ti mung Suhkot mare na ningbaw ni gaw, “Hpa lam a majaw na a hpyen luksuk ni hpe lusha shahpa jaw ang na ga ni? Nang gaw ya du hkra Zeba yan Zalmuna hpe garai n lu rim la sam nga ndai,” ngu nna tsun ma ai.

⁷Dai rai nna Gidon gaw, “Rai sa! Shing nga jang mung, dai MADU gaw Zeba yan Zalmuna hpe nye a lata de ap ya ai shaloi, ngai nanhte hpe nam mali na ju hpun amyu myu hte kayat na made ai!,” ngu nna tsun wu ai.

⁸Gidon mung Penuela mare de matut lung mat wa nhtawm dai yang na masha ni hpe dai zawn hpyi wu ti mung Suhkot mare masha ni jaw ai mahtai zawn sha Penuela masha ni mung hkap jaw ma ai.

⁹Dai rai nna shi gaw shanhte hpe, “Shim lum ai hte angwi sha ngai nhtang wa ai shaloi ndai langchyi hpe ngai agrawp daw kau ya na made ai!,” ngu nna tsun wu ai.

¹⁰Zeba hte Zalmuna yan gaw shan a hpyen luksuk ni hte Kakora mare e nga nga ma ai. Nam mali hkan na amyu bawsang ni a hpyen laba ting hta na 15,000 chyu sha ngam mat nna hpyenla 120,000 sat kau ai hkrum nga masai.

¹¹Gidon chyawm gaw Noba hte Yibeha mare yan a sinpraw maga na nam mali shingnawm lam dingyang garet lung wa nhtawm n dum shami nga nga ai hpyen dap hpe shang gasat ma ai.

¹²Midian Hkawhkam Zeba yan Zalmuna rawt hprawng ma ti mung, shi shan hpe hkan shachyut rim la nhtawm shan a hpyen laba ni yawng hpe kajawng shabra kau ya wu ai.

¹³Gidon gaw majan ginra kaw nna Here uhkan hku nhtang wa wu yang,

¹⁴Suhkot mare na shabrang ma langai mi hpe rim la nhtawm san yu wu ai shaloi, dai wa gaw Suhkot mare na du salang sanit shi sanit a mying jahpan Gidon hpe ka jaw wu ai.

¹⁵Dai hpang Gidon mung Suhkot mare masha ni hpang de sa nhtawm, “Nanhte gaw ngai hpe karum la na matu ningdang kau yu manit dai hpe dum mai nga ai n rai ni? Zeba yan Zalmuna hpe garai n lu rim la we ai majaw hki ba hkawm nga ai nye a hpyen luksuk hpe hpa lusha mung, n jaw lu ga ai, nga nna tsun yu manit dai. Rai sa dai yan gaw ya nang e rai nga ma ai!,” ngu nna tsun wu ai.

¹⁶Dai hpang shi gaw nam mali na ju hpun ni hpe la nhtawm Suhkot mare na ningbaw ni hpe ari jaw na matu akyu jashawn wu ai.

¹⁷Penuela mare na langchyi hpe shi adawt sharun kau nhtawm dai mare na masha ni hpe mung sat kau wu ai.

¹⁸Dai hpang Gidon mung Zeba yan Zalmuna hpe, “Tabora e nan sat kau ai masha ni gaw kaning san ai ni rai ma ta?,” ngu nna san yu wu ai. Shaloi shan gaw, “Shanhte gaw nang zawn re ai hkrai rai ma ai. Shanhte langai hte langai mung hkawhkam kasha zawn rai ma ai,” ngu nna htan ma ai.

¹⁹Gidon gaw, “Shanhte gaw nye a kahpu kanau ni rai ma ai; nye nu a kasha ni hkrai rai ma ai. Shanhte hpe nan n sat kau myit dai rai yang chyawm gaw nan hpe ngai sat kau na n rai, ngu nna ngai dagam shaka lu na nngai,” ngu nna tsun wu ai.

²⁰Shaloi shi gaw shi a kasha alat Yehta hpe, “Shawng sa nna shan hpe sat kau su!,” ngu wu ai. Rai ti mung dai ma mahtang grai naw kaji nga ai majaw nhtu pyi n shaw gwi nga ai.

²¹Dai hpang Zeba yan Zalmuna gaw Gidon hpe, “Nang nan rawt nna an hpe sat kau mi; wa-ngan hpe gaw wa-ngan n-gun hte she rai law,” ngu nna tsun ma ai. Gidon mung shan hpe sat kau nhtawm shan a gawla-uk du na mawn sumli rai ni hpe hpyu la wu ai.

²²Dai hpang Israela masha ni gaw Gidon hpe, “Midian masha ni a lata kaw na nang anhte hpe hkye la nit dai majaw nang hte na a amyu matu ni gaw shu mashi prat du hkra anhte a up hkang du tai nga manit ga law,” ngu nna tsun ma ai.

²³Gidon gaw, “Ngai mung, nye kasha mung nanhte hpe up hkang na ga ai n rai. Dai MADU mahtang nanhte hpe up hkang ai wa tai na ra ai,” ngu nna htan wu ai.

²⁴Rai ti mung shi chyawm gaw, “Nanhte hpe lam langai mi, ngai naw san yu made ga; nanhte la wa ai na lakan shagu, ngai hpe jaw na ngai hpyi nga nngai,” ngu nna matut tsun wu ai. (Midian masha ni gaw kaga nam mali hkan na masha amyu ni zawn ja lakan kai ma ai.)

²⁵Amyu masha ni mung, “Anhte kabu gara hte nang hpe dai ni jang jaw na ga ai,” ngu nna htan ma ai. Shanhte mung sumpan nba kahpyan da nhtawm la wa ai na lakan ni hpe de a ntsa e tawn da nga ma ai.

²⁶Gidon lu shen la ai aja na lakan ni gaw pawng mali shi daram rai nna Midian Hkawhkam ni mawn sumli ai shakya rai ni, kachyi ni hte shaba pu nsam rawng ai bu hpun palawng ni hte gawla-uk a du hta noi ai saidawng ni garai n lawm nga ai.

²⁷Gidon gaw aja arai hte hpara sumla galaw nhtawm shi a daidaw bu ga Ohpra mare e dai hpe tawn da wu ai. Israela masha ni gaw Karai Kasang hpe kau da nhtawm dai yang na hpara sumla hpe sa nawku ma ai. Dai gaw Gidon hte shi a dinghku masha ni a matu mahkam tai nga malu ai.

²⁸Dai rai nna Midian gaw Israela masha ni hpe sum mat ma ai majaw galoi n lu jahkrit shama mat masai. Gidon si mat ai aten du hkra dai mungdan gaw shaning mali shi ning tup ngwi pyaw sim sa nga ai.

²⁹Gidon gaw shi a nta de nhtang wa nna dai yang e wa nga nga wu ai.

³⁰Shi gaw num law nga ai majaw shadang sha sanit shi lu nga ai.

³¹Shi gaw Shehkem mare hta mung lashi num langai lu wu ai rai nna shi a matu shadang sha langai shangai ya wu ai. Gidon gaw shi hpe Abimelek ngu nna shamying wu ai.

³²Yoasha a kasha Gidon gaw aprat ugut gu nna si mat sai. Dai rai nna Abieza lakung lama a mare ngu na Ohpra na shi a kawa Yoasha a lup hta shi hpe makoi mayang da ma ai.

³³Gidon si mat ai hpang Israela amyu masha ni gaw Karai Kasang hpe bai n kam n sham ai hte Bala hpara ni hpe nawku mat ma ai. Shanhte mahtang Bala ga shaka hpe shanhte a hpara zawn shatai da mu ai rai nna,

³⁴shanhte hpe wang shinggrup da ai gumlau hpyen ni yawng a lata kaw na hkye hkrang la ai dai MADU shanhte a Karai Kasang hpe loi mi mung n daw jau mat ma ai.

³⁵Shanhte gaw Israela a matu mai kaja nna ngamu ngamai wa hkra shakut shaja ya sai Gidon a dinghku hpe chyeju n chye dum nga ma ai.