Read Jinghpaw Common Language Bible 2009 2 YAWHAN 1 Bible Online

2 YAWHAN 1 - Jinghpaw Common Language Bible 2009 bible

2 YAWHAN 1

¹Asak kaba sai ngai salang wa kaw nna, teng man ai hku ngai tsaw ra nga ai Karai Kasang e lata la hkrum ai Majan [1] hte shi kashu kasha ni hpang de ga shana dat nngai. Nang hpe ngai chyu sha n rai, teng man ai lam ni hpe chye chyang ai ni yawng mayawng kaja wa tsaw ra nga ma ai.

²Hpa majaw nga yang, dai teng man ai lam hta rawng nga nna anhte hte rau prat dingsa anga nga na ra ai majaw rai nga ai.

³Kawa Karai Kasang kaw nna mung, dai Kawa a Kasha Yesu Hkristu kaw nna mung, dai chyeju hte, matsan dum ai hte ngwi pyaw ai lam gaw teng man ai lam hpe chye nna shada da tsaw ra nga ai anhte hte rau anga nga u ga law.

⁴Na a kashu kasha ni nkau mi gaw, Kawa Karai Kasang anhte hpe hkang da mi ai hte maren, dai teng man ai lam hta e asak hkrung hkan sa nga ma ai hpe mu hkrup nngai majaw ngai ja ja kabu gara nga nngai.

⁵Dai re majaw tsaw ra ai Majan e, anhte shada da langai hte langai tsaw ra nga na matu ngai nang hpe hpyi lajin dat de ai. Ndai ya ngai ka dat ai lam gaw hkang da ai ga ningnan kaga mi n rai, shawng npawt kaw nna anhte lu la sagaw ai hkang da ai ga rai nga ai.

⁶Ya ngai tsun nga ai tsaw ra ai ngu ai gaw Karai Kasang a hkang da ai ga hpe madat mara hkan sa let asak hkrung ai lam hpe ngu ai rai nga ai. Shawng npawt kaw nna nanhte yawng na yu manit dai hkang da ai ga chyawm gaw, nanhte yawng tsaw ra ai hta asak hkrung na lam rai nga ai.

⁷Yesu Hkristu gaw masha a hkum shan hpe dagraw nna du sa ai hpe ndang kau ai hkalem ai masha law law wa mungkan ga shara shagu de pru sa mara ai. Shing re ai masha gaw masu hkalem ai hte Hkristu a hpyen rai nga ai.

⁸Anhte galaw da ai amu hpe nanhte n shamat kau myit dai sha nanhte a shabrai hpe hpring tsup hkra hkam la lu myit ga, tinang dai sadi nga mu.

⁹Hkristu a sharin shaga ai lam hta n nga ai, dai hpe tawt kau ai wa kadai rai ti mung, Karai Kasang hte n seng ai Karai kata ai wa rai nga ai. Dai sharin shaga ai lam hta e ahkan nga ai wa kadai rai ti mung, Kawa yan Kasha hte seng nga ai.

¹⁰Marai langai ngai nanhte kaw du sa nna dai sharin shaga ai ga hpe n lang a yang gaw, dai wa hpe nanhte a nta ni hta hkum jashawn la mu. Shi hpe, “Ngwi pyaw nga n ga law,” ngu nna pyi hkum tsun myit.

¹¹Hpa majaw nga yang, shing rai hkap shachyen ai wa kadai mung shi galaw ai n kaja ai lam ni hta lawm mat ai wa rai nga ai.

¹²Ngai nanhte hpang de ka dat na lam law law lu nngai, rai ti mung maisau hta laika tsi hte ka da mayu nngai n rai. Anhte yawng kabu gara ai lam hkum tsup hkra lu la na matu nanhte hpang de sa du nhtawm, n-gup aga hte tsun chyai lu na hpe mahtang ngai myit mada nga nngai.

¹³Karai Kasang e lata la hkrum ai na a tsaw ra ai Kana a kashu kasha ni [2] nang hpe shakram dat ma ai law.