Read Jinghpaw Common Language Bible 2009 3 YAWHAN 1 Bible Online

3 YAWHAN 1 - Jinghpaw Common Language Bible 2009 bible

3 YAWHAN 1

¹Asak kaba sai ngai Salang wa kaw nna nja nhpra hte teng man ai hku ngai tsaw ra nga ai Geu hpang de laika ka dat nngai.

²Nye a tsaw ra ai wa e, na a wenyi n-gun lagaw hkridun kaja nga lit dai hpe ngai chye nga nngai rai nna, nang lam shagu hta galu kaba gan ga nna, nang hkam kaja nga lu n ga, ngai akyu hpyi nngai.

³Nang galoi mung teng man ai lam hta hkan nang nga ndai hte maren, dai teng man ai lam hta nang gade gara hku sadi dung nga ai lam hpe Hkristan hpu nau ni nkau mi du sa wa nna tsun dan ma ai shaloi ngai ja ja kabu gara nga nngai.

⁴Nye a kashu kasha ni, dai teng man ai lam hta hkan sa asak hkrung nga ma ai lam na lu ai majaw ngai hpe kabu gara shangun dik ai hta kaga kabu hpa n nga mat sali ai.

⁵Nye a tsaw ra ai jinghku wa e, Hkristan hpu nau ni hpe shanhte chyasam manam naw rai nga ai ten kaw nna nang galaw daw ai amu nlang hte hta myit kup kangka rai nga ndai.

⁶Shanhte gaw na a tsaw ra ai lam hpe ndai kaw sa sakse hkam tsun kajai nga ma ai. Shanhte Karai Kasang a amu gun ai ni rai nga ma ai rai nna, shawng de bai matut hkawm sa wa lu na matu chyeju hte shanhte hpe naw karum dat mu, dai gaw Karai Kasang hpe sharawng awng shangun ai lam rai na re.

⁷Hpa majaw nga yang, shanhte gaw n kam n sham ai tara maigan ni kaw na karum ai lam n hkam la ai sha Hkristu a sasana magam bungli hta hkawm sa ai ni rai nga ma ai.

⁸Dai re ai majaw, dai teng man ai magam bungli hta shanhte hte mu gun shingdep shingtau tai lu u ga, anhte Hkristan ni gaw ndai masha ni hpe karum madi shadaw ra ga ai.

⁹Dai Hpung de ngai laika kadun langai mi ka dat se ai; rai ti mung shanhte a ningbaw ningla tai mayu ai Diotrihpi gaw ngai tsun dat ai lam hpe madat mara na ra ai n rai.

¹⁰Ngai sa du ai shaloi she, shi galaw kau sai lam shagu hpe tsun shadan dan na nngai. Shi gaw anhte hpe grai n shawp ai ga hte masu ai ga ni tsun nga ai. Dai hte sha n ga shi a matu n ram dum nna Hkristan hpu nau ni du sa wa ma yang, shi hkum nan n hkap hkalum la mu ai hta n ga, shanhte hpe hkap hkalum la mayu ai ni hpe mung shi pat hkum kau mu ai hte hpung kata na shaden shapraw kau mu ai!

¹¹Nye a tsaw ra ai jinghku wa e, n kaja ai lam hpe n re ai sha kaja ai lam hpe len la nga u. Kaja ai amu galaw ai wa gaw Karai Kasang hte seng nga ai; n kaja ai amu galaw ai wa chyawm gaw Karai Kasang hpe garai n mu n chye wu ai.

¹²Masha shagu gaw Demetri a kaja ai lam hpe sakse hkam nga ma ai. Shi a hkan sa galaw ai lam ni mung dai teng man ai mungga hte bung pre nga ai. Anhte mung sakse hkam jat ga ai rai nna, anhte a sakse hkam ai ga teng nga ai gaw nang chye nga ndai.

¹³Ngai nang hpe tsun na lam law law lu nngai: rai ti mung laika hte n ka mayu mat ni ai.

¹⁴Gade n na yang, nang hte hkrum lu na ngai myit mada nga nngai; shaloi she an lahkawng n-gup aga hte tsun chyai lu na ga ai.

¹⁵Nang ngwi pyaw nga n ga. Na a jinghku jingyu ni yawng nang hpe shakram dat ma ai. Nang mung anhte a jinghku jingyu ni yawng hpe nang nan hkan shakram ya rit law.