Read Jinghpaw Common Language Bible 2009 SHINGRAN 10 Bible Online

SHINGRAN 10 - Jinghpaw Common Language Bible 2009 bible

SHINGRAN 10

¹Dai hpang, n-gun ja ai lamu kasa kaga langai mi sumsing lamu de nna yu hkrat wa ai hpe ngai mu nngai. Shi gaw sumwi hpe bu hpun nna shi a baw grup yin n-goi latum jung nga ai, shi a myi man gaw jan hte bung nga ai, shi a lagaw wan shadaw zawn rai nga ai.

²Shi a lata hta hpaw nga ai laika shabawn kaji langai mi lang da wu ai. Shi a hkra lagaw hpe panglai ntsa e, pai lagaw hpe hkarang ntsa e kabye da nna,

³hkanghkyi shabam ai zawn, nsen kaba hte jahtau dat wu ai. Shi jahtau dat wu yang, mu ngoi ai mahku sanit hte nsen shapraw nna htan ma ai.

⁴Dai mu ngoi ai mahku a nsen shaga shapraw dat ai shaloi jang, ngai ka da na maw nngai. Rai ti mung sumsing lamu de nna, “Ndai mu ngoi ai nsen sanit tsun dan sai hpe makoi magap da u, hkum ka da et!,” nga nna tsun pru ai nsen ngai na nngai.

⁵Dai hpang, panglai hte hkarang ntsa e tsap nga ai, ngai mu ai lamu kasa gaw, shi a hkra lata lamu de sharawt ladawn nna,

⁶htani htana prat dingsa ahkrung nga nna, sumsing lamu, ginding aga, panglai hte dai hta e rawng marawng hpe hpan tawn da ai Karai Kasang a mying nsang hpe gang nna dagam wu ai gaw, “Ahkying ladaw hpe htingnai shana chyai nga ai lam naw nga sana n rai!

⁷Rai ti mung, sanit ngu na lamu kasa a pahtau dum dat ai shaloi, Karai Kasang gaw shi a shangun ma ni ngu ai myihtoi ni hpe tsun shana da sai hte maren, shi a sung htum ai shatawng shada ai lam hpe shadik shatup na ra ai,” nga nna tsun ai.

⁸Dai hpang, lamu de na ngai na yu ai nsen ngai hpe bai tsun ai gaw, “Panglai hte hkarang ntsa e tsap nga ai lamu kasa a hpaw nga ai laika hpe sa la su,” nga ai.

⁹Shaloi dai lamu kasa kaw ngai sa nna, “Dai laika shabawn kaji ngai hpe jaw rit,” ngu we ai. Shi gaw, “La nna sha kau u, dai gaw na a kan hta hka na ra ai, rai ti mung n-gup e gaw lagat ntsin zawn dwi na ra ai,” nga nna ngai hpe tsun ai.

¹⁰Shaloi dai laika shabawn kaji hpe ngai la nna sha dat we ai: dai gaw nye a n-gup hta lagat ntsin zawn dwi li ai; rai ti mung, dai hpe ngai ma-ut ngut jang, nye a kan hta hka mat li ai.

¹¹Dai hpang lamu kasa gaw, “Amyu baw law law, masha mungdan law law, hte hkawhkam law law a lam Karai Kasang a mungga kalang mi bai nang tsun lu na ndai,” nga nna ngai hpe tsun ai.