Read Jinghpaw Common Language Bible 2009 SHINGRAN 13 Bible Online

SHINGRAN 13 - Jinghpaw Common Language Bible 2009 bible

SHINGRAN 13

¹Shaloi panglai kaw na matse labye langai pru lung wa ai hpe ngai mu nngai. Shi hta nrung shi hte baw sanit tu nga ai; dai nrung ni langai hkrai a ntsa e janmau gup nna, baw ni langai hkrai a ntsa e Karai Kasang a arawng sadang hpe jahpoi asawng ai amying kap nga ai.

²Dai ngai mu ai matse labye gaw rawnggawk hte bung nna, shi a lagaw ni gaw tsap lagaw zawn, shi a n-gup hkanghkyi n-gup zawn rai nga ai. Baren numraw gaw shi a hpung dagu hte mung shi a tingnyang hpe mung, shi a kaba la ai ahkang aya hpe mung, dai matse labye a lata de ap ya wu ai.

³Matse labye a baw ni hta na langai mi gaw, si na daram nma kap ai zawn rai nga ai, rai ti mung dai nma gaw mai mat salu ai. Mungkan ting gaw dai matse labye a lam mau mahka ai hte shi a hpang hkan nang nga ma ai.

⁴Baren numraw gaw matse labye hpe shi a ahkang aya ap ya sai majaw, masha shagu gaw dai baren numraw hpe nawku ma ai. Shanhte dai matse labye hpe nawku ma ai hte, “Ndai matse labye hte kadai wa bung nga a ta? Shi hpe kadai wa shingjawng gasat lu na a ta?,” nga shajang ma ai.

⁵Dai matse labye gaw, shakawng gumrawng ai hte Karai Kasang hpe shatan nhkan ga tsun na mung, shata mali shi lahkawng tup up hkang na ahkang mung lu tawn da wu ai.

⁶Shi gaw Karai Kasang hte Madu a mying nsang hpe mung, Karai Kasang shanu nga ai sumsing lamu hpe mung, sumsing lamu kata e shanu nga ai ni yawng hpe mung shatan nhkan nga ai.

⁷Shi gaw Karai Kasang a masha ni hpe gasat nna dang kau na ahkang mung, mungdan shagu hta nga ai ga baw amyu shagu shaga ai masha amyu bawsang yawng hte a ntsa e up na ahkang hpe mung jaw da hkrum ai wa rai nga ai.

⁸Sat kau hkrum sai Sagu Kasha a asak laika hta, ginding aga garai n pra kaw nna amying ka da lawm sai mungkan masha nlang hte hta lai nna, mungkan ntsa e nga ai masha yawng gaw dai matse labye hpe nawku na mara ai.

⁹“Na tu ai wa gaw na la u ga!

¹⁰Rim la ai hkrum na wa gaw rim la ai teng teng hkrum na ra ai; nhtu hte sat ai wa mung, nhtu hte si na ra ai. Ndai lam a majaw, Karai Kasang a masha ni gaw hkam sharang ai hte makam masham rawng na mara ai.”

¹¹Dai hpang ga kata de na pru lung wa ai matse labye kaga langai mi hpe ngai mu nngai. Shi hta Sagu Kasha a nrung hte bung ai nrung lahkawng tu nna, baren numraw zawn ga shaga ai.

¹²Shi gaw shawng na matse labye a ahkang aya yawng mayawng hpe dai matse labye a man e jai lang nna, si na daram re ai nma mai mat ai shawng na matse labye hpe dinghta ga hte dai hta nga ai ni hpe nawku shangun mu ai.

¹³Dai lahkawng ngu na matse labye gaw, mauhpa lamik kumla kaba ni hpe madun dan nga ai. Masha law law a man e lamu de nna ga ntsa de wan jahkrat dat shangun nga ai.

¹⁴Shi gaw shawng na matse labye a man e madun dan na ahkang lu ai lamik kumla ni hpe madun nna ga ntsa e nga ai masha yawng hpe hkalem kau wu ai. Dai matse labye gaw, nhtu hkang nma hkrum ti mung n si ai sha bai mai mat ai matse labye hpe shagrau sha-a ai hku nna shi a hkrang sumla galaw shachyaw na matu mungkan masha ni hpe shangun da wu ai.

¹⁵Dai matse labye hkrang sumla ga shaga lu na matu mung, dai matse labye a hkrang sumla hpe n nawku ai ni nga manga hte hpe sat kau na matu mung, lahkawng ngu na matse labye gaw dai hkrang sumla hta nsoi nsa kawut bang ya na ahkang mung lu da wu ai.

¹⁶Dai matse labye gaw, shinggyim masha yawng mayawng kaji ai ni hte kaba ai ni, lu su ai hte matsan ai ni, mayam ni hte shanglawt ni hpe tinang a hkra lata ni hta shing n rai tinang a lahtan ni hta shi a masat dingsat hpe adip arip hku shakap shangun mu ai.

¹⁷Dai matse labye a mying shing n rai, dai mying a malai hti hkum masat dingsat n kap ai wa kadai mung, arai mari na hte dut na ahkang n lu ma ai.

¹⁸Ndai lam hte seng nna hpaji byeng-ya rawng ra nga ai. Zai byeng-ya rawng ai wa gaw dai matse labye a hti hkum a lachyum hpe sawn htai la lu nga ai, hpa majaw nga yang, dai hti hkum gaw masha langai mi a mying rai nga ai. Shi a hti hkum gaw 666 rai nga ai.