Read Jinghpaw Common Language Bible 2009 SHINGRAN 14 Bible Online

SHINGRAN 14 - Jinghpaw Common Language Bible 2009 bible

SHINGRAN 14

¹Dai hpang ngai yu dat yang, Ziun bum ntsa e dai Sagu Kasha tsap nga ai hpe ngai mu nngai. Shi a mying hte shi a Kawa a mying hpe shanhte a lahtan ni hta shakap da ai masha 144,000 hte gaw Sagu Kasha hte rau rai nga ma ai.

²Bai, sumsing lamu kata nna, hka rum ngoi kashaw ai nsen hte mu matut manoi htim yang na nsen zawn ngoi gunggang ai nsen hpe ngai na we ai. Dai nsen gaw, yu ngwi ninghkrin ni shanhte a tingse ni hpe dum dat ai shaloi ngoi pru wa ai mahku nsen hte bung nga ai.

³Dai masha 144,000 gaw, tingnyang man e mung, hkrung ai dusat mali hte salang ni a man e mung, tsap let mahkawn ga ningnan mahkawn mangoi nga ma ai. Ga ntsa na shinggyim masha amyu baw yawng hta na mari la hkrum sai masha 144,000 hta kaga, kadai mung dai mahkawn ga hpe n sharin la lu nga ai.

⁴Dai ni gaw numsha ni hte awu asin n rai yu ai lasha ni rai nga ma ai; shanhte gaw brang jet ni rai nga ma ai. Shanhte gaw Sagu Kasha sa ai shara shagu hkan hkan nang ma ai. Shanhte gaw shinggyim masha ni hta na hkye hkrang la hkrum sai ni rai nna Karai Kasang hte Sagu Kasha kaw shawng sak nawng da sai ni rai nga ma ai.

⁵Shanhte galoi mung masu magaw ai hku n chye tsun ma ai. Mara tsun na lam hpa n nga ai ni rai nga ma ai.

⁶Dai hpang sumsing hpatwat e pyen kayin nga ai lamu Kasa langai mi hpe ngai mu nngai. Shi gaw amyu baw shagu, baw lakung shagu, ga amyu shagu hte, masha mungdan shagu hpe tsun shana dan na htani htana a Kabu Gara Shiga hpe la sa wa ai.

⁷Dai lamu kasa gaw, “Shinggyim masha amyu baw shagu hpe tara dara na aten du ra ai. Dai majaw, Karai Kasang hpe hkrit hkungga mu! Shi a htani htana galu kaba ai hpung shingkang hpe shagrau sha-a mu! Sumsing lamu hte ginding aga, panglai hte hka hpawk ni hpe hpan tawn da ai wa hpe nawku nga mu!,” nga nna nsen kaba hte tsun nga ai.

⁸Bai, lahkawng ngu na lamu kasa langai mi gaw, shawng na lamu kasa a hpang hprut dan pru nna, “Babelon mare kaba kadawng daw mat sai! Kadawng daw mat sai! Dai mare gaw hpye ai amu hta myit kayut ai ngu ai nsa ja sabyi ntsin masha amyu baw shagu hpe lu shangun nu ai!,” nga nna tsun nga ai.

⁹Bai, masum ngu na lamu kasa gaw, shawng na lahkawng a hpang e dan pru nna, “Dai matse labye hte de a hkrang sumla hpe nawku nna, tinang a lahtan hta shing n rai, tinang a lata hta masat dingsat shakap la ai kadai mung,

¹⁰Karai Kasang a pawt sindawng kahtet ngu ai gawm hta hpring hkra ru bang tawn ai grai ja ai pawt bu ngu ai sabyi ntsin hpe lu lu na ra ai. Dai hta n ga, shi gaw chyoi pra ai lamu kasa ni a man e mung, dai Sagu Kasha a man e mung, wan hte kan kayau ai hta nni nkri zingri ai hkrum na ra ai.

¹¹Shanhte hpe nni nkri di zingri ai hta na wan hkut gaw, htani htana prat dingsa amawng lung nga ai. Dai matse labye hte shi a hkrang sumla hpe nawku ai ni hte, shi a mying a masat dingsat shakap hkam la ai ni yawng gaw, shani shana htingtsi hkyamsa ai lam lu la na ma ai n rai,” nga nna nsen kaba hte jahtau tsun ai.

¹²Karai Kasang a hkang da ai ga ni hpe hkan shatup nna, Hkristu hta kangka sadi dung ai ni ngu ai Karai Kasang a masha ni gaw, ndai lam hta hkam sharang ai lam nga ra nga ai.

¹³Dai hpang sumsing lamu kaw nna, “Ka da u: ya kaw nna Madu a magam bungli hpe gunhpai let si wa ai ni gaw a lu ma ai!,” nga ai nsen langai mi ngai na nngai. Wenyi mung, “Rai sa! Shanhte a amu bungli galaw shakut shaja ai kaw na hkring sa ai lam lu la na mara ai. Hpa majaw nga yang, shanhte galaw ai amu bungli a akyu gaw, shanhte kaw hkan nang nga ai,” nga nna tsun ai.

¹⁴Bai, ngai yu dat yang, sumwi ahpraw langai mi hpe ngai mu nngai. Dai sumwi ntsa e masha hte bung ai wa langai mi dung nga ai; shi a baw hta ja janmau gup nna, shi a lata hta dai ai nhkyau langai mi lang da wu ai.

¹⁵Dai hpang, lamu kasa kaga langai mi gaw, dai nawku htingnu kaw na pru nna, sumwi ntsa e dung nga ai wa hpe, “Ga ntsa e mam myin krawp wa sai; mam dan na aten du ra ai majaw, mam dan na matu na a nhkyau hpe lang nna dan la u!,” nga nna nsen kaba hte jahtau wu ai.

¹⁶Dai rai nna sumwi ntsa e dung nga ai wa gaw, ga ntsa de shi a nhkyau ningwat dat wu ai rai nna, mungkan ga na mam gaw dan ngut mat nga ai.

¹⁷Dai hpang lamu kasa kaga langai mi gaw, sumsing lamu na nawku htingnu kata de nna pru wa ai hpe ngai mu nngai. Shi mung dai ai nhkyau langai mi lang da wu ai.

¹⁸Dai hpang, wan hpe up madu ai lamu kasa kaga gaw, tawn hkungri de na pru nna, dai ai nhkyau lang ai lamu kasa hpe, “Na a dai ai nhkyau hpe la nna mungkan ga na sabyi si ni hpe dan la u, sabyi si ni myin nga sai!,” nga nna nsen kaba hte jahtau tsun ai.

¹⁹Dai rai nna, dai lamu kasa gaw ga ntsa de shi a nhkyau hpe ningwat dat nna sabyi ru kaw na sabyi si ni hpe dan shinggyin la nhtawm, Karai Kasang a pawt bu ai ngu ai sabyi htumbyen kaba hta ru bang da wu ai;

²⁰Sabyi si ni hpe mare shinggan e sabyi htumbyen hta kabye shup nna, dai hta na sai lwi pru wa ai gaw, galu de mai lahkawng tsa, sung de pe manga daram ganoi rai nga ai.