Read Jinghpaw Common Language Bible 2009 SHINGRAN 15 Bible Online

SHINGRAN 15 - Jinghpaw Common Language Bible 2009 bible

SHINGRAN 15

¹Dai hpang sumsing lamu hta e n chye tsun dan hkra galu kaba nna mauhpa re ai lamik kumla kaba langai mi hpe ngai mu nngai. Dai lamik kumla gaw, ana zinli sanit lang ai lamu kasa sanit rai nna, Karai Kasang a pawt bu ai hpe hpang jahtum shangut ai lachyum shapraw dan ai mung rai nga ai.

²Dai hpang wan hte kayau ai pat nawng zawn re ai arai langai mi hpe ngai mu nngai. Dai matse labye hte shi a hkrang sumla hpe mung, hti hkum hku mying masat da ai wa hpe mung, dang kau ai ni hpe mung, ngai mu nngai. Shanhte gaw Karai Kasang jaw ai tingse ni hpe lang let dai pat nawng makau e tsap nga ma ai.

³Shanhte gaw, Karai Kasang a shangun ma Mawshe a mahkawn ga hte, Sagu Kasha a mahkawn ga hpe mahkawn mangoi nga let, “Chyahtum chyalai n-gun atsam rawng ai Karai Kasang e, na a magam bungli ni gaw gade wa kaba nga ai hte gade wa mauhpa rai nga a hka! Ju majat prat janat na hkawhkam wa e, na a lam ni gaw gade wa ding hpring ai hte gade wa teng man nga a hka!

⁴Madu e, nang hpe n hkrit hkungga ai kadai wa nga lu na rai ta? Nang galu kaba nga ai hpe n yin la ai kadai nga lu na rai ta? Nang chyu sha chyoi pra nga ndai; nang galaw ai amu ni ding hpring nga ai lam yawng mu lu ma ai majaw, masha amyu baw shagu ni, na a man e, sa nawku na mara ai law!,” nga nna tsun ma ai.

⁵Dai hpang, sumsing lamu na sakse sum nga ai nawku htingnu hpaw nga ai hpe ngai mu nngai.

⁶Dai nawku htingnu kaw na ana zinli sanit lang ai lamu kasa sanit pru sa wa ma ai; shanhte gaw htoi tu san pra ai lachyit sumpan hpun palawng bu hpun nna, tinang a sinda e ja shingkyit ni kyit da ma ai.

⁷Bai, dai dusat amyu mali hta na langai mi gaw, htani htana prat dingsa ahkrung nga ai Karai Kasang a pawt sindawng kahtet ai hte hpring chyat re ai ja gawm sanit, dai lamu kasa sanit hte hpe jaw mu ai.

⁸Dai nawku htingnu gaw Karai Kasang a hpung shingkang hte shi a atsam majaw wan hkut hpring ing nna, dai lamu kasa sanit la sa ai ana zinli garai n htum htum gaw, dai nawku htingnu kata de kadai mung n shang lu ai.