Read Jinghpaw Common Language Bible 2009 SHINGRAN 17 Bible Online

SHINGRAN 17 - Jinghpaw Common Language Bible 2009 bible

SHINGRAN 17

¹Dai shaloi gawm sanit lang ai lamu kasa sanit hta langai mi gaw, ngai hpang de sa nna, “Sa rit, hka nu ni law law a makau e de da ai mare kaba ngu ai shawa num kaba hpe ari gara hku jaw na ra ai lam ngai nang hpe madun dan de ga:

²Ga ntsa na hkawhkam ni gaw shi hte hpye ai amu galaw nna, mungkan ga na masha ni gaw, shi a hpye ai amu ngu ai sabyi ntsin hte nang ma masai,” nga nna ngai hpe tsun ai.

³Shaloi Wenyi gaw ngai hpe woi nawng mat wa nna, dai lamu kasa gaw, ngai hpe nam mali de woi sa mat wa ai. Dai shara e baw sanit hte nrung shi tu nna Karai Kasang hpe matsa shatan ai mying hkrai pri ka da ai, hkyeng mang ai matse labye a ntsa e dung nga ai numsha langai mi hpe ngai mu nngai.

⁴Dai numsha gaw, hkyeng mang ai hte shaba pu nsam rawng ai bu hpun palawng bu hpun nna, hpu ging ai ja, lungseng, pale hte mawn sumli nga ai. Shi gaw shi a hpye ai amu a asi rai nga ai n san n seng matsat shabat lam hte hpring chyat re ai ja gawm, shi a lata hta lang da wu ai.

⁵Shi a lahtan ntsa e, “Ga ntsa na shawa num ni yawng hte n hkru n kaja lam dam lam yit ai ni yawng a kanu, Galu Kaba ai Babelon mare,” nga nna makoi magap ai hte sung htum ai lachyum rawng ai mying langai mi ka da nga ai.

⁶Bai, dai numsha gaw Karai Kasang a masha ni a asai hpe mung, Madu Yesu hta sadi dung ai majaw sat kau hkrum ai ni a asai hpe mung, lu nna nang bam taw nga ai hpe, ngai mu nngai. Shi hpe mu yang, kaja wa dik hkra mau mahka mat nngai.

⁷Dai rai nna, dai lamu kasa gaw, “Hpa majaw nang mau mahka nga n ta? Dai numsha a makoi magap ai hte sung htum ai lachyum hpe mung, baw sanit, nrung shi tu ai matse labye a makoi magap ai hte sung htum ai lachyum hpe mung, ngai nang hpe tsun dan de ga.

⁸Nang mu ai matse labye gaw, moi shawng de asak hkrung nna nga yu sai rai tim ya asak n hkrung sai. Shi gaw dai sung htum ai nhkun kaw nna lung wa magang ra ai rai nna, jahten kau hkrum na shara de sa wa na ra ai. Ginding aga nnan lat kaw nna tinang a mying ni hpe asak laika hta n ka shalawm da ai, ga ntsa e nga ai masha ni gaw, dai matse labye hpe mu ai hte yawng mayawng mau mahka na mara ai. Shi gaw shawng de kalang mi asak hkrung nga yu sai, ya asak n hkrung sai, rai ti mung hpang e kalang mi bai asak hkrung pru wa na ra ai.

⁹“Ndai lam hte seng nna hpaji byeng-ya hte machye machyang rawng nga ai. Baw sanit gaw, dai numsha dung ai bum sanit rai nga ai. Shanhte gaw hkawhkam sanit mung rai nga ma ai.

¹⁰Hkawhkam manga gaw hkrat mat masai; langai mi gaw naw up nga ai; kaga langai mi gaw garai n du sa ai; shi du sa ai shaloi jahkring mi sha shi up nga lu na ra ai.

¹¹Shawng de kalang mi asak hkrung nga yu nna ya n hkrung sai matse labye gaw matsat ngu na hkawhkam wa rai nga ai, rai ti mung dai hkawhkam sanit hta lawm nga ai rai nna, shi mung hten byak si mat ai de sa wa na ra ai.

¹²“Nang mu ai nrung shi gaw, hkawhkam ahkang aya garai n hkam la ai hkawhkam shi rai nga ma ai. Rai ti mung, dai matse labye hte rau hkying hkum mi hpra hkawhkam hku up na ahkang aya jaw da ai hkrum na mara ai.

¹³Bai hkawhkam ni marai shi hta yaw shada ai lam langai sha rawng nga ai, rai nna, dai matse labye hpe shanhte a n-gun hte ahkang aya ap ya ma ai.

¹⁴Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.

¹⁵Bai, lamu kasa gaw, “Nang mu ai shawa num dung nga ai hka nu ni gaw, masha mungdan ni, shawa masha wunawng wuwa ni, amyu baw ni hte, ga amyu myi shaga ai amyu ni, rai nga ma ai.

¹⁶Bai, nang mu ai nrung shi hte dai matse labye gaw, dai shawa num hpe n ju n dawng na mara ai rai nna, shanhte gaw shawa num kaw na shi lu malu sharun la kau nna singgu krin shatai na maru ai. Shi a shan hpe sha nna wan hte nat kau na mara ai.

¹⁷Hpa majaw nga yang, shanhte gaw Karai Kasang a mungga dik wa ai nhtoi du hkra, shanhte up hkang na ahkang aya, dai matse labye hpe myit hkrum ai hte ap ya mu ga nga, Karai Kasang gaw shanhte a kraw lawang hta shi a yaw shada ai lam hkan galaw na myit bang ya mu ai.

¹⁸“Nang mu ai numsha gaw, mungkan hkawhkam ni hpe up ai mare kaba rai nga ai,” nga nna ngai hpe tsun ai.