Read Jinghpaw Common Language Bible 2009 SHINGRAN 21 Bible Online

SHINGRAN 21 - Jinghpaw Common Language Bible 2009 bible

SHINGRAN 21

¹Dai hpang, sumsing lamu ningnan hte ginding aga ningnan hpe ngai mu nngai, Shawng na lamu hte shawng na aga gaw hkoi mat wa sai. Panglai mung dai kaw na n nga mat sai.

²Shaloi Chyoi Pra ai Mare ngu ai Yerusalem mare ningnan gaw, la ningnan a matu mawn sumli da ai num ningnan zawn, lajang shachyip ngut nna, Karai Kasang shanu nga ai sumsing lamu de nna yu hkrat wa ai hpe, ngai mu nngai.

³Bai ngai gaw, dai tingnyang kaw na shaga pru ai nsen kaba langai mi na nngai. Dai nsen gaw, “Ya Karai Kasang a sum nta gaw shinggyim masha ni hte rau rai nga ai. Shi shanhte hte rau hpawng de nga na rai nna, shanhte gaw shi a amyu masha ni tai na mara ai. Karai Kasang gaw, shi hkum nan shanhte hte rau nga nga na ra ai rai nna, shi gaw shanhte a Karai Kasang tai na ra ai.

⁴Shi gaw shanhte a myi hta na myi prwi pru mapru yawng katsut kau ya na ra ai: htawm hpang de si hkrung si htan ngu ai n nga lu na sai; sharung shayawt, hkrap ngu hkrap ngoi ai hte machyi makaw, hki si ba si ai mung n nga lu na sai. Shawng na byin ga ai lam dingsa nga manga hte gaw hkoi mat wa sai,” nga nna tsun ai.

⁵Dai hpang, tingnyang hta dung nga ai wa gaw, “Yu u, ya aten hta arai yawng mayawng hpe ngai ningnan bai gaw da nngai,” nga nna tsun ai. Bai dai Madu gaw, “Ndai ka da u, hpa majaw nga yang, ndai ga ni gaw teng man ai ga, kam lu ai ga rai nga ai,” nga nna tsun ai.

⁶Dai hta kaga shi gaw, Amu ngut sai! Ngai gaw Alhpa hte Omega, npawt nhpang mung, hpang jahtum mung, rai nga nngai, Hpang gara ai wa kadai hpe mung, dai asak hka hpawk kaw na ntsin hpe manu jahpu n jaw ai sha lu lu na ahkang ngai jaw na we ai.

⁷Awng padang lu ai wa gaw, ndai ga sadi hte maren hkam la lu na ra ai rai nna, ngai gaw shi a Karai Kasang tai na hte, shi gaw nye a kasha tai na ra ai.

⁸Rai ti mung, hkrit ai myit rawng ai ni, n kam n sham nna sadi n dung ai ni, n hkru n kaja matsat shabat re ai ni, masha sat ai ni, hpye ai amu galaw ai ni, mandan lakle galaw ai ni, sumla nawku ai ni hte, masu magaw ga tsun ai ni yawng hte gaw, wan hte kan grung ai nawng hta ari hkrum lu na mara ai: dai gaw lahkawng lang na si ai lam rai nga ai, nga nna ngai hpe tsun ai.

⁹Shaloi, hpang jahtum na ari zinli ni hte hpring chyat re ai gawm lang ai lamu kasa sanit hta na langai mi ngai kaw sa du nna, “Sa rit, dai Sagu Kasha a madu jan ngu ai num ningnan, ngai nang hpe madun dan de ga,” nga nna ngai hpe tsun ai.

¹⁰Bai, dai Wenyi gaw ngai hpe woi nawng mat wa ai hte, dai lamu kasa gaw, ngai hpe grai tsaw ai bum pungding de woi du nna, Karai Kasang shanu nga ai sumsing lamu de nna yu hkrat wa ai Chyoi Pra ai Yerusalem Mare ngai hpe madun nngai.

¹¹Dai mare gaw Karai Kasang a hpung shingkang hte htoi tu nga ai. Dai mare a htoi tu ala ai gaw, pat zawn san tsawm nna, manu dan ai nagahtoi lungseng hte bung nga ai.

¹²Dai mare hta galu kaba nna tsaw la ai bunghku hte chyinghka shi lahkawng hpaw nga ai rai nna, dai chyinghka ni hpe lamu kasa shi lahkawng sin nga ma ai. Dai chyinghka ni a ntsa e, Israela amyu shi lahkawng ni a mying ni hpe ka kap da nga ai.

¹³Sinpraw maga de chyinghka masum, dingda maga de chyinghka masum, dingdung maga de chyinghka masum, sinna maga de chyinghka masum hpaw nga ai.

¹⁴Dai mare a bunghku hpe npawt nhpang nlung shi lahkawng a ntsa e gaw da nna, dai ni a ntsa e Sagu Kasha a kasa ni shi lahkawng a mying shingteng ni hpe ka kap da nga ai.

¹⁵Ngai hte ga shaga ai lamu kasa a lata hta, mare hpe mung, de a chyinghka lam ni hpe mung, de a bunghku ni hpe mung, shadawn na matu ja ningren langai mi lang da nga ai.

¹⁶Dai mare gaw jut mali rai nga nna, de a dingdung maga hte dingda maga maren sha rai nga ai. Lamu kasa gaw shadawn ningren hte dai mare hpe shadawn wu yang, dam de, galu de, tsaw de mai hkying mi manga tsa rai nga ai.

¹⁷Bai, dai bunghku hpe mung shadawn wu yang, masha a shadawn ai hte bung ai, lamu kasa a shadawn ai lam gaw pe 216 tsaw nga ai.

¹⁸Dai mare a bunghku hpe nagahtoi lungseng hte galaw da nga ai; dai mare hpe gaw pat zawn san tsawm ai ja jet hte galaw da nga ai.

¹⁹Dai mare a bunghku npawt nhpang nlung ni hpe hpu ging ai lungseng amyu myu hte mawn da nga ai. Shawng na npawt nhpang nlung gaw nagahtoi lungseng, lahkawng ngu na gaw nila, masum ngu na gaw mahoya, mali ngu na gaw mya,

²⁰manga ngu na gaw chyawng, kru ngu na gaw patamya, sanit ngu na gaw seng mut, matsat ngu na gaw myek-yoi, jahku ngu na gaw utahpaya, shi ngu na gaw Mahoya tsit, shi langai ngu na wakintu, shi lahkawng ngu na htitun nila ni rai nga ma ai.

²¹Dai mare chyinghka shi lahkawng mung pale shi lahkawng rai nga ai; mare chyinghka langai hte langai pale langai ngai rai nga ai. Dai mare nmaw lam gaw pat zawn san tsawm ai ja jet rai nga ai.

²²Dai mare kata e nawku htingnu ngai n mu nngai, hpa majaw nga yang, Chyahtum Chyalai n-gun atsam rawng ai Madu Karai Kasang hte Sagu Kasha gaw, dai mare a nawku htingnu rai nga ai.

²³Dai mare hpe jahtoi ya na matu jan, shata mung n ra nga ai. Hpa majaw nga yang, Karai Kasang a hpung shingkang gaw dai mare hpe jahtoi ya nna, Sagu Kasha gaw de a pyengdin rai nga ai.

²⁴Mungkan ga a amyu masha ni dai mare a nhtoi hte hkawm sa lu na mara ai, ga ntsa na hkawhkam ni mung, tinang a sut gan ngamu ngamai ai hpe dai mare de la jashawn na maru ai.

²⁵Dai mare chyinghka ni hpe shani tup hpaw malang da na ra ai. Shanhte hpe galoi mung la da na n rai, hpa majaw nga yang, dai mare hta shana ngu ai n nga ai.

²⁶Masha amyu baw ni a hpung shingkang arawng sadang hte sut su ngamu ngamai ai lam ni hpe dai mare de jashawn bang na maru ai.

²⁷Rai ti mung, awu asin re ai hpa mung dai mare de shang lu na n rai. Matsat shabat awu asin amu galaw ai wa, masu magaw lam hkan ai wa mung dai mare hta galoi mung shang lu na n rai. Sagu Kasha a asak laika hta amying ka lawm ai ni chyu sha dai mare hta shang lu na mara ai.