Read Jinghpaw Common Language Bible 2009 SHINGRAN 8 Bible Online

SHINGRAN 8 - Jinghpaw Common Language Bible 2009 bible

SHINGRAN 8

¹Bai, sanit ngu na dazik hpe Sagu Kasha hpaw dat wu yang, sumsing lamu e hkying hkum chyen mi daram atsin sha rai nga ai.

²Shaloi Karai Kasang a man e tsap nga ai lamu kasa sanit hpe ngai mu nngai; shanhte hpe pahtau sanit ya mu ai.

³Bai manam pyaw ai baw nat ai ja n-gawt lang ai lamu kasa kaga gaw, tawn hkungri makau e sa tsap nga ai. Dai tingnyang man e nga ai aja hkungri ntsa e, Karai Kasang a masha ni yawng hte a akyu hpyi ai ga hte rau nawng jau u ga nga, manam pyaw ai baw law law dai wa hpe ya wu ai.

⁴Manam pyaw ai baw nat nawng ai wan hkut gaw Karai Kasang a man e tsap nga ai lamu kasa a lata na, Karai Kasang a masha ni a akyu hpyi ai ga hte rau, mawng lung wa ai.

⁵Dai hpang lamu kasa gaw, dai n-gawt hpe la nna, tawn hkungri kaw na wan bang jahpring la ngut jang, mungkan ga ntsa de dai hpe kabai jahkrat dat wu ai: shaloi mu ngoi ai, wu kadu ai nsen, myi hprap gala ai hte nnang nawn byin pru wa ai.

⁶Shaloi pahtau sanit lang da ai lamu kasa sanit gaw, pahtau dum na hkyen nga ma ai.

⁷Ya, shawng na lamu kasa gaw shi a pahtau dum dat wu ai: Shaloi asai hte gayau ai sin hte wan ga ntsa de htu ru hkrat wa ai; dinghta ga htam masum hta na htam mi hkru mat wa ai; nam maling hpun ni mung, tsit lali ai tsingdu yawng hte mung, htam masum hta na htam mi hkru mat wa ai.

⁸Bai, lahkawng ngu na lamu kasa gaw shi a pahtau dum dat wu ai. Shaloi, wan hkru grung nga ai zawn san ai bum kaba langai mi hpe panglai de jahkrat dat wu ai. Dai rai nna panglai htam masum hta na htam mi, asai tai mat wa ai.

⁹Panglai na hkrung ai baw ni htam masum na htam mi mung si mat wa ma ai; sanghpaw li ni mung, htam masum na htam mi grawp mat wa ma ai.

¹⁰Bai, masum ngu na lamu kasa gaw shi a pahtau dum dat wu ai: Shaloi, shanan zawn tu grung nga ai shagan kaba langai mi lamu de na di hkrat wa nna, hka nu ni htam masum na htam mi hte hka hpawk hka npun ni a ntsa e hkrat taw nga ai.

¹¹(Dai shagan a mying gaw, “Hka ai” ngu ai rai nga ai; hka htam masum hta na htam mi hka mat ai rai nna, dai hka ai hka lu ai masha ni law law wa si mat wa ma ai.

¹²Bai, mali ngu na lamu kasa gaw shi a pahtau dum dat wu ai. Shaloi, jan a htam masum na htam mi, shagan ni htam masum a htam mi grawp hten nip mat wa nna, shanhte a nhtoi gaw htam masum na htam mi sin mak mat wa ai hte, shani a htam masum na htam mi, shana a htam masum na htam mi nhtoi n lu mat ai.

¹³Dai hpang, ngai yu dat yang, lamu a ka-ang hpatwat e pyen yawn nga ai galang langai mi gaw, “Hkrit hpa dingnye! Hkrit hpa dingnye! Kaga lamu kasa masum dum dat na ra ai pahtau nsen ngoi pru ai shaloi, dinghta ga e nga ai ni yawng a matu, gade hkrithpa dingnye rai na rai hka!,” nga nna nsen kaba hte jahtau nga ai gaw, ngai na nngai.