Read Jinghpaw Common Language Bible 2009 RUHTA 1 Bible Online

RUHTA 1 - Jinghpaw Common Language Bible 2009 bible

RUHTA 1

¹Israela hkawhkam garai n paw pru ai shawng na lai sai aten ni hta, dai mungdan hta hku hku yu nga sai. Dai majaw, Yuda mung Betlehem mare hta nga ai Ehprat amyu lakying na Elimelek mying ai masha wa gaw shi a madu jan Naomi hte shan a kasha yan rai nga ai Malon hte Hkilion ni hte rau Moba mung e ladaw langai sa nga na matu pru sa wa ma ai. Dai yang e, shanhte nga nga ma yang,

³Elimelek si mat nna, Naomi hte shi a shadang sha lahkawng htawng da wu ai;

⁴dai shadang sha yan mung Moba num ni rai nga ai Orpa hte Ruhta yan hpe la ma ai. Shi ning daram na mat wa ai hpang,

⁵Malon hte Hkilion yan mung si mat ma ai, Naomi gaw madu wa, kasha ni n nga mat ai hte shi chyu sha ngam nga ai.

⁶Aten ladaw mi na ai hpang, dai MADU gaw shi a amyu masha ni hpe nsi naisi kaja kat shangun ai hte shaman ya ai shiga hpe Naomi na wu ai shaloi, shi a kanam yan hte rau Moba mung kaw nna rawt pru mat wa na shajin da wu ai.

⁷Shanhte gaw Yuda mung de nhtang wa na matu rau pru sa wa ma tim,

⁸shi gaw shan hpe hkrun lam e, “Nan a dum nta de bai nhtang wa masu, nan a kanu ni hte rau wa nga mu. Nan gaw si mat ai yan hpe mung, ngai hpe mung galaw jaw manit dai hte maren, dai MADU gaw nan hpe chyeju htang ya nga u ga.

⁹Nan a matu dinghku bai de lu nna, nan a madu wa ni hte rau nga lu u ga. Dai MADU gaw dai lam shabyin ya na ra ai,” ngu nna tsun wu ai. Dai rai nna Naomi gaw shan hpe pup shakram wu ai. Rai ti mung, shanhte gaw hkrap hpang wa ai hte,

¹⁰shan gaw shi hpe, “N rai law, an mung nang hte rau na a amyu masha ni hpang de hkan wa na ga ai,” ngu nna tsun ma ai.

¹¹Naomi gaw, “Ngai nam yan e, nan nhtang wa lu na rai myit dai,” ngu nna htan wu ai. Shi gaw, “Nan ngai kaw hpa majaw hkan nang mayu myit ni? Nan a madu wa tai ya na matu, ngai kasha bai lu ya lu na re ngu nan myit lu nga myit ni?

¹²Dum nta de nhtang wa masu, ngai mung dinghku kalang bai de na matu asak prat lai mat ni ai. Myit mada shara naw nga ai hku ngai myit la nna, dai na jang num wa nna shadang sha ni shaprat hkra rai ti mung

¹³shanhte kaba wa ai aten du hkra, nan la lu na myit ni? Kaga ni kaw num n wa hkra, dai ni hpe myit mada nga lu na rai myit ni? N rai na re, ngai nam yan e, dai lam hku n mai byin ai mung nan chye nga myit dai. Dai MADU gaw ngai hpe ari jaw ai hte ngai nan a matu grai myit yu machyi nga nngai,” ngu nna tsun wu ai.

¹⁴Shing nga jang, shanhte gaw kalang bai ja ja hkrap hpang wa ma ai. Dai hpang Orpa gaw shi a kamoi hpe pup nhtawm nta de bai nhtang mat wa wu ai; rai ti mung Ruhta chyawm gaw shi hta a manoi nga ai.

¹⁵Dai rai nna, Naomi gaw shi hpe, “Ruhta e, na a kana pyi shi a amyu hte shi a hpara hpang de bai wa sai. Nang mung shi hte rau nta de nhtang wa su,” ngu nna tsun wu ai.

¹⁶Rai ti mung, Ruhta gaw, “Nang hte hka na, ngai hpe hkum shadut et! Nang hte rau tut tut hkawm sa lu n ga. Nang du ai shara shagu hkan ngai du nang na nngai; nang nga ai shara shagu hkan, ngai mung hkan nga na nngai. Na a amyu gaw nye a amyu, na a Karai Kasang gaw nye a Karai Kasang rai nga na ra ai.

¹⁷Nang si ai shara hta ngai si na nngai, dai yang e ngai mung makoi mayang hkam na nngai. Nang hte ngai si hka ai sha n rai yang, kaga lam hku nna hka wa ai rai yang mung dai MADU a sawng htum ai ari nye a ntsa de du wa u ga!,” ngu nna htan wu ai.

¹⁸Ruhta mahtang shi hte rau hkan na matu myit daw dan ai hpe Naomi mu wu ai shaloi, shi hpa mung n tsun ai atsin sha nga kau wu ai.

¹⁹Shan gaw hkawm sa wa nna, Betlehem de du shang wa ma ai. Shan mare de du shang wa ai shaloi, mare ting gaw shan a majaw yu kajawng ma ai hte dai mare na numsha ni gaw, “Ndai Naomi teng teng rai nga a ni?,” ngu nna shada da san shajang nga ma ai.

²⁰Shi gaw, “Ngai hpe Naomi ngu nna hkum shaga myit; Mara [1] ngu nna shaga mi, hpa majaw nga yang, Chyahtum Chyalai N-gun Rawng Ai Karai Kasang gaw nye a asak hkrun lam hpe ahkup ahka di ya ai majaw rai nga ai.

²¹Ngai ndai shara kaw na pru wa yang, sut gan n taw n tsang lu nngai, rai ti mung dai MADU gaw ngai hpe kaman hte bai woi nhtang wa ni ai. Chyahtum Chyalai N-gun rawng dai MADU gaw ngai hpe daw dan kau ai hte ru yak tsin-yam jaw mi yang, hpa majaw ngai hpe Naomi ngu nna shaga nga myit ni?,” ngu nna htan wu ai.

²²Naomi gaw shi a Moba kanam Ruhta hte rau Moba mung kaw nna nhtang wa ma ai. Shan Betlehem mare de du shang wa ai shaloi, muk-yaw mam dan hpang wa ai aten rai nga ai.