Read Jinghpaw Common Language Bible 2009 RUHTA 2 Bible Online

RUHTA 2 - Jinghpaw Common Language Bible 2009 bible

RUHTA 2

¹Naomi gaw Bua mying ai jinghku langai lu ai, shi gaw Naomi a madu wa Elimelek a amyu dap kaw na, sut su ai hte daru magam hpring nga ai wa rai nga ai.

²Lani mi na nhtoi hta, Ruhta gaw Naomi hpe, “Mam dan ai ni ngam da ai nlim hkan gut la na matu ngai yi de sa n-ga. Ngai hpe ahkang jaw na masha sa mu tam na kam nngai,” ngu nna tsun wu ai. Naomi gaw, “Ngai nam e, sa magang su,” ngu nna htan wu ai.

³Dai rai nna, Ruhta gaw yi de sa nhtawm, mam dan ai ni a hpang e shanhte ngam da ai nlim ni hpe hkan hta, gut la lu nga ai. Shi gaw n dum shami Bua a yi de sa ang nga wu ai.

⁴Loi hkring mi rai jang, Bua shi nan Betlehem mare kaw nna du sa wa nhtawm mam dan ai masha ni hpe, “Dai MADU gaw nanhte hte rau anga nga u ga law!,” ngu nna shakram let tsun wu ai. Shanhte gaw, “Dai MADU nang hpe shaman ya nga u ga!,” ngu nna htan ma ai.

⁵Bua gaw mam dan hpa-awn wa hpe, “Dai numsha ma gaw kadai rai nga a ni?,” ngu nna san wu ai.

⁶Hpa-awn wa gaw, “Shi gaw Naomi hte rau Moba mung kaw nna hkan nang wa ai maigan numsha langai mi rai nga ai.

⁷Shi gaw mam dan ai ni a hpang e hkan nang nna, nlim hkan gut la lu u ga, nga nna ngai kaw ahkang hpyi ai hte dai hpawt kaw nna shang gut nu ai, ya aten mi gan hkring sa la na matu shingbyi nga wu ai,” ngu nna htan wu ai.

⁸Dai hpang, Bua gaw Ruhta hpe, “Ngai nang hpe hpaji loi mi jaw de ga; ndai yi hta lai nna kaga shara hkan hkum hkan gut sa; ndai yi hta amu galaw ai numsha ni hte rau galaw u;

⁹shanhte dan wa ai yi ngam ni hpe yu nna, shanhte a hpang hkan u. Nye a lasha ma ni nang hpe n sharu shatsang na matu ngai hkang da se ai. Nang hpang gara wa ai shaloi, shanhte ja jahpring da ai hka yam kaw na ntsin lu u,” ngu nna matsun da wu ai.

¹⁰Ruhta gaw shi a myi man hpe ga de gum dagup da nna Bua hpe, “Nang ngai hpe hpa majaw dai daram gawn yu nga n ta? Nang gaw maigan masha wa hpe hpa majaw grai matsan yu dum nga n ni?,” ngu nna tsun wu ai.

¹¹Bua chyawm gaw, “Na a madu wa si mat ai hpang, na a kamoi hpe galaw jaw ai lam magup mung ngai na ni ai. Na a nnu yan nwa hte na a mungdan hpe kau da nna, shawng de nang galoi mung n chye n hkau ai masha ni a lapran e nang sa du nga ai lam ngai chye nngai.

¹²Nang galaw ai amu a matu dai MADU gaw nang hpe shabrai jaw ya u ga. Shingbyi shingwung a matu nang du sa ndai hte maren, Israela a MADU Karai Kasang kaw nna hkum tsup ai chyeju kumhpa nang hkam la lu u ga law!,” ngu nna htan wu ai.

¹³Ruhta gaw, “Madu e, nang gaw ngai hpe grai wa yu matsan dum chye ai wa rai nga ndai. Ngai gaw na a shangun ma langai mi a madang daram n rai nga tim pyi gaw ngai hpe ga ngwi ga pyaw shaga nna kabu gara hkam sha shangun nga ndai,” ngu nna bai htan wu ai.

¹⁴Shat sha ai aten hta Bua gaw Ruhta hpe, “Wa rit, ndai muk hkyep hpe la nna ntsin hkri hta dai hpe dip galu u,” ngu nna tsun wu ai. Shing rai, mam dan ai ni hte rau shi wa dung nga ai; Bua mung shi hpang de mam nmyi nkau mi jaw shalai dat ya wu ai. Shi sha hkru nna lusha nkau mi naw ngam hkra pyi rai nga ai.

¹⁵Mam nlim gut na matu pru sa mat wa yang, Bua gaw shi a mam dan ai ni hpe, “Hkauling shabawn hkan na pyi shi gut la lu u ga, shi hpe hpa mung hkum hkan tsun myit. Dai hta n-ga, hkauling shabawn ni kaw nna mam nkau mi shaw la shangun mu; shi gut la lu na matu ngam da ya mu,” ngu nna hkang dat wu ai.

¹⁷Dai rai nna, Ruhta gaw shana de du hkra dai yi hta gut la ai hte dai ni hpe dup la ai shaloi pawng hkun manga daram lu la nga ai.

¹⁸Shi gaw lu dup la ai mam hpe gun nna, mare de bai wa nhtawm shi a kamoi hpe shi lu la wa ai mam madun wu ai; shi sha hkru nna naw ngam ai lusha hpe mung wa jaw wu ai.

¹⁹Naomi gaw shi hpe, “Dai ni, nang ndai mam ni yawng hpe gara shara kaw na gut wa n ta? Kade a yi hta sa gut la n ta? Nang hpe myit lawm ai masha wa hpe Karai Kasang shaman ya u ga law!,” ngu nna tsun wu ai. Dai rai nna Ruhta gaw dai ni ngai sa gut la ai yi madu gaw Bua mying ai masha wa a yi na rai nga ai ngu, Naomi hpe tsun dan wu ai.

²⁰Naomi gaw, “Dai MADU gaw Bua hpe shaman ya nga u ga! Hkrung nga ai ni hte si mat sai ni hta dai MADU shi a ga shaka tut nawng agrin nga u ga,” ngu nna marawn tsun wu ai. Shi gaw matut nna, “Dai wa gaw anhte hte grau ni htep ai jinghku, anhte hpe yu lanu lahku ang ai lit nga ai masha wa mung rai nga ai,” ngu nna tsun dan wu ai.

²¹Dai hpang Ruhta gaw, “Yawng hta grau kaja htum ai gaw shanhte mam dan tawn ai aten du hkra, shi a mam dan masha ni hte rau, mam gut la na, shi ngai hpe tsun da ni ai,” ngu nna tsun dan wu ai.

²²Naomi mung Ruhta hpe, “Rai sa, ngai nam e, Bua a yi hta numsha manang ni hte rau amu galaw na, na a matu dai lam grau mai kaja nga ai. Nang lama kaga ni a yi de sa ai rai yang, sharu shatsang ai mung nang hkrum na ndai,” ngu nna tsun wu ai.

²³Dai rai nna, Ruhta gaw muk-yaw mam hte hkaulan mam dan tawn ai aten du hkra rau amu galaw let, mam nlim gut nna kamoi hte matut nga nga ai.