Read Jinghpaw Common Language Bible 2009 RUHTA 4 Bible Online

RUHTA 4 - Jinghpaw Common Language Bible 2009 bible

RUHTA 4

¹Bua gaw mare chyinghka makau e nga ai zup hpawng ginra de sa nna dai shara hta dung nga ai. Dai hpang Bua tsun dan yu sai Elimelek a dinghku chyen na hpu nau wa lai wa nga yang, Bua gaw shi hpe shaga nna, “Nye a jinghku wa e ndai shara de kayin shang wa nna shang dung rit,” ngu nna tsun lajin wu ai. Dai rai nna shi gaw dai shara de sa wa nna sa dung nga ai.

²Dai hpang, Bua gaw dai mare a ningbaw marai shi hpe shaga la nna dai shara hta dung na matu hpyi lajin wu ai. Shanhte dung ai shaloi,

³shi gaw shi a jinghku wa hpe, “Moba mung na bai wa ai Naomi gaw ya anhte a amyu dap chyen rai nga ai Elimelek madu tawn da ai yi dut mayu nga ai,

⁴ngai myit yu ai hku nga yang, ndai lam nang chye na da ra na lit dai. Nang dai yi, ra sharawng ai rai yang, ndai shara hta dung nga ai masha kaba ni a man e dai hpe mari la u; rai ti mung dai yi hpe nang ra sharawng ai lam n nga jang mung dai hku rai nu ga; hpa majaw nga yang, dai hpe shawng mari la na ahkaw ahkang nang lu nga ndai. Dai hpang she ngai hta ang wa na re ai,” ngu nna tsun wu ai. Dai masha wa mung, “Dai hpe ngai mari la na nngai,” ngu nna tsun wu ai.

⁵Bua gaw, “Grai kaja sai, nang lama rai nna Naomi kaw na yi dai hpe mari shaw la ai shaloi, Moba masha gaida Ruhta hpe mung nang mari la ra nga ndai. Dai yi gaw n nga mat wa sai masha wa a dinghku hta ngam nga na ra ai,” ngu nna tsun wu ai.

⁶Dai masha wa gaw, “Ndai amu hta yi mari la na nye a ahkaw ahkang hpe ngai bai dawm kau na we ai, hpa majaw nga yang, dai hpe nye a kashu kasha ni n hkam la lu na lachyum pru wa ai majaw rai nga ai. Nang mahtang dai hpe shaw la u; ngai n mari na ni ai,” ngu nna htan wu ai.

⁷Ya dai nhtoi ni hta e, arai dut sha ai lam, hkrang shaw la ai lam hte arai galai ap, shagrin da ai shaloi, arai dut ya ai wa gaw shi a kyepdin raw nna mari ai wa hpe ap ya ai htung nga nga malu ai. Ndai lam hku nna Israela amyu masha ni sakse shagrin da ai lam madun dan nga ma ai.

⁸Dai rai nna dai masha wa gaw Bua hpe, “Dai yi hpe nang mari shaw la u,” ngu nna tsun nhtawm, shi a kyepdin raw la nna Bua hpe jaw wu ai.

⁹Dai hpang Bua gaw ningbaw ni hte dai shara hta sa dung madat lawm nga ai ni yawng a man e, “Nanhte yawng gaw dai ni Elimelek hte shi a kasha yan rai nga ai Hkilion hte Malon ni madu ai arung arai yawng hpe Naomi a lata kaw nna ngai mari la sai a sakse ni rai nga manit dai.

¹⁰Dai hta kaga, Malon a gaida jan, Moba amyu shayi Ruhta mung, nye a madu jan rai sai. Dai lam gaw si mat sai masha wa a dinghku na sut gan arung arai hte shi a dinghku matu mara ni shi a mare hte amyu masha ni a lapran matut htuk shachyaw na lam rai nga ai. Dai ni, nanhte gaw ndai lam yawng a sakse ni rai nga manit dai,” ngu nna tsun wu ai.

¹¹Mare a ningbaw ni hte kaga masha ni mung, “Rai sa, anhte gaw sakse ni rai nga saga ai. Yaku hpe kasha law law shaprat ya ai Rahkela hte Lea yan zawn na a madu jan hpe dai MADU hpajang ya nga u ga. Nang mung Ehprat a amyu lakying hta sut su ngamu ngamai wa ai hte Betlehem mare hta kajai gumhkawng wa nu ga.

¹²Aprat garai n kaba ai ndai num hta dai MADU jaw ya na ra ai amyu matu a marang e, na a dinghku gaw Yuda hte Htama yan a kasha Hparet a dinghku zawn rai nga u ga law,” nga nna shaman ya ma ai.

¹³Dai rai nna Bua gaw Ruhta hpe nta de woi wa nna shi a madu jan zawn lakawn nga wu ai. Dai MADU gaw shi hpe shaman ya ai rai nna, shi hta na-um nasin tai wa nhtawm shadang sha shangai ya wu ai.

¹⁴Numsha manang ni gaw Naomi hpe, “Dai MADU hpe shakawn kungdawn nga u! Shi gaw nang hpe yu lanu lahku na matu dai ni nang hpe kashu langai shaman ya nit dai. Dai ma gaw Israela amyu hta arawng dan hkung ai ma tai wa sanu ga law!

¹⁵Nang hpe tsaw ra nna shadang sha sanit lu ai hta grau akyu jaw ai na nnam gaw na a aprat nhtang ya ai wa, nang hpe aprat ugut gu hkra bau lakawn na na a kashu hpe shaprat ya nu ai,” ngu nna shaman ya ma ai.

¹⁶Naomi mung ma dai hpe la nna pawn ba nhtawm shi hpe yu maka nga ai.

¹⁷Shi a htingbu jan ni mung sa nna ma dai hpe Obed ngu shamying ya ma ai. Shanhte langai hte langai mung, “Naomi hta shadang sha langai lu nu ai!,” ngu nna tsun ma ai. Obed gaw Dawi a kawa Yese hpe shaprat wu ai.

¹⁸Ndai gaw Hparet kaw nna Dawi du hkra na dinghku lakung lama ni rai nga ai, dai ni gaw Hparet, Hezron, Ram, Aminadab, Nashon, Salmon, Bua, Obed, Yese, hte Dawi ni rai nga ai.