Read Jinghpaw Common Language Bible 2009 1 SAMUELA 16 Bible Online

1 SAMUELA 16 - Jinghpaw Common Language Bible 2009 bible

1 SAMUELA 16

¹Dai MADU gaw Samuela hpe, “Shawlu a majaw nang kaden du hkra yawn nga na ngu n ta? Ngai shi hpe Israela hkawhkam aya kaw nna jahkrat kau ni ai. Rai ti mung, ya chyawm gaw tsanlun sau loi mi la lang nhtawm Yese mying ai wa nga ai Betlehem mare de sa wa su, hpa majaw nga yang, ngai gaw shi a shadang sha langai mi hpe hkawhkam shatai na san da ni ai,” ngu nna tsun wu ai.

²Samuela gaw, “Dai amu hpe kaning rai ngai galaw lu na rai ta? Dai lam Shawlu na jang, shi ngai hpe sat kau na ra ai!,” ngu nna san wu ai. Dai MADU gaw, “Nang hte rau dumsu upra langai la sa nhtawm dai MADU a matu shagu hkungga nawng jau na ngai sa wa nngai ngu tsun u.

³Yese hpe mung hkungga nawng jau ai de shaga u; nang kaning rai galaw na lam ngai tsun dan na de ai. Ngai nang hpe tsun dan ai masha wa hpe hkawhkam aya dang ya na matu namman jaw ya na rai ndai,” ngu nna htan wu ai.

⁴Samuela mung dai MADU shi hpe tsun ai hte maren galaw nhtawm Betlehem mare de sa mat wa wu ai; dai yang e mare ningbaw ni gaw hkrit kajawng ai hte shi hpe sa hkrum let, “Myi san wa e, ndai gaw ngwi pyaw sim sa ai hte seng ai hkawm chyai lam rai nga a ni?,” ngu nna hkap san ma ai.

⁵Shi gaw, “Rai nga nngai, dai MADU hpe shagu hkungga nawng jau ya na matu du sa ring ngai. Nanhte a hkum ni jasan jaseng kau nhtawm ngai hte rau sa ga,” ngu nna htan wu ai. Shi gaw Yese hte shi a shadang sha ni hpe mung shanhte a hkum ni hpe jasan jaseng kau nhtawm shagu hkungga nawng ya ai de sa na matu shaga wu ai.

⁶Shanhte du ma ai shaloi, Samuela gaw Yese a kasha Eliaba hpe mu dat wu ai rai nna, “Dai MADU a man e tsap nga ai ndai wa gaw shi lata san da ai wa teng teng rai nga sai,” ngu nna shi kraw e myit nawn la wu ai.

⁷Rai ti mung, dai MADU gaw shi hpe, “Shi gaw kade wa mi hkum shingyan galu nna ahpraw tsawm htap nga wu ti mung, myit hkum shang sha et, ngai gaw masha e daw dan masat ai zawn n daw dan ai majaw, ngai shi hpe n la nngai. Masha gaw shinggan ahpraw asam hpe sha yu chye nga ai; rai ti mung ngai chyawm gaw myit masin hpe she yu nngai,” ngu nna tsun wu ai.

⁸Dai hpang, Yese gaw shi a kasha Abinadab hpe shaga la nna Samuela hpang de woi sa wa wu ai. Rai ti mung Samuela gaw, “N rai, dai MADU gaw shi hpe lata la nga ai n rai,” ngu nna tsun wu ai.

⁹Dai hpang Shama hpe bai woi sa wu ai, shaloi Samuela gaw, “Dai mung n rai nga ai, dai MADU shi hpe lata la nga ai n rai,” ngu nna tsun wu ai.

¹⁰Ndai hku nna Yese gaw shi a kasha sanit hte du hkra Samuela kaw woi sa wu ai. Shaloi rai tim, Samuela gaw shi hpe, “N rai nga ai law, dai MADU gaw ndai ni hta na langai mi hpe mung lata la nga ai n rai,” ngu nna tsun wu ai.

¹¹Samuela gaw shi hpe, “Nang hta kaga shadang sha ni naw nga a ni?,” ngu nna san wu ai. Yese gaw, “Kaji htum wa gaw naw nga ai, rai ti mung shi gaw shinggan de sagu rem hkawm nga ai,” ngu nna htan wu ai. Samuela gaw, “Shi hpe nang de sa wa na tsun mu, shi n du wa dingsa, anhte dai shagu hkungga nawng jau na ga ai n rai,” ngu nna tsun wu ai.

¹²Dai rai nna, Yese gaw shi hpe shaga dat wu ai. Shi gaw ahpraw asam tsawm nna hkam kaja ai shabrang ma rai nhtawm shi a myi man ni tu kabrim nga wu ai. Dai MADU gaw Samuela hpe, “Ndai wa rai nga ai, shi hpe namman jaw ya u!,” ngu nna tsun wu ai.

¹³Samuela gaw tsanlun sau la nhtawm kahpu ni a man e Dawi hpe namman jaw ya wu ai. Dai shaloi jang, dai MADU a wenyi gaw Dawi hpe up hkang wu ai; dai shani kaw nna shi hte rau arai nga sai. Dai hpang Samuela mung Rama mare de nhtang mat wa wu ai.

¹⁴Dai MADU a wenyi Shawlu kaw na pru mat wa sai rai nna, dai MADU dat dat ai n hkru ai wenyi mahtang shi hpe sharu shatsang nna zingri nga ai.

¹⁵Shi a shangun ma ni gaw shi hpe, “Karai Kasang e shangun dat ai dai n hkru ai wenyi nang hpe sharu shatsang tsang rai nga ai hpe anhte chye ga ai.

¹⁶Dai re ai majaw, Madu e, tingse atsawm sha dum shapyaw chye ai masha langai mi tam na ahkang jaw mi. Dai n hkru ai wenyi nang kaw du ai shaloi, dai wa shi a tingse dum ai majaw nang bai bran wa lu na rai ndai,” ngu nna tsun ma ai.

¹⁷Shawlu gaw shanhte hpe, “Mai sa, atsawm sha chye dum shapyaw ai masha nye a matu tam nna ngai hpang de woi wa marit,” ngu nna hkang dat wu ai.

¹⁸Shi a ali ama langai mi gaw, “Betlehem mare e nga ai Yese hta grai chye dum shapyaw ai madum sumpyi ninghkrin kasha langai mi lu wu ai. Shi gaw magrau grang nna ahpraw asam tsawm ai, gasat gala kung ai hpyenla mung rai nna ga shaga kung ai wa rai nga ai. Dai MADU mung shi hte rau rai nga ai,” ngu nna tsun dan wu ai.

¹⁹Shawlu gaw Yese hpang de kasa ni hpe shangun dat nhtawm, “Sagu rem ai na a nsha Dawi hpe ngai hpang de shangun dat ya e,” ngu nna tsun dat wu ai.

²⁰Yese mung lawze daw hta muk shagun nna, sabyi hpring hkra bang ai shanhpyi tau langai hte bainam kasha hte hpawn Dawi hpe Shawlu hpang de shangun dat wu ai.

²¹Dawi mung Shawlu kaw du nna shi a man e shang tsap nga ai. Shawlu gaw shi hpe grai yu ra ai rai nna, shi a laknak hpai ya ai masha hku lata la wu ai.

²²Dai hpang, Shawlu gaw Yese hpang de shiga shana dat wu ai: “Ngai Dawi hpe yu ra se ai majaw, nye a amu gun hpai na matu, ndai yang e nga nga nu ga.”

²³Dai aten kaw nna Karai Kasang e shangun dat ai n hkru ai wenyi gaw Shawlu kaw du shagu Dawi gaw tingse dum shapyaw pyaw di ya wu ai. Shaloi n hkru ai wenyi gaw pru mat wa nhtawm Shawlu bran wa ai hte bai mai mat mat rai nga ai.