Read Jinghpaw Common Language Bible 2009 1 SAMUELA 31 Bible Online

1 SAMUELA 31 - Jinghpaw Common Language Bible 2009 bible

1 SAMUELA 31

¹Hpilisti masha ni gaw Israela amyu masha ni hpe Gilaboa Bum ntsa e sa gasat ma ai. Dai yang e, Israela amyu masha ni law law sat kau ai hkrum nga ma ai; ngam nga ai ni hta Hkawhkam Shawlu hte shi a kasha ni du hkra hprawng mat wa ma ai.

²Rai ti mung, Hpilisti masha ni shanhte hpe hkan shachyut dep nna Shawlu a kasha ni rai nga ai Yonahtan, Abinadab hte Mahkisha hte hpe sat kau ma ai.

³Dai gasat gala ai gaw Shawlu a grup grup e laja lana rai nga ai majaw shi hkum nan hta hpyen wa a ndan pala wa jung hkrum wu ai hte grai yu matsan dum na zawn hkala hkrum da wu ai.

⁴Shaloi shi gaw shi a laknak hpai ya ai shabrang wa hpe, “Na a nhtu shaw nna ngai hpe sat kau e, shaloi ndai n kam n sham ai Hpilisti masha ni ngai hpe n yu roi ai hte n sat kau lu mu ga,” ngu nna tsun wu ai. Rai ti mung, dai shabrang wa mahtang shing re ai amu galaw na matu nau wa hkrit gari da wu ai. Shawlu gaw shi a nhtu shaw la nhtawm shi hkum nan dai hta abraw si mat wu ai.

⁵Shawlu si mat sai hpe dai shabrang wa mu ai shaloi, shi mung shi a nhtu hta abraw ju la nna Shawlu hte rau si wu ai.

⁶Dai gaw Shawlu mung, shi a kasha masum hte shabrang wa si mat ai lam rai nga ai. Shawlu a masha ni yawng mung dai shani e si mat shajang ma ai.

⁷Israela hpyen luksuk ni hprawng mat ma ai hte Shawlu hte shi a kasha ni sat kau ai hkrum sai lam hpe Yezrela Kadit a wora maga mi de nga ai Israela amyu masha ni hte Yawdan hka a sinpraw hkran de na ni na ma ai shaloi, shanhte a mare ni hpe kau da nhtawm hprawng mat wa ma ai. Dai hpang Hpilisti masha ni dai mare ni hpe sa madu la kau ma ai.

⁸Majan a hpang shani e, si mang ni hta na lanep hpyu la na nga pru sa wa ma yang, Shawlu a moi mang hte shi a kasha masum Gilaboa Bum ntsa e si taw nga ai hpe shanhte mu ma ai.

⁹Shanhte gaw Shawlu a baw daw la nhtawm, shi a hpyen palawng ni raw la nna shanhte a hpara sumla ni hpe mung, shanhte a mung masha ni hpe mung dai awng padang shiga a lam tsun dan na matu dai arai ni hte hpawn Hpilisti mung ting de kasa ni hpe shangun dat ma ai.

¹⁰Dai hpang, shi a laknak ni hpe karai num Astarte a htingnu kata hta tawn da nhtawm shi a moi mang hpe gaw Bet Shan mare bunghku hta dit jung da ma ai.

¹¹Hpilisti masha ni Shawlu hpe shing rai galaw kau ai lam hpe Gilead mung na Yabesha masha ni na ma yang,

¹²magrau grang htum ai masha ni gaw Bet Shan mare de shana tup rawt sa mat wa ma ai. Shaloi shanhte gaw mare bunghku e dit noi da ai Shawlu hte shi a kasha ni a moi mang ni hpe shayu la nhtawm Yabesha mare de bai la wa ma ai rai nna dai yang e shanhte hpe nat kau ma ai.

¹³Dai hpang, nrut nra ni hpe shanhte la nna mare na tsit ai ubyap hpun npu e, dai ni hpe lup makoi da let, sanit ya tup lusha gam nga ma ai.