Read Jinghpaw Hanson Version Bible 1 HKAWHKAM LABAU 10 Bible Online

1 HKAWHKAM LABAU 10 - Jinghpaw Hanson Version Bible bible

1 HKAWHKAM LABAU 10

¹Ya Hpilisti masha ni Israela masha ni hpe gasat mu ai: Israela masha ni mahtang masha hpyen ni a man e hprawng nna Gilaboa bum ga hkan e hkala nba hkrum ai hte si shajang ma ai.

²Hpilisti masha ni mung Shawlu hte shi a kasha ni hpe htep lahti hkan shachyut nna, Shawlu a kasha Yonahtan, Abinadab hte Mahkishua hte hpe sat kau mu ai.

³Shing rai dai gasat gala ai gaw, Shawlu a matu jin nga ai rai nna, ndan gap ai ni shi hpe dep mu ai: dai ndan pala gap ai ni a majaw shi myit ru nga ai.

⁴Dai rai nna Shawlu gaw shi a ri nhtu gun hpai ai wa hpe, “Ndai matu n gadoi ai ni gaw ngai e n sa galun lu nna, ngai e n roi lu ma ai du hkra, na nhtu shaw nna ngai e galun ya e,” ngu wu timung, dai wa gaw grai hkrit nga ai majaw, n hkraw nga ai. Dai rai nna Shawlu gaw shi a nhtu dai la nna dai hta abraw ju si wu ai.

⁵Ri nhtu lang ai wa mung, Shawlu si mat sai hpe mu jang, shi gaw shi a nhtu hta abraw ju si wu ai.

⁶Shing rai Shawlu hte shi a kasha masum si mat masai; shi a nta masha ni yawng, rau si wa masai.

⁷Ya, Israela masha ni hprawng mat ma ai hte, Shawlu mung, shi a kasha ni mung si mat ma ai gaw dai kadit e nga ai Israela masha ni mu mu yang, shanhte gaw tinang a mare kahtawng ni hpe kau da ma ai rai nna, Hpilisti masha ni sa de nga ma ai.

⁸Hpang jahpawt e Hpilisti masha ni, si mang ni hta na lanep hpyu la na nga, du sa wa ma yang, Shawlu hte shi a kasha ni Gilaboa bum ga e si taw nga ai hpe mu ma ai.

⁹Shanhte shi a arai ni hpe hpyu la ai hte, shi a baw hte shi a hpyen palawng la wa nhtawm, shanhte a Hpara sumla hkan e mung, masha ni a man e mung, kajai gumhkawng na matu, Hpilisti mung grup yin hkan e shagun dat mu ai.

¹⁰Shi a hpyen palawng hpe tinang a Hpara ni a nta e tawn da mu ai; shi a baw hpe Dagon a nta e noi da mu ai.

¹¹Hpilisti masha ni Shawlu hpe shing di ai lam Yabesha-gilead masha ni yawng na ma yang,

¹²share ni mahkra rawt nna, Shawlu hte shi a kasha ni a moi mang ni hpe la nna, Yabesha mare de hpai wa nhtawm, Yabesha wamyi hpun npu e lup makoi kau nna, sanit ya tup lusha gam nga ma ai.

¹³Shing rai Shawlu gaw Yehowa a ga hpe n madat ai hte, Yehowa hpe shut hpyit kau ai majaw mung, Yehowa hpe n san yu ai sha, nat shung ai num hpe tam san yu ai majaw mung si ai hkrum wu ai.

¹⁴Dai re ai majaw Yehowa gaw shi hpe sat kau nhtawm, Yese a kasha Dawi hpe dai mungdan ap ya kau wu ai.