Read Jinghpaw Hanson Version Bible 1 HKAWHKAM LABAU 11 Bible Online

1 HKAWHKAM LABAU 11 - Jinghpaw Hanson Version Bible bible

1 HKAWHKAM LABAU 11

¹Shaloi Israela masha ni yawng, Hebron mare de Dawi kaw sa du nna, Yu u, anhte gaw na a nrut nra, na a hkum shan rai nga ga ai.

²Mani ma ni Shawlu anhte a hkawhkam naw rai nga yang pyi, nang hkum nan Israela amyu hpe woi pru woi shang ai wa, rai nga nit dai: na a Karai Kasang Yehowa mung, Nang gaw nye a amyu Israela hpe woi rem na wa mung, nye a amyu Israela ntsa e du magam mung, tai lu na rin dai, ngu nna nang madu hpe tsun nit dai, ngu mu ai.

³Shing rai, Israela agyi salang ni yawng, Hebron mare de Hkawhkam wa kaw sa du nna, Dawi gaw Hebron mare hta e, Yehowa a man e shanhte hte ga shaka tawn da nhtawm, shanhte gaw, Samuela a n-gup hta Yehowa tsun da ai hte maren, Israela hkawhkam tai na matu, Dawi hpe namman chya ya mu ai.

⁴Bai Dawi hte Israela amyu ting, Yebu ngu ai, Yerusalem de lung wa ma ai: dai mung na kashu kasha ni ngu ai, Yebusi masha ni gaw, dai yang e nga nga ma ai.

⁵Yebu mare masha ni chyawm gaw, Nang gaw nang e shang lu na ndai n rai, ngu nna Dawi hpe tsun mu timung, Dawi gaw Ziun ngu ai hpyen dap hpe gasat la wu ai; dai gaw Dawi a mare ngu ai, rai nga ai.

⁶Bai Dawi gaw, Yebusi masha ni hpe shawng dep gasat lu ai wa, agyi hte hpyen du tai na ra ai, nga nna tsun ai majaw, Zeruia kasha Yoab gaw shawng lung wa nna, agyi tai wa sai,

⁷Dai hpang Dawi gaw dai hpyen dap hta a nga nga ai; dai re ai majaw dai mare hpe Dawi a mare ngu nna shamying mu ai.

⁸Dai hta kaga shi gaw, dai mare hpe Milo shara kaw nna grup yin du hkra de da wu ai: Yoab gaw dai mare a kaga daw mi hpe lajang wu ai.

⁹Dawi chyawm gaw grau nna galu kaba jat wa nga ai; kaning rai nme law, Zaw nawng Zaw wa up ai Yehowa gaw shi hte rau rai nga ai.

¹⁰Da ndai gaw, Dawi hte rau nga ai nden ja ai share ni a agyi ni rai nga ma ai: Yehowa gaw Israela amyu a lam tsun wu ai hte maren, shanhte gaw Israela amyu masha ni mahkra hte rau Dawi hpe hkawhkam aya dang na matu, shi hpang maga e, dai mungdan hta, n-gun dat ai ni rai nga ma ai.

¹¹Da ndai gaw Dawi hte rau nga ai nden ja ai share ni a jahpan rai nga ai: Hakmoni amyu Yashobeam gaw hpyen du ni a du rai nga ai: shi gaw ri lang let, marai masum tsa hpe lang lata gasat nna, sat kau mu ai.

¹²Shi a hpang e, Ahohi masha Dodo a kasha Eliaza gaw, n-gun ja ai share masum hta lawm nga ai.

¹³Shi gaw Dawi hte rau Pasdamin shara e nga nga ai rai nna, dai shara e nga ai muk-yaw mam hkaibang lawk hta hpyen gasat na matu Hpilisti masha ni hpawng nga ma ai; mung masha ni gaw Hpilisti masha ni a majaw hprawng mat wa ma ai.

¹⁴Shanhte chyawm gaw hkaibang lawk ka-ang e tsap let hkap gasat nga nna Hpilisti masha ni hpe sat kau mu ai: Yehowa gaw padang ninglaw kaba hte shanhte hpe hkye hkrang la mu ai.

¹⁵Lang mi gaw agyi sumshi hta na marai masum Dawi nga ai lunghkrung hkan na Adulam ginlawng hku kata de shang ma ai: Hpilisti luksuk ni gaw Rehpim kadit e dap jung nga ma ai.

¹⁶Dawi gaw dai shaloi e dai hpyen dap hta nga nga nna, Hpilisti sin langa ni gaw Betlehem mare kata de nga nga ma ai.

¹⁷Dawi gaw, “Marai langai ngai Betlehem chyinghka makau na hka htung ntsin ngai e lu shangun mi le,” nga nna marit ai myit hte tsun wu ai.

¹⁸shaloi dai marai masum Hpilisti dap de htim bang nna, Betlehem chyinghka makau na ntsin ja la nhtawm, Dawi hpang de la wa mu ai: rai timung, Dawi gaw n lu hkraw ai sha Yehowa man e ru kau let,

¹⁹“Ndai ntsin ngai lu na gaw nye a Karai Kasang hkum u ga; tinang asak hpe nawng kau ai ni a asai ngai lu na kun? shanhte gaja wa tinang asak nawng kau ai hte ndai ntsin la wa ma ai,” nga nna n lu hkraw ai. Shing rai dai share masum galaw ma ai.

²⁰Bai Yoab a kanau Abshai gaw share kaba masum a agyi rai nga ai: shi gaw ri lang let masha masum tsa hte hpe gasat nna, sat kau mu ai majaw dai marai masum hta shi lawm nga ai.

²¹Dai marai masum hta na, shi gaw marai lahkawng hta arawng grau lu nna, shan a agyi tai wa ai: rai timung, shi gaw shawng na marai masum a lahkam n dep wu ai.

²²Bai Kabzela shara na, nden ja ai myit hte magam amu kaba shachyen chye ai Yehoiada a kasha Benaia gaw, rai nga ai: shi gaw Moba masha Ariela a shadang sha yan hpe sat kau wu ai: dai hta kaga shi gaw nshung ta e lungpu ka-ang de shang nhtawm, hkanghkyi langai mi hpe sat kau wu ai.

²³Hkum shing-yan dawng manga tsaw ai Egutu masha langai mi hpe mung shi sat kau wu ai: dai Egutu masha a lata hta dahkaw daram kaba ai ri numdu lang nga timung, Benaia gaw dawhkrawng sha lang let, sa wa nna, Egutu masha a lata na ri kashum la nhtawm, dai ri hte shi hpe sat kau wu ai.

²⁴Dai amu hte hpe Yehoiada kasha Benaia galaw wu ai rai nna, share masum ngu na hta shi a amying mung lawm nga ai.

²⁵Yu u, shi gaw share sumshi hta arawng grau lu timung, shawng na marai masum a lahkam n dep wu ai: Dawi gaw shi a sin langa ni a ntsa e shi hpe bu shatai wu ai.

²⁶Bai luksuk laba ni a share ni gaw: Yoab a kanau Asahela; Betlehem masha Dodo a kasha Elhanan;

²⁷Haro masha Shamot; Pelo masha Heleza;

²⁸Teko masha Ikesha a kasha Ira; Anahtot masha Abieza;

²⁹Hushat masha Sibehkai; Aho masha Ilai;

³⁰Netohpa masha Maharai; Netohpa masha Bana a kasha Heled;

³¹Ben-yamin amyu Gibea shara na Ribai a kasha Ihtai; Pirat masha Benaia;

³²Gasha hkaraw na Hurai; Arba masha Abiela;

³³Baharu masha Azmawet; Shalabo masha Eliaba;

³⁴Gizon masha Hashem a kasha ni; Hara masha Shage a kasha Yonahtan;

³⁵Hara masha Sahkara kasha Ahiam; Ura kasha Elihpala;

³⁶Mehkera masha Hehpera, Pelo masha Ahiya;

³⁷Hkarmela masha Hezro: Ezbai a kasha Narai;

³⁸Nahtan a kanau Yoela; Hagri a kasha Mibhara:

³⁹Amon masha Zelek; Zeruia kasha Yoab a ri nhtu gun hpai ai wa Berot masha Naharai;

⁴⁰Ihtri masha Ira; Ihtri masha Gareb;

⁴¹Hiti masha Urai; Alai a kasha Zabad;

⁴²Rubin du amyu hta na Rubin masha Shiza a kasha Adina hte, shi hte rau nga ai marai sumshi;

⁴³Mahka a kasha Hanan, Mitni masha Yoshahpat;

⁴⁴Ashtera masha Uzia; Arori masha Hohtam a kasha Shama yan Yiela;

⁴⁵Shimri a kasha Yediela hte shi a kanau Tizi masha Yoha;

⁴⁶Mahawi masha Eliela; Elnam a kasha Yeribai yan Yoshawi;

⁴⁷Moba masha Itma hte hpawn Eliela. Obed, Mezoba masha Yesiela hte rai ma ai.