Read Jinghpaw Hanson Version Bible 1 HKAWHKAM LABAU 13 Bible Online

1 HKAWHKAM LABAU 13 - Jinghpaw Hanson Version Bible bible

1 HKAWHKAM LABAU 13

¹Bai Dawi gaw, agyi ni ngu ai, hpyen masha hkying mi up ai, latsa up ai bu ni yawng hte hte bawng nna, shi gaw Israela shawa hpawng hpe,

²“Nanhte ra ai hte, anhte a Karai Kasang Yehowa mung hkraw a yang gaw, hkinjawng ni hte Lewi masha ni de nga ai mare ni hte de a ginwang ni hta naw ngam nga ai Israela mungdan shara shagu hkan na anhte a hpunau ni gaw anhte hte rau zuphpawng nga na matu, shaga la gaw;

³shing rai, anhte a Karai Kasang a sakse sumpu hpe anhte bai hpai la ga: Shawlu a prat e dai sumpu a man e anhte san yu ga ga ai nrai,” nga nna tsun ai ga hpe,

⁴shawa masha ni na ra mu ai rai nna, dai lam mung masha ni a man e htuk nga malu ai majaw, shing rai galaw na lam yin la ma ai.

⁵Shing rai Dawi gaw Karai Kasang a sakse sumpu hpe, Kiriat-yearim mare na hpai la na nga, Egutu mung na Shihora hka shi kaw nna, Hamat lamu ga jarit du hkra nga ai Israela amyu masha yawng hte hpe jahpawng la nhtawm,

⁶Hkerubim lapran e dung ai, Yehowa amying nsang hte seng ai, Karai Kasang Yehowa sakse sumpu hpe hpai la na matu, Dawi hte Israela masha ni yawng, Yuda mung na, Kiriat-yearim ngu ai Bala mare de lung wa ma ai.

⁷Ya shanhte gaw Karai Kasang a sumpu hpe Abinadab a nta na shapraw nhtawm, leng nnan a ntsa e mara mu ai: Uza yan Ahia gaw leng gau ma ai.

⁸Dawi hte Israela masha ni yawng, mahkawn mangoi na matu, tingse, doria, chying, shupsheng hte pahtau lang let, n-gun lagaw mahkra hte Karai Kasang a man e dum nga ma ai.

⁹Shing rai shanhte gaw Hkidon a mam chyarang de du ai shaloi, usu ni kadawng ai majaw, sakse sumpu hpe jum shadang na matu, Uza lata ladawn nna jum wu ai.

¹⁰Shing rai sakse sumpu hpe jum ai majaw, Yehowa gaw Uza hpe masin pawt nna, dai yang e shi hpe ari jaw ai hte, shi Karai Kasang a man e si wa sai.

¹¹Yehowa gaw Uza hpe anu sat kau ai majaw Dawi myit n pyaw nga ai rai nna, dai shara hpe ya du mateng Pere-Uza ngu nna shamying wu ai.

¹²Dawi gaw dai shani hta Karai Kasang hpe hkrit nna, ngai gaw Karai Kasang a sumpu hpe kaning rai hpai wa lu na kun, nga nna tsun let,

¹³shi a shara Dawi mare de sumpu hpe n hpai wa ai sha, Giti masha Obed-edom a nta de hpai koi mat wa ai.

¹⁴Shing rai Karai Kasang a sumpu gaw Obed-edom a nta masha ni hte rau, shi a nta hta shata masum tup rai nga ai: Yehowa mung Obed-edom a nta hte shi lu malu mahkra hpe shaman ya wu ai.