Read Jinghpaw Hanson Version Bible 1 HKAWHKAM LABAU 16 Bible Online

1 HKAWHKAM LABAU 16 - Jinghpaw Hanson Version Bible bible

1 HKAWHKAM LABAU 16

¹Shing rai shanhte gaw Karai Kasang a sakse sumpu hpai la nna, Dawi mazing da ai sum ka-ang e tawn da nhtawm, wan nat hkungga hte mahku hkungga Karai Kasang a man e nawng ya mu ai.

²Ya Dawi gaw wan nat hkungga hte mahku hkungga nawng ya ngut jang, mung masha ni hpe Yehowa a mying nsang hte shaman ya mu ai.

³Bai shi gaw Israela masha lasha numsha shagu hpe muk tawng mi, shan tau mi hte tsabyi si pa pa karan jaw mu ai.

⁴Bai, Yehowa a sakse sumpu a man e daw jau na hte, Israela Karai Kasang Yehowa a chyeju dum nna, shi hpe shakawn kungdawn na matu, Dawi gaw Lewi masha nkau mi hpe san da mu ai:

⁵Asap gaw agyi rai nga ai; shi a lawu e nga nna, tingse hte doria dum ai ni gaw, Zehkaria, Yeiela, Shemiramot, Yehiela, Matihtia, Eliaba, Benaia, Obed-edom, Yeiela hte rai ma ai; Asap gaw ngoi garu ai shupsheng dum nga ai;

⁶bai hkinjawng Benaia hte Yahaziela gaw Karai Kasang a ga shaka sumpu man e tutnawng pahtau dum nga ma ai.

⁷Dai shani e Dawi gaw, Asap hte shi a kahpu kanau ni a n-gup e Yehowa a chyeju hpe shakawn kungdawn ai lam nnan tawn da wu ai.

⁸Yehowa a chyeju hpe shakawn mu, Shi a amying nsang hpe shaga mu: Shi a amu bungli amyu baw ni hpe tsun dan mu.

⁹Shi hpe mahkawn mu, shi hpe mangoi mu, Shi a mauhpa amu nlang hte hkai dan mu.

¹⁰Shi a chyoi pra ai amying hta kabu gumrawng nga mu: Yehowa hpe tam ai ni amyit masin kabu nga malu ga.

¹¹Yehowa hte shi a n-gun atsam hpe tam san mu; Shi a myi man hpe tutnawng e hkan tam mu.

¹²Shi a mayam Israela a aru arat hte e, Shi lata la ai Yaku a kashu kasha ni e,

¹³Shi galaw dan sai lamik kumla bungli hte, Shi a mauhpa magam, shi a n-gup na pru ai tara hpe, adum nga mu.

¹⁴Shi Yehowa gaw anhte a Karai Kasang rai nga ai: Ga ting hta e shi a tara dara ai ga, pru nga ai.

¹⁵Abraham hte tawn da nga nna, Isak hpe dagam shagrin da ai ga shaka ngu ai,

¹⁶Prat hkying mi a matu hkang da ai mungga hpe, Prat dingnawng e adum nga mu.

¹⁷“Hkanan mung hpe na a sali wunli jarit matu, Ngai nang hpe jaw na nngai,” nga ai ga gaw,

¹⁸Yaku hte ga madat shi tawn da nna, Israela hta prat dingsa na ga shaka shatai nu ai.

¹⁹Nanhte hpe hti yu na mi garai n ra, Amyu kaji naw rai nga nna, dai mung e shingbyi nga ma yang,

²⁰Amyu mi hta na amyu mi de, Mung mi kaw nna mung mi de, htawt hkawm ma ai shaloi e,

²¹Shanhte hpe zingri na shi n hkraw nga ai rai nna, Shanhte a majaw hkawhkam hpe pyi ari jaw nu ai.

²²“Nye a namman chya ai ni hpe hkum hkra myit, Nye a myihtoi ni hpe hkum shatsang myit,” nga nna shi tsun nga ai.

²³Aga ting Yehowa hpe mahkawn mangoi mu, Shi a hkye hkrang la ai lam hpe lani hte lani hkai dan mu.

²⁴Masha amyu ni hpe shi a hpung shingkang, Amyu baw shagu hpe shi a mauhpa amu gawn dan mu.

²⁵Yehowa gaw galu kaba nga ai rai nna, Nachying shakawn ging ai wa rai nga ai: Hpara mahkra ni hta mung shi hpe grau hkrit mai nga ai.

²⁶Amyu baw ni a hpara ni, sumla hkrai rai nga ma ai; Yehowa chyawm gaw sumsing lamu hpe hpan da nu ai.

²⁷Ndaw nsa hte hpung shingkang shi a man e nga nga ai, Atsam hte reng htum ai shi a shara e nga nga ai.

²⁸Masha amyu dap ni e, anhte a Yehowa hpe, Rai sa, Yehowa hpe hpung shingkang hte atsam yin la mu.

²⁹Yehowa a mying ningsang hpe hpung shingkang yin la mu; Lusha hkungga lang let shi a man de shang mu: Chyoi pra ai hpe mawn sumli nna, Yehowa hpe nawku mu.

³⁰Mung shagu shi a man e hkrit gari nga mu ga; Gaja wa mungkan ga hpe shi tawn da nna, dai gaw shamu shamawt nga ai, n rai.

³¹Sumsing lamu kabu gara nga nna, gingding aga garu jahtau na ra ai; “Yehowa gaw Hkawhkam rai nga ai,” ngu nna masha amyu ni hpe tsun dan mu.

³²Nammukdara hte dai hta rawng marawng, nsen kaba hte kashaw nga mu ga: Pa hte dai yang na nga manga kabu awng nga mu ga:

³³Shaloi maling na hpun yawng hte, Yehowa man e awng sharawng nga na mara ai; Kaning rai nme law, Lamu ga hpe tara dara na shi du ra ai.

³⁴Yehowa gaw mai kaja nga ai majaw, chyeju dum mu; Shi a chyeju htani htana e anga nga ai.

³⁵Nanhte gaw, Anhte hpe hkye hkrang la ai Karai Kasang e, anhte hpe hkye hkrang la mi. Na a chyoi pra ai amying hpe shakawn kungdawn nna, Nang hpe shakawn ai hta nlaw nga lu hkra, Masha amyu ni hta na anhte hpe shinggyin la nna, mawai la mi law, ngu nna tsun mu.

³⁶Israela a Karai Kasang Yehowa gaw, Htani htana prat dingsa e a nga u ga law. Shaloi shawa masha ni yawng, Amen, ngu nna, Yehowa hpe shakawn kungdawn mu ai.

³⁷Shing rai shi gaw, Yehowa a ga shaka sumpu man e shani shagu tutnawng daw jau na matu, Asap hte shi a kahpu kanau ni hpe mung,

³⁸Obed-edom hte shi a kahpu kanau kru shi matsat hte hpe mung; chyinghka sin na matu Yeduhtun hte Hosa a kasha Obed-edom hpe mung, ga shaka sumpu man e san da mu ai;

³⁹Bai, wan nat hkungga nawng ai tawn hkungri ntsa e shani shagu jahpawt hte shana e Yehowa hpe wan nat hkungga nawng ya na matu, Gibeon a tsaw ai kawng ntsa na,

⁴⁰Yehowa a sumpan sum man e, hkinjawng Zadok hte shi a kahpu kanau ni hpe tawn da mu ai: dai gaw, Israela masha ni hpe hkang da ai hte, Yehowa a tara hta ka da nga ai hte maren rai nga ai:

⁴¹bai, Yehowa a n-gaw nwai myit htani htana agrin nga ai majaw, shi a chyeju hpe mahkawn mangoi na matu, Heman hte Yeduhtun hpe mung, Jahpan hta amying lawm ai ni hpe mung, shanhte hte rau san da mu ai:

⁴²shing rai Heman yan Yeduhtun gaw Karai Kasang hpe mahkawn mangoi na matu, pahke hte shupsheng aja awa dum shangoi ma ai: Yeduhtun a kasha ni gaw chyinghka sin nga ma ai.

⁴³Shing rai shawa masha ni langai hte langai tinang a nta de wa mat ma ai: Dawi mung shi a nta hpe shaman ya na matu, bai wa ai.