Read Jinghpaw Hanson Version Bible 1 HKAWHKAM LABAU 19 Bible Online

1 HKAWHKAM LABAU 19 - Jinghpaw Hanson Version Bible bible

1 HKAWHKAM LABAU 19

¹Dai hpang Ammon a kashu kasha ni a hkawhkam Nahat gaw si mat nna, shi a kasha, kawa a malai hkaw dung nga ai.

²Shaloi Dawi gaw, Hanun a kawa Nahat ngai hpe chyeju madun ai majaw, “Ngai mung Hanun hpe chyeju htang na we ai,” nga nna kawa a yawn hta na shi hpe shalan shabran na nga, kasa shangun dat wu ai. Dawi a ali ama ni mung Ammon a kashu kasha ni a mung hta, Hanun hpe shalan shabran na matu, shi kaw du ma ai.

³Ammon a kashu kasha ni a agyi salang ni chyawm gaw Hanun hpe, “Nang kaw shalan shabran ai masha sa du ai gaw, Dawi na a kawa hpe hkungga lara ai zawn, nawn da wu ni? Ndai mungdan hpe sawk yu nna, kin-yu yu ai hte hpya kau na matu, shi a shangun ma ni nang kaw sa du ai, n rai nga a ni?” ngu nna tsun mu ai.

⁴Dai rai nna Hanun gaw Dawi a shangun ma ni hpe rim la nna, mun shangun kau ya ai hte, dangbau du hkra shanhte a hpun palawng rep di kau ya nhtawm, dat dat mu ai.

⁵Ya shanhte hpa hkrum ai lam, masha nkau mi Dawi hpe sa shana ya mu ai. Shanhte kaya kahpa kaba hkrum ai majaw, Dawi gaw shangun ma dat dat nna, hkawhkam wa gaw shanhte hpe, “Nanhte a nmun garai n galu dingsa, Yerihko mare e naw nga ga nna, dai hpang e she wa marit,” ngu dat mu ai.

⁶Ammon a kashu kasha ni gaw Dawi a man e matsat shabat rai nga ai lam, shanhte dum chye la jang, Hanun hte Ammon a kashu kasha ni gaw, hpyen leng hte gumra jawn ai masha shaga na matu, Mesopotami mung, Aram-mahka mung hte Zoba mung de gumhpraw joi hkying mi shagun dat mu ai.

⁷Shing rai shanhte gaw hpyen leng mun masum hkying lahkawng hpe mung, Mahka hkawhkam hte shi a masha ni hpe mung shaga la nna, dai ni gaw Medeba mare tawtap e sa but nga ma ai. Ammon a kashu kasha ni mung zuphpawng nga nna, tinang a mare ni kaw na gasat na pru wa ma ai.

⁸Dai lam Dawi na wu jang shi gaw Yoab hte shi a share luksuk ni mahkra hpe shangun dat mu ai.

⁹Shing rai Ammon a kashu kasha ni mung pru nna, mare chyinghka lam e hpyen gasat hkyen nga ma ai: sa karum ai hkawhkam ni gaw pa ga e kaga hkrai rai nga ma ai.

¹⁰Ya Yoab gaw shi a shingdu aman hpyen man lahkawng tai nga ai mu jang, Israela masha ni mahkra hta na grau share ai ni yawng hpe lata la nna, Suri masha ni a hpang maga de hkyen tawn shangun mu ai.

¹¹Naw ngam nga ai masha ni hpe shi a kanau Abishai a lata de ap ya wu ai rai nna, shanhte gaw Ammon masha ni a hpang maga de hkyen nga ma ai.

¹²Bai Yoab gaw, Suri masha ni ngai hpe dang wa jang ngai e sa karum e; Ammon a kashu kasha ni nang hpe dang kau yang, ngai nang hpe karum na de ai.

¹³Dakan nga u; anhte a amyu hte anhte a Karai Kasang a mare ninghtawn ni a matu n-gun marai dat ga; Yehowa gaw shi ra ai hku hte maren, galaw u ga, ngu wu ai.

¹⁴Shing rai Yoab gaw shi a masha ni hte rau Suri dap hpe gasat na htim mu ai rai nna, Suri masha ni shi a man na hprawng mat wa ma ai.

¹⁵Suri masha ni hprawng mat wa ai hpe Ammon a kashu kasha ni mu jang, shanhte mung shi a kanau Abishai a man na hprawng nna, mare de hprawng wa ma ai. Shaloi Yoab gaw Yerusalem mare de wa mat ai.

¹⁶Ya Suri masha ni gaw Israela masha ni a man e sum mat ai mu chye jang, shanhte gaw kasa shangun dat nna, hka wora hkran na Hadareze san da ai hpyen du Shohpak hte shi up ai Suri masha ni hpe shaga mu ai.

¹⁷Dai lam Dawi na wu jang, Israela masha ni yawng hte hpe jahpawng la nhtawm, Yawdan hka rap nna, shanhte nga ai de du jang hpyen gasat na hkyen tawn mu ai. Shing rai Dawi gaw hpyen gasat na hkyen ngut jang, Suri masha ni shi hpe hkap gasat mu ai.

¹⁸Suri masha ni mung Israela masha ni a man na hprawng wa ma ai rai nna, Dawi gaw Suri hpyen leng masha hkying sanit, lagaw hkawm ai hpyen masha mun mali hpe sat kau ai hte, hpyen du Shohpak hpe mung sat kau wu ai.

¹⁹Shanhte gaw Israela man e sum mat ai hpe, Hadareze a ali ama ni mu jang, shanhte Dawi hte htinglu nna, shi kaw yamnga ma ai; Suri masha ni gaw htawm hpang e Ammon a kashu kasha ni hpe n karum manu ai.