Read Jinghpaw Hanson Version Bible 1 HKAWHKAM LABAU 21 Bible Online

1 HKAWHKAM LABAU 21 - Jinghpaw Hanson Version Bible bible

1 HKAWHKAM LABAU 21

¹Ya Satan gaw Israela masha ni hpe alau nna, Israela amyu hpe jahpan la na Dawi hpe shadut wu ai.

²Shing rai Dawi gaw, Yoab hte Israela agyi salang ni hpe,” Sa mu, Berasheba kaw nna Dan mare du hkra Israela amyu hpe hti yu nhtawm, shanhte gade law nga ma ai kun, ngai chye lu hkra, wa tsun dan marit,” ngu dat mu ai.

³Dai rai nna Yoab gaw, “Yehowa shi a amyu hpe ya nga ai hta, htam latsa naw shalaw u ga; rai timung, nye a madu hkawhkam wa e, shanhte yawng na a mayam ni rai nga ma ai, n rai ni? nye a madu ndai lam hpa majaw ra nta? Israela amyu hpe hpa majaw shut shangun na rai ta?” ngu wu ai.

⁴Rai timung hkawhkam a ga gaw Yoab a ga hpe dang kau wu ai. Dai re ai majaw Yoab sa nna, Israela mung ting hproi hkra hkawm nhtawm, Yerusalem de bai wa ai.

⁵Ya Yoab gaw Jahpan laika a nambat Dawi hpe wa sak ya wu ai. Israela amyu hta ri nhtu chye lang ai masha yawng ri mi e sen mi law nga ma ai: Yuda amyu hta ri nhtu chye lang ai masha sen mali mun sanit rai nga ma ai.

⁶Yoab gaw hkawhkam wa a ga hpe matsat ai majaw, Lewi hte Ben-yamin amyu hpe n hti shalawm wu ai.

⁷Karai Kasang chyawm gaw dai lam n ra wu ai rai nna, Israela amyu hpe ari jaw wu ai.

⁸Dai rai nna Dawi gaw Karai Kasang hpe, “Ndai lam ngai galaw ai majaw, ngai nachying shut ni ai; rai timung, na a mayam wa a mara hpe ya raw dat kau ya e; ngai wa nachying ngawk ai amu galaw kau se ai,” ngu nna hpyi wu ai.

⁹Bai Yehowa gaw Dawi a myihtoi Gad hpe, “Dawi hpang de sa tsun su:

¹⁰Yehowa ning nga ai. ‘Ngai nang hpe lam masum madun dan de ga; nang hpe ari jaw na matu dai hta na langai mi lata la u, ngu u,’ ngu dat wu ai.

¹¹Shing rai Gad Dawi hpang de sa nna, Yehowa ning nga ai.

¹²Masum ning tup hku wa na tsin-yam; shing n rai, shata masum tup hpyen ni nang hpe hkan shachyut nna, nhtu hte shaza hkrum ai tsin-yam; shing n rai, masum ya tup ndai mungdan hta Yehowa nhtu ngu ai ana zinli pru nna, Yehowa a lamu kasa gaw Israela mungdan ting lamu ga jarit du hkra shaza kau na tsin-yam, gara mahtang lata la mayu yang lata la u: ngai e shangun ai wa hpe gara hku htan lu hkra myit aru yu u,” ngu wu ai.

¹³Dai rai nna Dawi gaw, “Ngai myit grai ru nngai; Yehowa a lata hta ngai shang u ga; shi a matsan dum ai myit grai kaba nga lu ai: masha a lata hta ngai n du n ga,” ngu nna myihtoi Gad hpe tsun wu ai.

¹⁴Shing rai Yehowa gaw Israela amyu hta ana zingli shangun dat nna, Israela masha mun sanit si mat ma ai.

¹⁵Yerusalem mare hpe jahten na matu, Karai Kasang gaw lamu kasa shangun dat nna, dai mare hpe jahten magang wa nga yang, Yehowa mada yu nna, ari dai hte a majaw myit bai kayin nna, “Ram sai, na lata dawm la nu,” ngu nna jahten maw ai lamu kasa hpe tsun wu ai. Yehowa a lamu kasa chyawm gaw Yebusi masha Ornan a mam chyarang makau e tsap nga ai.

¹⁶Dawi mada yu yang, Yehowa a lamu kasa gaw Yerusalem ntsa e nhtu shada let, lamu hte aga lapran e tsap nga ai hpe mu wu ai. Dai rai nna Dawi hte agyi salang ni gaw lachyit nba bu hpun let, ga hta gum dagup nga ma ai.

¹⁷Shaloi Dawi gaw Karai Kasang hpe, “Mung masha ni hpe hti yu na, ngai nan hkang da ai, n rai nga a ni? shut nna n shawp ai amu kaba galaw ai gaw, ngai hkum nan rai nga nngai; ndai sagu ni mahtang hpa lam shut nga ma ta? nye a Karai Kasang Yehowa e, na a mung masha ni ana zinli n hkrum lu hkra, ngai hpe mung, nye wa a nta dap hpe mung ari jaw e law,” ngu nna tsun wu ai.

¹⁸Dawi gaw, Yebusi masha Ornan a mam chyarang hta Yehowa a matu tawn hkungri galaw na lam, Dawi hpe hkang da na, Yehowa a lamu kasa gaw Gad hpe hkang dat wu ai.

¹⁹Dai rai nna Yehowa a amying nsang hte Gad htawn tsun ai ga hte maren, Dawi lung sa wa ai.

²⁰Ornan gaw kayin yu wu yang, lamu kasa hpe mada mu wu ai; shi hte rau nga ai shi a shadang sha mali gaw makoi nga ma ai. Ornan chyawm gaw hkaulan mam dup nga ai.

²¹Ya Dawi Ornan kaw sa du yang, Ornan mada yu nna Dawi hpe mu jang, mam chyarang na shi pru nhtawm, Dawi a man e ga de gum dagup wu ai.

²²Shaloi Dawi gaw Ornan hpe, “Yehowa a matu tawn hkungri galaw na ndai mam chyarang ngai hpe ya e; mung masha ni hta na dai ana zinli jasim ya lu hkra, dai hpe ging dan ai manu hte dut ya rit,” ngu wu ai.

²³Shaloi Ornan gaw, “Dai hpe la u; nye a madu hkawhkam wa myit ra ai hte maren galaw u ga: yu u, wan nat hkungga matu usu ni, hpun shatai na mam dup arai ni, lusha hkungga matu hkaulan mam hte yawng ngai sak jaw na nngai,” ngu nna Dawi hpe tsun wu ai.

²⁴Hkawhkam Dawi mahtang, “Dai hku n rai; ngai gaja wa ging dan ai manu hte mari la na nngai; na a sut rai Yehowa hpe nawng ya na matu, ngai n la na nngai; manu n hkrat ai wan nat hkungga hpe mung n nawng ya na nngai,” ngu nna Ornan hpe tsun wu ai.

²⁵Shing rai Dawi gaw Ornan hpe aja shekela kru tsa shen ya nna, dai shara hpe mari la wu ai.

²⁶Bai Dawi gaw dai yang e Yehowa a matu tawn hkungri galaw nna, wan nat hkungga hte mahku hkungga nawng ya let, Yehowa hpe shaga wu ai: Yehowa mung wan nat hkungga nawng ai tawn hkungri ntsa e wan jahkrat ai hte sumsing lamu de nna Dawi hpe htan ya wu ai.

²⁷Yehowa gaw lamu kasa hpe hkang da nna, shi gaw shi a nhtu hpe n-ga hta bang da wu ai.

²⁸Yehowa gaw Yebusi masha Ornan a mam chyarang e shi hpe htan ya wu ai gaw, Dawi mu wu yang, shi gaw dai shara e hkungga a nawng ya nga ai.

²⁹Kaning rai nme law, nam mali hkan e Mawshe galaw ai Yehowa sumpan nta hte, wan nat hkungga nawng ya ai tawn hkungri gaw, dai aten e Gibeon a tsaw ai kawng ntsa e nga nga ai.

³⁰Dawi chyawm gaw, Yehowa lamu kasa a nhtu hpe hkrit nga ai majaw, dai hkungri man e Karai Kasang hpe sa san na, n wam wu ai.