Read Jinghpaw Hanson Version Bible 1 HKAWHKAM LABAU 23 Bible Online

1 HKAWHKAM LABAU 23 - Jinghpaw Hanson Version Bible bible

1 HKAWHKAM LABAU 23

¹Ya Dawi gaw dingla ugut gu wa sai rai nna, shi a kasha Shawlumon hpe Israela ntsa e hkawhkam shatai wu ai.

²Dai hta kaga shi gaw, Israela agyi salang ni, hkinjawng ni hte Lewi masha nlang hte hpe, zuphpawng shangun wu ai.

³Ya Lewi masha ni hta na asak sumshi ning lai nna, jahpan hta lawm ai lasha langai hte langai hpe hti yu yang, marai mun masum hkying matsat rai nga ma ai.

⁴Dai ni hta na, Yehowa a nta hta amu yu hpajang ai ni, mun lahkawng hkying mali rai nga ma ai; hkying kru hte gaw tara agyi ni hte salang ni;

⁵hkying mali hte gaw chyinghka sin ai ni; bai hkying mali hte gaw, ngai Dawi galaw ai dum ai baw hte Yehowa hpe dum shakawn na, rai nga ma ai.

⁶Bai Dawi gaw, Lewi a shadang sha ni, Gershon, Kohat hte Marari a amyu hkan nna, shanhte hpe hpung mi hte hpung mi karan tawn mu ai.

⁷Gershon a shadang sha yan gaw, Ladan hte Shime rai ma ai.

⁸Ladan a shadang sha ni gaw, lat wa Yehiela, Zehtam hte Yoela, shanhte masum rai ma ai.

⁹Shime a shadang sha ni gaw, Shelomot, Haziela, Haran hte masum rai ma ai. Shanhte gaw kawa Ladan a nta dap ni a agyi ni rai nga ma ai.

¹⁰Bai Shime a kasha ni gaw, Yahat, Zina, Yeusha, Beria hte rai ma ai: dai mali gaw Shime a shadang sha ni rai nga ma ai.

¹¹Yahat gaw alat wa rai nga ai; Ziza gaw Nnaw ngu na rai nga ai: Yeusha yan Beria gaw shadang sha law law n lu ma ai majaw, kawa a nta dap hta jahpan lawm ma ai.

¹²Kohat a shadang sha ni gaw, Amram, Izhara, Hebron, Uziela hte mali rai ma ai.

¹³Amram a shadang sha yan gaw Arun yan Mawshe rai ma ai: Arun hte shi a shadang sha ni gaw, Yehowa a man e manam pyaw ai baw nat nawng na hte, shi hpe daw jau let shi a amying nsang hta shaman ya lu hkra, chyoi pra ai arai ni hpe tutnawng shachyoi shapra na matu, Arun gaw san da ai hkrum wu ai.

¹⁴Karai Kasang a masha wa Mawshe a shadang sha ni gaw, Lewi amyu hta hti lawm ma ai.

¹⁵Mawshe a shadang sha Gershom yan Eliaza rai ma ai.

¹⁶Gershom a shadang sha ni hta, Shebuela alat rai nga ai.

¹⁷Eliaza a shadang sha alat Rehabia rai lu ai: Eliaza gaw shadang sha kaga n lu ai: rai timung, Rehabia kasha ni grai law ma ai.

¹⁸Izhara shadang sha, alat Shelomit rai nga ai.

¹⁹Hebron a shadang sha ni gaw, alat wa Yeria, lahkawng ngu na Amaria, masum ngu na Yahaziela, mali ngu na Yekameam rai ma ai.

²⁰Uziela shadang sha yan gaw, alat Mihka hta Nnaw Ishia rai ma ai.

²¹Merari a shadang sha gaw, Mali yan Mushi rai ma ai. Mali a shadang sha gaw, Eleaza hte Kisha rai ma ai.

²²Eleaza gaw shadang sha n lu ai, shayi sha hkrai shaprat nna si mat sai. Kanau Kisha a shadang sha ni gaw shanhte hpe la mu ai.

²³Mushi a shadang sha ni gaw, Mali, Edera, Yeremot hte masum rai ma ai.

²⁴Da ndai gaw, asak hkun ning lai nna, Yehowa a nta hta amu gun hpai ai, Lewi shadang sha ni a kawa dap hkan nna, jahpan hta lawm ai amyu dap ni a agyi salang ni rai nga ma ai.

²⁵Kaning rai nme law, Dawi gaw, Israela Karai Kasang Yehowa, shi a amyu masha ni hpe ban sa ai jaw ya nna, shi gaw Yerusalem mare hta tutnawng anga nga ai:

²⁶Lewi masha ni mung, sumpan nta hte daw jau na matu dai hte seng ai arai ni hpe, ‘ya kaw nna htawm hpang de n hpai ra na sai,’ nga ai.

²⁷Kaning rai nga yang, Dawi a hpang jahtum na ga hte maren, asak hkun ning lai ai Lewi a shadang sha ni hpe jahpan la mu ai.

²⁸Lewi a kashu kasha ni a aya chyawm gaw, Arun a shadang sha ni hpe shingtep shingtau ai rai nga ai: dai rai nna shanhte gaw, Yehowa a nta hte, nta wang ni hta, gawk ni hta mung, chyoi pra ai arai ni mahkra hpe, Karai Kasang a nta hta shi hpe daw jau na matu, shachyoi shapra na mung;

²⁹madun da ai muk ni hpe, shadung hkungga jaw na matu mani ai shadung, matsi n rawng ai muk, di hta kabaw ai hpe rai timung, katsing rai timung, shadawn sharam ai lam shagu hta mung;

³⁰jahpawt shagu, shana shagu, Yehowa a chyeju hpe shakawn kungdawn na matu mung;

³¹ga shaka hte maren, laban nhtoi e mung, shata praw e mung, ladaw da ai poi nhtoi hta mung, Yehowa man e, tutnawng wan nat hkungga nawng ya na matu mung,

³²shawa masha ni hpawng nga ai sum hpe mung, chyoi pra ai shara hpe mung, Yehowa a nta hta daw jau na matu mung, tinang a kahpu kanau Arun a kashu kasha ni hpe shingtep shingtau na matu san da ai hkrum ma ai.