Read Jinghpaw Hanson Version Bible 1 HKAWHKAM LABAU 26 Bible Online

1 HKAWHKAM LABAU 26 - Jinghpaw Hanson Version Bible bible

1 HKAWHKAM LABAU 26

¹Bai, chyinghka sin ai hpung ni gaw: Kora amyu hta na, Asap a dap, Kore a kasha Meshelemia rai nga ai.

²Meshelemia gaw shadang sha shaprat ai: kasha alat gaw Zehkaria; lahkawng ngu na, Yediela; masum ngu na, Zebadia; mali ngu na Yatniela;

³manga ngu na, Elam; kru ngu na Yehohan; sanit ngu na Elihonai hte rai ma ai.

⁴Obed-edom mung shadang sha shaprat wu ai: kasha alat gaw Shemai; lahkawng ngu na Yehozaba; masum ngu na Yoa; mali ngu na Sahkara; manga ngu na Nehtanela;

⁵kru ngu na Amiela; sanit ngu na Isahka; matsat ngu na Peulhtai rai ma ai: kaning rai nme law, Karai Kasang shi hpe shaman ya wu ai.

⁶Shi a kasha Shemaia mung, shadang sha shaprat wu ai: shanhte gaw kawa nta dap ni hpe up ma ai: hpa majaw nga yang, shanhte gaw nden ja ai wa-ngan ni rai nga ma ai.

⁷Shemaia shadang sha ni gaw, Otni, Rehpaela, Obed, Elzaba hte n-gun ja ai shi a kanau Elibu Semahkia hte rai ma ai.

⁸Dai ni mahkra gaw Obed-edom a kashu kasha ni rai ma ai: shanhte mung, shanhte a kashu kasha ni hte kahpu kanau ni mung, daw jau na matu n-gun ja ai ni rai nga ma ai; Obed-edom hta na yawng marai kru shi lahkawng rai ma ai.

⁹Meshelemia mung, n-gun ja ai shadang sha hte kahpu kanau shi matsat rai lu ai.

¹⁰Merare amyu na Hosa mung shadang sha lu nga ai; Shimri gaw kasha alat n rai tim kawa gaw shi hpe kasha alat shatai wu ai;

¹¹lahkawng ngu na Hilkia, masum ngu na Tebalia; mali ngu na Zehkaria hte rai ma ai: Hosa a shadang sha ni hte kahpu kanau ni yawng marai shi masum rai ma ai.

¹²Da ndai gaw Yehowa nta hta daw jau na matu, shanhte a kahpu kanau ni hte maren aya lu ai chyinghka sin ai ni a agyi dap ni rai nga ma ai.

¹³Shanhte kaji kaba langai hte langai hpe tinang a kawa dap hkan nna, chyinghka sin na matu hpaida hte lata la mu ai.

¹⁴Sinpraw chyinghka, Shelemia hta ang wa ai. Dai hpang shanhte gaw hpaji daw chye ai, shi a kasha Zehkaria matu hpaida da nna, shi gaw dingdung maga ang wa ai.

¹⁵Obed-edom gaw dingda maga ang wa ai: shi a kasha ni gaw, rai tawn da ai nta hpe sin nga ma ai.

¹⁶Shupim hte Hosa gaw Shalek chyinghka makau na lung wa ai lam e, sin langa htap mi hte htap mi sin na matu, sinna maga ang wa ma ai.

¹⁷Shani shagu sinpraw maga de Lewi masha kru; dingdung maga de mali, dingda maga de mali; arai tawn da ai nta matu marai lahkawng hkawng;

¹⁸sinna maga na Parabara shara hta lam sin na matu marai mali, Parabara matu lahkawng rai nga ma ai.

¹⁹Da ndai gaw, Merari amyu Kora kashu kasha ni hta na chyinghka sin ai hpung ni rai nga ma ai.

²⁰Bai Lewi masha Ahiya gaw, Karai Kasang nta na sutdek hte, chyoi pra ai arai ni a sutdek ni hpe up nga ai.

²¹Gershon a amyu Ladan hta na kawa dap ni a agyi, Ladan a shadang sha Yehiela rai nga ai:

²²Yehiela a shadang sha Zehtam hte shi a kanau Yoela gaw, Yehowa nta na sutdek hpe up nga ma ai.

²³Amram amyu, Izhari a amyu, Hebron amyu hte Uziela amyu masha ni hta na nkau mi mung lawm ma ai.

²⁴Mawshe a dap Gershom a kasha Shebuela gaw sutdek ni hpe up nga ai.

²⁵Shi a kanau ni hta na Eliezera, rai nga ai: Eliezera kasha Rehabia a kasha Yeshaia, shi a kasha Yoram, shi a kasha Zihkri, shi a kasha Shelomot rai nga ai.

²⁶Shelomot hte shi a kanau ni gaw, hkawhkam Dawi hte kawa dap ni agyi ni ngu ai, hpyen ma hkying mi, hpyen ma latsa hte luksuk laba ni a bu ni tawn da ai chyoi pra ai sut rai ni mahkra hpe up nga ai.

²⁷Hpyen gasat nna lu la ai lanep hta na, Yehowa nta hpe lajang na matu, shanhte majai tawn da mu ai.

²⁸Myihtoi Samuela, Kisha kasha Shawlu, Nera a kasha Abna, Zeruia kasha Yoab hte gaw, majai tawn da ai rai yawng mayawng hpe, Shelomot hte shi a kanau ni up nga ma ai.

²⁹Izhari a amyu hta na Hkenania hte shi a shadang sha ni gaw, du hte tara agyi tai nna, Israela mungdan a magam amu gun hpai ma ai.

³⁰Hebron amyu hta Hashbia hte shi a kanau ni nden ja ai masha hkying me sanit tsa hte gaw, Yawdan hka sinna maga de nga ai, Israela amyu hta du tai nna, Yehowa hpe daw jau ai amu hte hkawhkam wa magam amu mahkra hpe gun hpai nga ma ai.

³¹Hebron amyu hta na, Hebron masha ni a kawa dap hkan yang, Yeriya gaw agyi rai nga ai. Dawi hkawhkam tai ai mali shi ning hta e, dai amyu ni hpe jahpan la yu yang, Gilead mung na Yazera mare hta nden ja ai masha mu hkrup ma ai,

³²Shi a kanau ni, nden ja ai masha kawa dap ni a agyi ni, marai hkying lahkawng sanit tsa hte gaw, Dawi hkawhkam san da ai hte maren, Rubin amyu, Gad amyu, Manashe amyu chyen mi hpe up nna, Karai Kasang hte hkawhkam wa a magam bungli shagu hpe gun hpai na matu, san da mu ai.