Read Jinghpaw Hanson Version Bible 1 HKAWHKAM LABAU 27 Bible Online

1 HKAWHKAM LABAU 27 - Jinghpaw Hanson Version Bible bible

1 HKAWHKAM LABAU 27

¹Hkawhkam wa a amu gun hpai nna, shata mi hte shata mi, shaning ting hta, tinang a hpung hte maren galaw ai masha ni gaw, kawa ni a dap hkan nna, hpyen ma hkying mi, hpyen ma latsa up ai bu ni a mying sawn nna, sa sa wa wa re ai ni hpe ningja yang, masha mun lahkawng hkying mali li rai nga ma ai.

²Shawng na ta hta, shawng na hpung hpe up ai wa gaw, Zabdiela kasha Yeshobeam rai nga ai: shi a hpung hta marai mun lahkawng hkying mali lawm ma ai.

³Shi gaw Paret a kashu kasha ni hta na rai nna, shawng na ta na luksuk bu mahkra ni a agyi rai nga ai.

⁴Shata lahkawng na hpung hpe up ai wa gaw Ahohi amyu Dodai rai nga ai: Miklot gaw du rai nga ai: shi a hpung hta marai mun lahkawng hkying mali lawm ma ai.

⁵Shata masum hta na sin langa ni a hpyen du masum ngu na wa, hkinjawng Yehoiada a kasha Benaia rai nga nna, agyi rai nga ai: shi a hpung hta marai mun lahkawng hkying mali lawm ma ai.

⁶Dai Benaia gaw share kaba rai nga ai hte, dai share sumshi hta lawm nna shanhte a agyi rai nga ai: shi a kasha Amizaba mung shi a hpung hta lawm nga ai.

⁷Shata mali hta na mali ngu na hpyen du wa, Yoab a kanau Asahela hte, shi a kasha Zebadia gaw shi a lawu e rai nga ai: shi a hpung hta marai mun lahkawng hkying mali lawm ma ai.

⁸Shata manga hta na manga ngu na hpyen du wa gaw, Izraha amyu Shamhut rai nga ai: shi a hpung hta marai mun lahkawng hkying mali lawm ma ai.

⁹Shata kru hta kru ngu na hpyen du wa gaw Teko masha Ikesha kasha Ira rai nga ai; shi a hpung hta marai mun lahkawng hkying mali lawm ma ai.

¹⁰Shata sanit hta na sanit ngu na hpyen du wa gaw, Ehprim amyu, Peloni dap na Helet rai nga ai; shi a hpung hta marai mun lahkawng hkying mali lawm ma ai.

¹¹Shata matsat hta na matsat ngu na hpyen du wa gaw, Zerahi amyu, Hushai dap na Sibehkai rai nga ai; shi a hpung hta marai mun lahkawng hkying mali lawm ma ai.

¹²Shata jahku hta na jahku ngu na hpyen du wa gaw, Ben-yamin amyu, Anahtot dap na Abiezera rai nga ai; shi a hpung hta marai mun lahkawng hkying mali lawm ma ai.

¹³Shata shi hta na shi ngu na hpyen du wa gaw, Zerahi amyu, Netohpat dap na Maharai rai nga ai: shi a hpung hta marai mun lahkawng hkying mali lawm ma ai.

¹⁴Shata shi langai hta na shi langai ngu na hpyen du wa gaw, Ehprim amyu, Perahton dap na Benaia rai nga ai: shi a hpung hta marai mun lahkawng hkying mali lawm ma ai.

¹⁵Shata shi lahkawng hta na shi lahkawng ngu na hpyen du wa gaw, Otniela amyu, Netohpat dap na Heldai rai nga ai: shi a hpung hta marai mun lahkawng hkying mali lawm ma ai.

¹⁶Bai, Israela ntsa e up ai du ni gaw: Rubin amyu hta, Zihkri a kasha du Eliezera; Simun amyu hta, Mahka a kasha Shehpatia;

¹⁷Lewi amyu hta Kemuela kasha Hashabia; Arun dap hta, Zadok;

¹⁸Yuda amyu hta, Dawi a kahpu Elihu: Yisahka amyu hta, Mihkaela kasha Omri;

¹⁹Zebulun amyu hta Obadia kasha Ishmaia; Naphtali amyu hta, Azriela kasha Yeremot;

²⁰Ehprim amyu hta, Azazia kasha Hoshea; Manashe amyu chyen mi hta, Pedaia kasha Yoela;

²¹Gilead mung na manashe amyu chyen mi hta, Zehkaria kasha Ido; Ben-yamin amyu hta, Abna a kasha Yasiela;

²²Dan amyu hta, Yeroham a kasha Azarela hte rai ma ai. Da ndai gaw Israela amyu ni hta up ai du ni rai nga ma ai.

²³Rai timung, Yehowa gaw Israela kashu kasha ni hpe lamu na shagan ni zawn shalaw na nme ai, nga ai majaw, Dawi gaw asak hkun ning n du ai ni hpe jahpan laika hta n shalawm mu ai.

²⁴Zeruia kasha Yoab gaw dai jahpan la hpang timung, n shangut lu wu ai: dai lam majaw Israela ntsa e tsin-yam tsindam du pru ai; hti lu ai nambat hpe mung, hkawhkam Dawi a labau laika hta n ka shalawn wu ai.

²⁵Bai, Adiela kasha Azmawet gaw, hkawhkam a kunhting wa rai nga ai: Uzia kasha Yonahtan gaw, yi hkauna, mare kahtawng hte hpyen dap ni a sutdek ni hpe up nga ai:

²⁶Hkelub a kasha Ezri gaw, yi hkauna galaw ai ni hpe up nga ai:

²⁷Ramat masha Shime gaw tsabyi sun ni hpe up nga ai: Shipmi amyu na Zabdi gaw tsabyi si hte tsabyi jahku tawn da ai nhkun ni hpe up nga ai;

²⁸Gederi masha Bala-hanan gaw, layang ga e tu ai tsanlun hpun hte lakum hpun ni hpe up nga ai: Yoasha gaw tsanlun sau nhkun ni hpe up nga ai:

²⁹Sharon masha Shitrai gaw, Sharon udat na yamnga hpung ni hpe up nga ai: Adlai kasha Shahpat gaw kadit hkan na yamnga hpung ni hpe up nga ai:

³⁰Ishmaela masha Obila gaw gawla-uk hpung ni hpe up nga ai: Meron masha Yedia gaw lawze ni hpe up nga ai: Hagri masha Yazi gaw sagu bainam hpung ni hpe up nga ai.

³¹Dai ni mahkra gaw hkawhkam Dawi a sutgan hkrai up ai ni rai nga ma ai.

³²Bai, Dawi a kawa di Yonahtan gaw, myit su ai wa rai nga nna, bawmung hte chyare wa rai nga ai: Hakmoni a kasha Yehiela gaw hkawhkam kasha ni a kanawn manang rai nga ai:

³³Ahihtohpela gaw hkawhkam a bawmung rai nga ai: Arhki masha Hushai gaw hkawhkam a jinghku rai nga ai.

³⁴Ahihtohpela lawu e Benaia kasha Yehoiada hte Abiahta rai nga ma ai: Yoab gaw hkawhkam a luksuk laba ni a bu rai nga ai.