Read Jinghpaw Hanson Version Bible 1 HKAWHKAM LABAU 28 Bible Online

1 HKAWHKAM LABAU 28 - Jinghpaw Hanson Version Bible bible

1 HKAWHKAM LABAU 28

¹Bai Dawi gaw, Israela du agyi ni ngu ai, amyu ni a du agyi ni hpe, hkawhkam wa san da ai sin langa ni a bu ni hpe, hpyen ma hkying mi up ai bu ni hpe, latsa up ai bu ni hpe, hkawhkam wa hte shi a kasha ni a sut rai yawng up ai kunhting ni hpe, du ni hte nden ja ai share ni yawng mayawng hte hpe, Yerusalem mare e zuphpawng shangun mu ai.

²Shaloi Dawi hkawhkam sa tsap nna, “Nye a hpunau ni hte amyu masha ni e, nye a ga madat mara ya mi: Yehowa a ga shaka sumpu shanu nga na shara hte, anhte a Karai Kasang a lagaw kabye lahkum nga na nta galaw na ngai myit hkut nna, dai nta matu arai hkyen da se ai.

³Rai timung Karai Kasang gaw, Nang hpyen gasat ai wa rai nga ndai hte, sai jahkaw kau ai majaw, nye mying nsang a matu nta galaw lu na nrai,” nga ai.

⁴“Shing nga timung, Ngai Israela amyu ntsa e prat dingsa e hkawhkam tai na nga Israela Karai Kasang Yehowa nan, nye wa nta na ngai hpe lata la ni ai; kaning rai nme law, agyi amyu tai na matu Yuda amyu hpe shi lata la wu ai: Yuda amyu hta nye wa nta hpe mung, Israela amyu yawng a ntsa e up na matu, nye wa a shadang sha ni hta shi ngai hpe sharawng awng ni ai:

⁵ngai shadang sha law law mayat timung, ngai sha Shawlumon langai hpe chyu sha shi lata la nna, Israela amyu ntsa e up let, Yehowa a mungdan tingnyang hta dung shangun wu ai.

⁶Ngai hpe mung, Na nsha Shawlumon gaw nye nta hte nye a wang ni hpe galaw na ra ai: ngai shi hpe kasha yin la nna, ngai shi a kawa tai na nngai.

⁷Shi gaw nye a hkang da ai ga hte matsun maroi ga hpe, dai ni na zawn, tutnawng hkan shatup a yang gaw, ngai shi a mungdan hpe htani htana prat dingsa shagrin da na we ai,” nga ai.

⁸“Dai re ai majaw, ndai mai kaja ai mungdan hpe nanhte madu lu nna, nanhte a kashu kasha shu mashi shu masha prat du hkra, sali wunli tai lu na matu, Yehowa shawa hpawng ngu ai, Israela a man e mung, anhte a Karai Kasang na lu ai a majaw mung, nanhte a Karai Kasang Yehowa hkang da ai ga yawng mayawng hte hpe hkan shatup nga mu law.”

⁹“Ya chyawm gaw, ngai sha Shawlumon e, na nwa a Karai Kasang hpe chye u: ngwipyaw ai myit hte tsawra ai kraw lawang hte, shi hpe daw jau u; Yehowa gaw myit masin mahkra hpe sawk yu nna, myit mamyit lam mahkra hpe chye ya nga ai: nang shi hpe tam yang, mu na wu ai; shi hpe kau da yang, nang hpe tutnawng kau da na ndai.

¹⁰Ya, sadi nga u; chyoi pra ai shara matu nta galaw na, Yehowa nang hpe lata la nit dai: da ting nga nna galaw u, ngu dat wu ai.”

¹¹Dai hpang Dawi gaw shi a kasha Shawlumon hpe, nta jan na kasi hte, nta a, sutdek ni a, ntsa gawk na, kata gawk na hte chyeju magap tawn da ai gawk na kasi kamang hpe mung;

¹²Yehowa a nta wang ni, grup yin e nga ai gawk ni, Karai Kasang a nta a sutdek ni hte majai tawn ai sut rai sutdek ni a kasi kamang ni hpe mung, shi a myit wenyi hta rawng ai hte maren, madun dan wu ai.

¹³Dai hta kaga shi gaw, hkinjawng ni hte Lewi hpung ni a matu mung; Yehowa a nta hta daw jau na amu mahkra hte, Yehowa a nta hta daw jau na matu arai mahkra hpe mung;

¹⁴daw jau yang, lam shagu hta lang ra ai aja rai ni a matu shen da ai aja; daw jau yang, lam shagu hta lang ra ai gumhpraw rai ni matu shen da ai gumhpraw:

¹⁵ja pyengdin shadun hte de a pyengdin ni langai hte langai a matu shen da ai aja; gumhpraw pyengdin shadun hte de a pyengdin langai hte langai a matu mung lang ra ai hte maren, ja gumhpraw shen ya wu ai:

¹⁶madun dan ai muk ni a aja ku, langai hte langai a matu aja; gumhpraw ku a matu gumhpraw mung shen ya wu ai:

¹⁷chyinghkyi ni, angdung ni, gawm ni gaw, ja jet rai nga ai: aja gawm ni, langai hte langai a matu, ja jet shen ya wu ai: gumhpraw gawm ni, langai hte langai a matu gumhpraw shen ya wu ai:

¹⁸manam pyaw ai baw nat na hkungri a matu ja jet shen ya wu ai: singkaw shachyen nna, Yehowa a ga shaka sumpu hpe ka-up nga ai hkerubim leng sumla a kasi kamang matu mung, aja shen ya wu ai.

¹⁹Shaloi Dawi gaw, “Ndai amu hte de a kasi kamang ni yawng mayawng, Yehowa a lata hte nye a ntsa e ka da nga ai majaw, ngai hpe chye na shangun nngai,” nga ai.

²⁰Bai Dawi gaw shi a kasha Shawlumon hpe, “N-gun da ting nna myit nden shaja u; dai amu hpe galaw u; hkum hkrit et; myit hkum hten et; nye a Karai Kasang, Karai Kasang Yehowa, nang hte rau rai nga ai: daw jau na amu matu Yehowa nta ngut wa lu hkra, nang hpe shinggan kau na, nang hpe kau da na, n rai.

²¹Bai, Yu u, Karai Kasang nta na daw jau na amu mahkra a matu, hkinjawng hte Lewi hpung ni nga ma ai: daw jau na matu, hpa baw amu rai timung, chye chyang ai ni kadai mung, nang hte rau nga nga na mara ai: hpyen du ni hte mung masha ni gaw, na a hkang ai ga hkrai hkan nang na mara ai,” ngu wu ai.