Read Jinghpaw Hanson Version Bible 1 HKAWHKAM LABAU 9 Bible Online

1 HKAWHKAM LABAU 9 - Jinghpaw Hanson Version Bible bible

1 HKAWHKAM LABAU 9

¹Shing rai Israela masha ni yawng amyu mi hte amyu mi ka da nga masai; yu mu, shanhte gaw Israela hkawhkam ni a ahtik labau laika hta ka da nga ma ai: Yuda amyu gaw tinang a yubak mara majaw Babelon mung de bawng woi wa ai hkrum ma ai.

²Shanhte a mare ni hte madu lu ai lamu ga hta shawng nga ai ni gaw, Israela masha ni, hkinjawng ni, Lewi masha ni hte Nehtinim ni rai nga ma ai.

³Yerusalem mare hta e, Yuda kashu kasha ni, Ben-yamin a kashu kasha ni, Ehprim hte Manashe a kashu kasha ni ngu ai,

⁴Amihu a kasha Uhtai; Amihu gaw Omri a kasha, Omri gaw Imri a kasha, Imri gaw Bani a kasha, Bani gaw Yuda a kasha Hparet a aru arat rai nga ai.

⁵Shilon masha ni hta na, kasha alat Asaia hte shi a kashu kasha ni lawm ma ai.

⁶Zera a kashu kasha ni hta na, Yeuela hte shi a kanau ni, marai kru tsa jahku shi rai ma ai.

⁷Ben-yamin a shadang sha ni gaw, Meshulam a kasha Salu; Meshulam gaw Hodawia kasha, Hodawia gaw Hasenua kasha rai ma ai.

⁸bai, Yeroham a kasha Ibnea; Uzi a kasha Ela; Uzia gaw Mihkri a kasha; bai, Shehpatia kasha Meshulam; Shehpatia gaw Reuela a kasha, Reuela gaw Ibniya a kasha rai nga ai:

⁹shanhte a kahpu kanau ni yawng amyu mi hte amyu mi, jahku tsa e manga shi kru rai nga ma ai. Dai ni yawng gaw tinang a kawa ni a dap lakung ni hta amyu agyi ni rai nga ma ai.

¹⁰Hkinjawng ni hta na Yedaia, Yehoiarib, Yahkin hte rai ma ai:

¹¹bai, Hilkia kasha Azaria; Hilkia gaw Meshulam a kasha, Meshulam gaw Zadok a kasha, Zadok gaw Meraiot a kasha; Meraiot gaw Karai Kasang a Nta up ai Ahitub a kasha rai nga ai:

¹²bai Yeroham a kasha Adaia; Yeroham gaw Pashura kasha, Pashura gaw Malhkiya a kasha; Malhkiya gaw Masai a kasha; Masai gaw Adiela kasha; Adiela gaw Yazera a kasha; Yazera gaw Meshulam a kasha; Meshulam gaw Meshilemit a kasha, Meshilemit Imera kasha rai ma ai;

¹³tinang a kawa ni a dap lakung ni a agyi ngu ai kahpu kanau ni gaw, hkying mi sanit tsa kru shi rai ma ai; shanhte gaw Karai Kasang a nta na daw jau na amu matu grai chye galaw ai ni rai ma ai.

¹⁴Bai, Lewi masha ni hta na, Hashuba kasha Shemaia; Hashuba gaw Azrikam a kasha; Azrikam gaw Hashabia kasha; dai ni gaw Merari a kashu kasha ni rai ma ai;

¹⁵bai, Bakbara, Heresha, Galala hte Mihka a kasha Matania; Mihka gaw Zihkri a kasha; Zihkri gaw Asap a kasha rai ma ai:

¹⁶bai, Shemai a kasha Obadia; Shemai gaw Galala kasha; Galala gaw Yeduhtun a kasha; bai, Asa a kasha Berehkia; Asa gaw Netohpa kahtawng ni hta nga ai Elkana a kasha rai nga ai.

¹⁷Bai, chyinghka sin ai ni gaw, Shalum, Akub, Talmon, Ahiman hte kahpu kanau ni rai nga ma ai: Shalum gaw agyi rai nga ai:

¹⁸Shanhte gaw ya du hkra, sinpraw maga na hkawhkam chyinghka sin ai ni rai nga ma ai: Lewi a kashu kasha ni a dap na chyinghka sin ai ni shanhte rai nga ma ai.

¹⁹Korah a dap Ebiasap a kashu, Kore a kasha Shalum hte shi a kahpu kanau Korah masha ni gaw, dai daw jau ai amu hpe bau sin na matu sumpan nta chyinghka hkinbawng hpe sin nga ma ai: shanhte a kaji kawa ni mung Yehowa a dap chyinghka lam hpe sin nga ai ni tai wa masai.

²⁰Eleaza a kasha Hpineha gaw moi shawng e shanhte a ntsa e up nga ai. Yehowa shi hte rau nga u ga.

²¹Bai Meshelemia kasha Zehkaria gaw, shawa hpawng a sum chyinghka hpe sin nga ai.

²²Chyinghka hkinbawng hpe sin na matu san da ai ni yawng hte gaw ni tsa shi lahkawng rai ma ai. Shanhte gaw kahtawng mi hte kahtawng mi hta tinang a ahtik labau hkan nna, Dawi hte myihtoi Samuela aya dang da ai ni rai ma ai.

²³Shing rai shanhte hte shanhte a kashu kasha ni gaw ladaw tawn da ai hte maren, Yehowa a nta ngu ai sumpan nta a chyinghka lam hpe sin nga ai.

²⁴Chyinghka sin ai ni gaw, sinpraw, sinna, dingdung, dingda, man mali sin nga ma ai.

²⁵Kahtawng ni hta nga ai shanhte a kahpu kanau ni gaw, shanhte hpe sa tau na matu, nhtoi ladaw sanit ya shagu sa du ma ai:

²⁶Kaning rai nme law, Lewi masha rai nga ai, chyinghka sin na aya lu ai agyi marai mali gaw, Karai Kasang nta na sutdek hte gawk kaga ni hpe sin na matu, tut tut anga nga ma ai.

²⁷Shanhte gaw Karai kasang a nta grup yin e nga nga ma ai: dai hpe sin na matu shanhte a amu rai malu ai: jahpawt shagu chyinghka hpaw na, shanhte a amu mung rai nga ai.

²⁸Bai, shanhte hta na nkau mi gaw daw jau yang lang ai gawm ni hpe sin nga ma ai; kaning rai nme law, jashawn yang mung, shapraw yang mung, dai ni langai hte langai hpe hti yu ma ai.

²⁹Bai nkau mi hpe gaw chyoi pra ai shara hte seng ai ku ni hte gawm ni mahkra hpe mung, mani ai shadung, tsabyi jahku, namman, lawban hte manam pyaw ai baw ni hpe lajang na matu san da mu ai.

³⁰Bai, hkinjawng kasha ni nkau mi gaw, manam pyaw ai baw sau ni hpe hpaw chye ma ai.

³¹Korah dap na, Shalum a kasha alat, Lewi masha, Matihtia gaw hpri pa hta kabaw ai muk pa ni hpe yu lajang na ahkang lu nga ai.

³²Shanhte a kahpu kanau ni, Kohat a kashu kasha ni nkau mi gaw, madun dan ai muk ni hpe laban nhtoi shagu lajang nga ma ai.

³³Dai ni gaw Mahkawn mangoi woi ai, Lewi a dap lakung a agyi ni hte, wang gawk ni hta nga nga let, amu kaga hte lawt ai ni rai nga ma ai: shanhte gaw shani shagu tinang hte seng ai amu ni hpe gun hpai nga ma ai.

³⁴Dai ni gaw Lewi a dap lakung ni a agyi ni hte, prat mi hte prat mi, woi awn ai ni rai nga ma ai: shanhte gaw Yerusalem mare hta e nga nga ma ai.

³⁵Gibeon shara hta e Gibeon a kawa Yeiela nga nga ai; shi a madu jan amying Mahka rai lu ai:

³⁶Shi a kasha alat gaw, Abdon; shi a kanau ni Zura, Kisha, Bala, Nera, Nadab,

³⁷Gedora, Ahio, Zehkaria, Miklot hte rai ma ai;

³⁸Miklot gaw Shimeam hpe shaprat wu ai. Shanhte mung, Yerusalem mare e tinang baw sang ni hte rau, kahpu kanau ni a tawtap e nga nga ma ai.

³⁹Bai Nera gaw Kisha hpe shaprat wu ai; Kisha gaw Shawlu hpe shaprat wu ai; Shawlu gaw Yonahtan Mahkishua, Abinadab, Eshbala hte hpe shaprat wu ai.

⁴⁰Yonahtan a kasha Meribala rai nga ai; Meribala gaw Mihka hpe shaprat wu ai.

⁴¹Mihka a shadang sha ni gaw, Pihton, Melek, Tarea, Ahaza hte rai ma ai.

⁴²Ahaza gaw Yara hpe, Yara gaw Alemet, Azmawet, Zimri hte hpe shaprat wu ai; Zimri gaw Moza hpe shaprat wu ai;

⁴³Moza gaw Binea hpe shaprat wu ai; Binea kasha Rehpaia, Rehpaia kasha Eleasa, Eleasa a kasha Azela rai ma ai.

⁴⁴Azela gaw shadang sha kru lu ai rai nna, shanhte a mying ni, Azrikam, Bohkeru, Ishmaela, Sheria, Obadia, Hanan rai nga malu ai: dai ni gaw Azela a kasha ni rai nga ma ai.