Read Jinghpaw Hanson Version Bible PRU MAT 1 Bible Online

PRU MAT 1 - Jinghpaw Hanson Version Bible bible

PRU MAT 1

¹Da ndai gaw Egutu mung de du sa ai Israela a shadang sha ni a amying rai nga malu ai; tinang a ndum nta hte htep, kawa Yaku hte rau du sa ai ni yawng gaw,

²Rubin, Simun, Lewi, Yuda;

³Yisahka, Zebulun, Ben-yamin;

⁴Dan, Naphtali, Gad Ashe hte rai ma ai.

⁵Yaku a nshang nna hkrat ai shinggyim masha yawng hte gaw marai sanit shi rai ma ai: Yawsep chyawm gaw Egutu mung e nga magang nga sai.

⁶Ya Yawsep hte shi a kahpu kanau ni mung, dai prat na ni nlang hte mung si mat masai.

⁷Israela a kashu kasha ni chyawm gaw mayat maya wa nna, tsanawn nga ma ai hte law htam wa let ja ja kaba wa nga ma ai: dai mung ting hkan e shanhte hpring at nga ma ai.

⁸Dai shaloi Yawsep hpe n chye ai hkawhkam ningnan, Egutu mung ntsa e paw pru wa ai.

⁹Dai wa gaw shi a mung masha ni hpe, Yu mu, Israela a kashu kasha ni a amyu gaw law htam nga ma ai hte anhte hta grau ja nga ma ai:

¹⁰ya sa marit, shanhte n law wa lu na hte majan pru yang anhte a hpyen maga de shang nna anhte hpe gasat kau da nhtawm, ndai mung na n lung mat wa lu mu ga, shanhte hpe zai hte galaw gaw, ngu wu ai.

¹¹Dai rai nna Egutu du ni gaw amu bungli hte shanhte hpe sharu shatsang na matu shanhte a ntsa e hpareng tawn da mu ai: shanhte mung Hpara-u a matu rai tawn da na mare Hpihtum hte Ramese de ya mu ai.

¹²Rai timung shin di zingri ai hte shanhte je law wa nna hpring chyam nga ma ai: dai rai nna shanhte gaw Israela a kashu kasha ni a majaw myit ru nga ma ai.

¹³Shing rai Egutu masha ni gaw Israela a kashu kasha ni hpe nhtum nni di nna yam da mu ai:

¹⁴wut shakap hkumpup hte wut galaw ai amu hte mung, Yi hkauna galaw amu lam shagu hte mung, shanhte hpe galaw shangun ai ru tsang ai mayam amu lam shagu hte mung, shanhte a asak hpe jahki shaba ya da mu ai.

¹⁵Dai hta kaga Egutu hkawhkam gaw, Hebre numsha ni hpe shangai karum rum re ai Shipra hte Hpua mying ai shangai karum num yan hpe,

¹⁶Nan Hebre numsha ni hpe shangai karum nna, dai shangai punghkum hta shanhte ma shangai nga yang, lasha rai yang gaw sat kau ya mu, numsha rai jang chyawm gaw jahkrung da mu, ngu nna hkang dam u ai.

¹⁷Shangai karum num yan chyawm gaw Karai Kasang hpe hkrit hkungga ma ai rai nna, Egutu hkawhkam hkang da ai hku n hkan ai sha, lasha ni hpe jahkrung da ya mu ai.

¹⁸Dai re ai majaw Egutu hkawhkam gaw shangai karum num yan hpe bai shaga nna, “Lasha ni hpe jahkrung da ai ma gaw, hpa re ai rai myit ta?” ngu wu ai.

¹⁹Shangai karum num yan gaw, Hebre numsha ni Egutu numsha ni zawn n rai ma ai; shanhte tsam rawng ma ai rai nna, shangai karum ai jan garai n du yang, shanhte shangai ngut kau kau rai ma ai, ngu nna Hpara-u hpe htan mu ai.

²⁰Dai rai nna Karai Kasang gaw shangai karum num yan hpe chyeju jaw mu ai: dai amyu mung law htam wa nna ja ja galu kaba wa ma ai.

²¹Shing rai, shangai karum num yan Karai Kasang hpe hkrit hkungga ma ai majaw, shi gaw shan a matu dinghku shachying ya mu ai.

²²Bai Hpara-u gaw shi a mung masha ni nlang hte hpe hkang da nna, Shangai tawn ai lasha ma yawng hte hpe hka hta kabai bang kau ya mu; numsha ma hpe chyawm gaw jahkrung da ya mu, ngu nna tsun dan mu ai.