Read Jinghpaw Hanson Version Bible PRU MAT 12 Bible Online

PRU MAT 12 - Jinghpaw Hanson Version Bible bible

PRU MAT 12

¹Shaloi Yehowa Egutu mung e Mawshe yan Arun hpe shaga la nna tsun wu ai gaw:

²“Ndai shata gaw nanhte a shawng shata ngu ai, shaning shagu na shata langai rai na, rai malit dai.

³Israela a shawa hpung hpe ning ngu tsun dat mu: Ndai shata shi ya shani e shanhte mahkra gaw, htinggaw langai hte langai, tinang htinggaw hkan nna htinggaw mi hta sagu kasha langai ngai la san da na rai ma ai.

⁴Htinggaw kaji nna, sagu kasha langai mi n dang yang gaw, masha sawn yu nna shi a nta hte grau ni ai htingbu hte kahkyin nhtawm, sagu kasha langai mi la da na rai ma ai: htinggaw langai hte langai, sagu kasha langai mi sha law na hte masha hti yu na rai myit dai.

⁵Sagu kasha rai timung, bainam kasha rai timung nanhte la na mahtang gaw, n hten ai hte ladu hkrum ai ala kasha rai na rai malit dai:

⁶dai shata shi mali ya du hkra, nanhte dai hpe rim tawn da na rai myit dai; shaloi Israela shawa hpung nlang hte, dai shana de dai hpe sat na rai myit dai.

⁷Dai sagu kasha sat sha ai nta shagu gaw de a sai la nna, dai nta a chyinghka hkadun daw lahkawng hte hkanoi hta chya da na rai mu ai.

⁸Dai shana e dai shan hpe wan hta kakang nhtawm, matsi n rawng ai muk hte sha na rai mu ai: hka ai shatmai lap hte mung sha na rai mu ai.

⁹Shan katsing hpe rai timung, shadu shapyaw ai mung hkum sha mu ga; abaw, lagaw, apu asin ni hpe mung wan hta kakang nna she sha mu.

¹⁰Shan dai hpe jahpawt du hkra hkum ngam da mu; jahpawt du hkra ngam na hpe gaw, wan hta ju kau na rai mu ai.

¹¹Dai hpe nanhte ning rai sha na rai myit dai; nshang e shingkyit kyit, lagaw hta kyepdin din, dawhkrawng lang rai nna, alawan wan sha na rai myit dai: dai gaw Yehowa a shalai dat ai poi rai nga ai.

¹²Kaning rai nme law, dai shana e Egutu mung hta ngai dinghkren mat wa nna, masha kaw nna yamnga du hkra, Egutu mung a kasha alat nlang hte hpe sat kau na mawe ai; Egutu hpara mahkra hpe mung ngai jeyang na mawe ai: ngai Yehowa rai nga nngai.”

¹³“Dai asai gaw nanhte a nta ni hta nanhte a matu masat dingsat tai na ra ai rai nna, dai hpe ngai mu jang, ngai nanhte kaw na lai mat wa na nngai; shing di ngai Egutu mung hpe ari jaw na we ai shaloi, jahten shabya ai ari gaw nanhte hpe hkra lu na n rai.”

¹⁴“Dai nhtoi gaw nanhte adum nga na nhtoi tai na ra ai rai nna, dai hta e Yehowa a matu poi galaw na rai myit dai: dai gaw prat dingsa na matsun maroi rai nga ai rai nna, dai poi hpe prat mi hte prat mi nanhte a galaw nga na rai myit dai.”

¹⁵“Sanit ya tup matsi n rawng ai muk nanhte sha nga na rai myit dai; nnan shani nna pyi, nta hkan na matsi nanhte seng kau na rai myit dai; kaning rai nme law, nnan shani kaw nna sanit ya nhtoi du hkra matsi rawng ai muk sha ai wa gaw, Israela a amyu hta na sumri dan kau ya ai hkrum na ra ai.”

¹⁶“Shawng shani hta e chyoi pra ai zuphpawng hpawng na rai myit dai; sanit ya nhtoi hta mung chyoi pra ai zuphpawng hpawng na rai myit dai: dai nhtoi yan hta masha hkum shagu lusha ra ai shat galaw sha amu hta kaga, hpa amu mung galaw lu na n rai.”

¹⁷“Dai azuma poi hpe nanhte dum nga lu na rai myit dai; kaning rai nme law, dai nhtoi hta nanhte a wunawng wuwa ni hpe ngai Egutu mung na woi shapraw wa made ai: dai re ai majaw, dai nhtoi hpe prat dingsa na matsun maroi rai nga ai hte maren prat mi hte prat mi nanhte hkan nga lu na rai myit dai.”

¹⁸“Shawng shata shi mali ya shana de kaw nna, dai shata hkun langai ya shana de du hkra matsi n rawng ai muk nanhte sha nga na rai myit dai.”

¹⁹“Sanit ya tup nanhte a nta ni hta matsi rawng nga lu na n rai; matsi rawng ai muk sha ai wa gaw, sa shingbyi nga ai wa rai timung, dai mung e dai daw ai wa rai timung, Israela a shawa hpung hta na, sumri dan kau ya ai hkrum na ra ai.”

²⁰“Matsi rawng ai baw hpa mung nanhte sha lu na rai myit dai, ngu tsun u,” ngu wu ai.

²¹Shaloi Mawshe gaw Israela masha ni a salang ni nlang hte hpe shaga la nna shanhte hpe, “Pru wa mu, htinggaw shagu tinang nang a matu sagu kasha san la nna, shalai dat ai poi hkungga sat mu.”

²²“Kinla pu nhtan mi la nna, ang hta rawng ai sai hta kapruk nhtawm, hkanoi hte hkadun daw yan hta, ang hta na sai hte kabat bun na rai myit dai: dai hta kaga, jahpat du hkra kadai mung tinang a nta chyinghka na pru lu na myit dai n rai.”

²³“Kaning rai nme law, Egutu masha ni hpe ari jaw na nga, Yehowa dinghkren mat wa na ra ai: dai hkanoi hte hkadun daw yan hta na sai hpe mu jang, Yehowa dai chyinghka hpe lai kau da na wu ai rai nna, jahten shabya ai wa gaw nanhte hpe jahten na, nanhte a nta hta shang lu na ahkang shi jaw na wu ai n rai.”

²⁴“Dai gaw nanhte hta mung, nanhte a kashu kasha ni hta mung, matsun maroi tai nga na rai nna, dai lam hpe prat dingnawng hkan nga lu na rai myit dai.”

²⁵“Ga ndat nga ai hte maren Yehowa nanhte hpe jaw na marin dai, dai mung de nanhte du wa ai shaloi ndai daw jau ai amu nanhte galaw nga na rai myit dai.

²⁶Nanhte a kashu kasha ni gaw, Ning re ai daw jau lam gaw hpa nga mayu ai rai ta? nga nna san myit yang,

²⁷Nanhte gaw, Yehowa Egutu masha ni hpe ari jaw ai shaloi, anhte a nta ni hpe shalawt yang na, Egutu mung e Israela kashu kasha ni a nta ni hpe lai kau da ai, Yehowa a shalai dat ai hkungga rai nga ai, ngu nna shanhte hpe tsun dan lu na rai myit dai,” ngu wu ai: shing nga tsun ngut jang amyu masha ni gaw baw dagup nna nawku nga ma ai.

²⁸Israela a kashu kasha ni mung pru wa nna shing rai galaw ma ai: Yehowa Mawshe yan Arun hpe hkang da mu ai hte maren shanhte galaw nga ma ai.

²⁹Shaloi yuptung hpawa e Yehowa gaw tingnyang hta dung nga ai Hpara-u a kasha alat kaw nna, htawng e bawng dung nga ai wa a kasha alat du hkra, Egutu mung na kasha alat nlang hte hpe mung yamnga a kasha alat nlang hte hpe mung, yamnga a kasha alat nlang hte hpe mung sat kau wu ai.

³⁰Dai shana e Hpara-u hte shi a agyi salang ni nlang hte mung, Egutu masha ni nlang hte mung, rawt nna, si mang n taw ai nta langai mi mung n nga sai majaw, Egutu mung e sharung shayawt kaba rai nga ai.

³¹Dai shana jang Mawshe yan Arun hpe shaga la nna, “Rawt mu, nan hte nawng Israela kashu kasha ni nlang nye a amyu kaw na pru mat wa mu: nan tsun myit dai hte maren Yehowa hpe sa naw jau mu.

³²Nan tsun myit dai hte maren nanhte a sagu bainam, yamnga hpung ni gawt nna sa wa masit: ngai e mung shaman ya da mi,” ngu nna tsun wu ai.

³³“Egutu masha ni mung, Anhte nlang chyasi rai ma saga ai, nga nna tsun let,” dai mung na shanhte hpe alawan shapraw dat na gawt shadut mu ai.

³⁴Dai amyu masha ni gaw matsi garai n rawng ai muk katsing la nna, muk gumrin ai n-gawt ni hpe mung tinang a hpun nba hte makai nna hpai ma ai.

³⁵Mawshe tsun da ai hte maren Israela kashu kasha ni galaw nna, gumhpraw rai, aja rai hte hpun palawng Egutu mash ni kaw na hpyi la mu ai:

³⁶hpyi ai hte maren lu la hkra, dai amyu hpe Egutu masha ni a man e Yehowa myi man pa shangun wu ai rai nna, shanhte gaw Egutu masha ni hpe akrin atsai di kau mu ai.

³⁷Shaloi Israela kashu kasha ni gaw Ramese kaw nna Suhkut de sa wa ma ai: ma kaji e n hti yang lagaw hte hkawm lu ai wa-ngan sen kru daram rai ma ai.

³⁸Amyu kaga law law ni mung, sagu bainam, yamnga hpung law law hte shanhte kaw hkan nang lung wa ma ai.

³⁹Egutu mung na tin shapun gawt kau ai hkrum nna, n hkring lu mu ai hte, sha jarit n shachyip rau ma ai majaw, Egutu mung na la wa ai muk katsing hpe matsi n rawng ai ta kabaw sha ma ai.

⁴⁰Ya Israela kashu kasha ni Egutu mung e sa shingbyi nga ai aprat gaw, mali tsa e sumshi ning rai malu ai.

⁴¹Dai mali tsa e sumshi ning du ai shani hta nan, Yehowa a wunawng wuwa ni Egutu mung hta na pru wa ma ai.

⁴²Egutu mung na shanhte hpe shapraw wa mu ai majaw, dai shana gaw, Yehowa a matu grau dum mai shana rai nga ai; dai shana gaw, Israela kashu kasha ni prat mi hte prat mi hkan nga na, grau dum mai ai Yehowa a shana rai nga ai.

⁴³Bai Yehowa gaw Mawshe yan Arun hpe, “Ndai gaw shalai dat ai hkungga a matsun rai nga ai: amyu kaga mash kadai mung dai sha lawm lu na n rai;

⁴⁴rai timung, gumhpraw hte mari ai mayam gaw, matu gadoi hkam sai rai yang, sha lawm lu na rai nga ai.

⁴⁵Sa shingbyi nga ai manam hte shabrai sha ai nchyang sha rai yang gaw, dai sha lawm lu na n rai.

⁴⁶Hkungga langai mi hpe nta langai hta sha, sha lu na rai myit dai: dai shan hpe shinggan da la shapraw lu na n rai: nra langai mi mung mai daw na myit dai n rai.

⁴⁷Israela shawa hpung nlang hte gaw dai poi galaw lu na rai ma ni.

⁴⁸Nang kaw sa manam nga ai amyu kaga wa Yehowa a matu shalai dat ai poi galaw mayu yang gaw, shi kaw na lasha nlang hte matu gadoi ai lam hkam u ga; shaloi dai wa gaw, dai mung hta dai daw ai wa zawn rai sai majaw, shi sit nna dai poi hta shang u ga; matu gadoi n hkam ai kadai mung dai poi hta shang sha lu na n rai.

⁴⁹Amyu madung hta na wa a matu mung, nanhte kaw shingbyi nga ai manam a matu mung, tara lam langai sha rai nga ai, ngu wu ai.”

⁵⁰Israela kashu kasha ni nlang hte mung shing rai galaw ma ai. Mawshe yan Arun hpe Yehowa hkang da ai hte maren shanhte galaw ma ai.

⁵¹Dai shani hta nan Yehowa gaw Israela kashu kasha hpung wunawng wuwa ni hpe, Egutu mung na shapraw wa wu ai.