Read Jinghpaw Hanson Version Bible PRU MAT 15 Bible Online

PRU MAT 15 - Jinghpaw Hanson Version Bible bible

PRU MAT 15

¹Dai shaloi Mawshe hte Israela kashu kasha ni gaw, ndai mahkawn mangoi ga hte Yehowa hpe ning nga mahkawn mangoi ma ai: “Yehowa hpe ngai mahkawn mangoi na nngai: Shi gaw magam shingkang dan hkung let ninglaw nga ai. Gumra hte dai hta jawn ai wa hpe nawng hta gumpye bang kau nu ai.

²Yehowa gaw nye a n-gun, nye a mahkawn mangoi shara rai nga ai. Nye a hkye hkrang la ai lam shi tai ya sai: Shi gaw nye a Karai Kasang rai nga li ai rai nna, ngai shi hpe shakawn na we ai; Ngai ji ngai wa ni a Karai Kasang shi rai nga ai rai nna, ngai shi hpe shagrau na we ai.

³Yehowa gaw hpyen laba du rai nga ai, Shi a amying ningsang Yehowa rai nga lu ai.

⁴Hpara-u a hpyen leng ni hte hpyen hpung ni hpe, dai nawng hta gumpye bang kau nu ai; San da ai hpyen du ni mung, dai nawng hkyeng hta lup mat masai.

⁵Le sung ai shara gaw shanhte hpe magap kau wu ai, Nlung zawn shanhte gaw le sung ai de yu hkrat wa ma ai.

⁶Yehowa e, na hkra lata gaw, n-gun hte dan hkung nga lit dai; Yehowa e, na hkra lata gaw hpyen ni hpe agrawp kau nu ai.

⁷Nang hpe hpyen ai ni e, na a daru magam shingkang hte nang kaming kamawng di kau nu ai: Na a pawt ai shadawng dat dat nna, shanut zawn shanhte hpe hkru kau nu ai.

⁸Na a ladi na shaw ai nsa hte hka hpungnung ni gumdin mat wa ma ai: Lwi nga ai hka hpungla ni rawt tsap jan jan rai nga ma ai; Dai nawng a ka-ang na sung ai hka hpung ni ting ting hkang hkang rai nga ma ai.

⁹Dai hpyen wa tsun ai gaw: ngai hkan shachyut na, ngai dep na we ai; Ngai lanep karan la na we ai: shing di shanhte hta ngai mashi asat na we ai: Nye a nhtu ngai shaw nna, shanhte hpe ngai hpya kau na we ai,” nga ai.

¹⁰Na nbung hte nang a hpawt dat nna, dai nawng gaw shanhte hpe magap kau nu ai; Dai hka hpungtang de machyu zawn shanhte lup mat masai.

¹¹Yehowa e, hpara ni hta nang zawn re ai kadai wa nga na a ta? Mauhpa ningsam madun let, shakawn ging ai hkrithpa lam shapraw nna, Chyoi Pra ai hta dan hkung nga ai wa, nang zawn re ai kadai nga a ta?

¹²Na a hkra lata nang ladawn dat nna, Aga gaw shanhte hpe mayu kau nu ai.

¹³Nang hkye hkrang la ai amyu hpe, matsan dum ai hte nang woi wa nit dai; Na a chyoi pra ai nga shara de, na a chyeju ningsam hte nang shanhte hpe lam woi madun wa nit dai.

¹⁴Masha amyu ni dai na nna, hkrit gari nga ma ai: Hpiliste masha ni kawa machyi hkrum ma ai.

¹⁵Dai shaloi Edom du ni mau mahka nga ma ai, Moba share ni hkrit gari hkrum nga ma ai: Hkanan masha ni nlang minla byaw mat masai.

¹⁶Ma kajawng ai hte hkrit gari ai shanhte a ntsa e du sai: Yehowa e, na a amyu kawt mat wa ai shaloi, Nang hkrang la ai amyu lai wa lu ai shaloi, Na nsam rawng ai lahpum majaw shanhte nlung zawn atsin sha nga nga ma ai.

¹⁷Yehowa e, Sali wunli bum ngu ai, Nang shanu nga na, nang mazing da ai shara de, Nang, madu de da ai nawku htingnu de, Nang shanhte hpe woi tawn da na rin dai.

¹⁸Yehowa gaw htani htana prat dingsa a up nga na ra ai, nga ma ai.

¹⁹Kaning rai nme law, Hpara-u gumra ni, shi a hpyen leng ni hte gumra jawn ai ni, dai nawng hta shang ma ai rai nna, Yehowa gaw dai nawng na hka shanhte a ntsa e bai nhtang lwi shangun wu ai: Israela kashu kasha ni chyawm gaw dai nawng ka-ang e hkarang hku hta hkawm sa wa ma ai.

²⁰Shaloi, Arun a kana, myihtoi num Miriam gaw shi a lata hta chying lang nna, numsha ni mahkra mung chying dum ai hte ka let shi a hpang e hkan nang ma ai.

²¹Miriam gaw shanhte hpe woi awn let, “Yehowa hpe mahkawn mangoi mu, Shi gaw magam shingkang hte dan hkung let ninglaw nga ai. Gumra hte dai hta jawn ai wa hpe nawng hta gumpye bang kau ni ai,” nga nna mahkawn mangoi nga ai.

²²Ya Mawshe gaw Israela amyu hpe dai nawng hkyeng na woi pru wa nna, Shura nam mali de shang wa ma ai: shanhte gaw dai nam mali hta masum ya sat hkawm wa ma timung hka n mu lu ma ai.

²³Mara ngu ai shara de du ma yang, Mara na ntsin hpe hka ai majaw shanhte n lu lu ma ai: dai rai nna, de a amying Mara rai lu ai.

²⁴Shaloi dai amyu masha ni Mawshe hpe, “Anhte hpa lu na rai nga ga ta?” ngu nna aput mu ai.

²⁵Dai majaw shi gaw Yehowa hpe hpyi jahtau wu ai; Yehowa mung shi hpe hpun langai mi madun wu ai rai nna, hpun dai hpe hka hta kabai bang wu yang, hka dai mu wa ai. Dai yang e shi shanhte a matu ga madat hte hkang ai tara langai mi tawn da nna, dai yang e shanhte hpe chyam yu wu ai:

²⁶shi gaw, “Na a Karai Kasang Yehowa a nsen hpe nang azin ayang madat nna, shi a man e dingman ai hku galaw ndai hte, shi hkang da mada hpe nang madat mara ya nna, shi a ga matsun nlang hte hpe hkan nang n yang gaw, Egutu masha ni hta ngai shakap ai ana ahkya langai mi mung nang hta shakap na n rai: ngai gaw nang hpe shamai ya ai Yehowa rai nga nngai,” ngu wu ai.

²⁷Dai kaw nna shanhte gaw, hka deng shi lahkawng hte namhtan hpun sanit shi tu ai Elim shara de du nna, dai hka makau e but nga ma ai.