Read Jinghpaw Hanson Version Bible PRU MAT 17 Bible Online

PRU MAT 17 - Jinghpaw Hanson Version Bible bible

PRU MAT 17

¹Ya Israela kashu kasha shawa hpung ting, Yehowa a ga hte maren, Sin nam mali na pru nhtawm, hkau mi hte hkau mi sat sa wa nna Rehpidim e but ma ai; dai kaw e amyu masha ni lu na hka n nga ai.

²Dai re ai majaw amyu masha ni gaw, “Anhte hpe lu na ntsin jaw mi,” nga nna Mawshe hte ndang kalang hkat nga ma ai. Mawshe mung, “Nanhte ngai hpe hpa rai ahtu nga myit ta? hpa rai Yehowa hpe chyam yu nga myit ta?” ngu nna shanhte hpe htan mu ai.

³Dai kaw e amyu masha ni hpang kara nna, Mawshe hpe aput let tsun ma ai gaw, “Anhte hte anhte a kashu kasha ni hpe mung, anhte a yamnga ni hpe mung hpang kara ai hte sat kau na rai yang gaw, hpa majaw Egutu mung na anhte hpe woi wa n ta?” ngu mu ai.

⁴Shaloi Mawshe gaw Yehowa hpe jahtau nna, Ndai amyu hpe ngai kaning di na mawe ta? ngai hpe nlung hte sat magang wa da mi ai,” ngu nna hpyi wu ai.

⁵Dai rai nna Yehowa gaw Mawshe hpe, “Dai amyu masha ni a shawng e sa wa su; Israela a agyi salang ni nkau mi hpe mung shaga woi u; dai hka nu kayat ai na a dawhkrawng lang let sa wa su:

⁶Yu u, Horeb bum na lunghkrung ntsa hta na a man e ngai tsap nga na ring ngai; nlung dai hpe nang kayat na wu ai rai nna, amyu masha ni lu na matu, dai nta na ntsin lwi pru na ra ai,” ngu nna tsun wu ai. Mawshe mung Israela a agyi salang ni a man e shing di galaw wu ai.

⁷Dai Kaw e Israela kashu kasha ni gaw, “Yehowa anhte hta nga nga ai kun, n nga nga ai kun,” nga nna Yehowa hpe chyam dinglik yu ai hte ndang kalang hkat ai lam a majaw, shara dai hpe ‘Masa’ ngu nna mung, ‘Meriba’ ngu nna mung shamying mu ai.

⁸Dai shaloi Amalek masha ni sa pru nna, Rehpidim e, Israela amyu hpe sa gasat ma ai.

⁹Dai majaw Mawshe gaw, “Yawshu hpe, Masha lata la nna Amalek ni hpe gasat na pru su; hpawt de, Karai Kasang a dawhkrawng lang nna, dai kawng pungding e ngai tsap nga na ring ngai,” ngu nna tsun wu ai.

¹⁰Shing rai Mawshe hkang dat ai hte maren Yawshu galaw nna Amalek ni hpe gasat wu ai; Mawshe, Arun, Hura hte gaw dai kawng pungding de lung wa ma ai.

¹¹Ya Mawshe gaw shi a lat sharawt wu yang, Israela masha ni dang wa ma ai; shi a lata jahkrat yang gaw Amalek ni dang wa ma ai.

¹²Rai timung Mawshe a lata tsu wa lu ai rai nna, shan gaw nlung langai mi la nhtawm, dai hta shi hpe shadun wu ai: shing rai Arun yan Hura mung maga mi de langai ngai nga nna shi a lata pawn shadaw ya mu ai: dai rai nna jan du hkra shi a lata sharat dingyang rai nga lu ai.

¹³Yawshu mung Amalek du wa hte shi a masha ni hpe nhtu hte shayu kau wu ai.

¹⁴Dai Majaw Yehowa gaw Mawshe hpe, “Sumsing lamu a npu na Amalek amying hpe ngai teng teng shaprai kau na we ai, rai nna, lam ndai hpe dum nga na matu laika hta ka da nhtawm, yawshu a na hta hti dan u,” ngu wu ai.

¹⁵Mawshe mung tawn hkungri galaw nna, dai hpe Yehowa ‘nisi’ ngu nna shamying wu ai;

¹⁶dai gaw, “Yehowa a tingnyang de ladawn ai lata rai nta ai majaw, Yehowa gaw Amalek hpe prat dingsa gasat nga na sai,” nga ai rai lu ai.