Read Jinghpaw Hanson Version Bible PRU MAT 18 Bible Online

PRU MAT 18 - Jinghpaw Hanson Version Bible bible

PRU MAT 18

¹Dai shaloi Midian hkinjawng wa Mawshe a katsa Yehtru gaw, Karai Kasang Mawshe hte shi a amyu Israela a matu galaw ai lam nlang hpe mung, Yehowa Israela hpe Egutu mung na shaw wa ai lam mung na wu ai.

²Ya, Mawshe a katsa Yehtru gaw, Mawshe dat tawn da ai madu jan Zihpura hte shi a shadang sha yan hpe woi nna, sa wa ai:

³kasha langai mi a amying gaw Gershom rai lu ai; dai gaw, ‘Masha mung ga e ngai tsasam manam tai mat ni ai,’ nga ai rai lu ai:

⁴langai mi a amying gaw Eliaza rai lu ai; dai gaw, ‘Ngai wa a Karai Kasang ngai hpe karum nna, Hpara-u a nhtu hta na ngai hpe hkye la ni ai,’ nga ai, rai lu ai.

⁵Shing rai Mawshe a katsa Yehtru gaw shi a kashu yan hte kasha jan hpe woi nna, dai nam mali Karai Kasang a bum makau e dap jung nga ai Mawshe kaw du sa wa ai rai nna,

⁶Ngai na ntsa Yehtru hte, na madu jan, kasha ni, nang kaw du sa ra ga ai, ngu nna Mawshe hpe tsun wu ai.

⁷Shaloi mawshe mung, katsa hpe tau la na nga pru nna, gum dagup nhtawm shi hpe pup wu ai: shing rai shada da hkam kaja ai lam san let, sum kata de shang wa ma ai.

⁸Shaloi Mawshe gaw shi a katsa hpe, Yehowa Israela matu Hpara-u hte Egutu masha ni hta galaw ai amu lam nlang hte mung, lam hkan e shanhte hkrum hkra ai lam nlang hte hte Yehowa shanhte hpe kaning di mawai la ai lam hpe mung, hkai dan wu ai.

⁹Yehtru mung, Yehowa Israela hpe madun dan ai chyeju lam mahkra hte Egutu masha ni a lata na shanhte hpe hkrang la ai majaw, kabu gara nga ai.

¹⁰Dai majaw Yehtru gaw, Egutu masha ni a lata na mung, Hpara-u a lata na mung nanhte hpe shaw hkrang la nna, ndai amyu hpe egutu masha ni a lata na shaw hkrang la ai Yehowa gaw a nga u ga law.

¹¹Hpara mahkra hte hta Yehowa grau kaba nga ai gaw, ya ngai chye se ai; shanhte myit tsaw gumlawt ai hta dai lam hkrum sha ma ai, nga ai.

¹²Shaloi Mawshe a katsa Yehtru gaw Karai Kasang a matu wan nat hkungga hte mayu hkungga la sa ai rai nna, Arun hte Israela agyi salang ni mahkra gaw, Mawshe a katsa hte shat rau sha na nga, Karai Kasang a man de sa ma ai.

¹³Hpang shani e Mawshe gaw amyu masha ni hpe tara dawdan ya na nga, dung nga ai: dai masha ni mung jahpawt kaw nna shana de du hkra Mawshe kaw tsap nga ma ai.

¹⁴Dai amyu masha ni hta Mawshe galaw ai amu nlang hpe shi a katsa mu ya wu yang, shi gaw, “Dai amyu hta nang galaw ai lam gaw kaning re ai rai nga lit ta? Nang hkrai sha dung nga nna, amyu masha ni na a man e jahpawt kaw nna shana de du hkra tsap nga ma ai gaw, hpa majaw rai ta?” ngu wu ai.

¹⁵Mawshe gaw, “Dai amyu masha ni Karai Kasang hpe san yu na nga, ngai kaw sa ma ai majaw, rai nga ai;

¹⁶shanhte amu rawng yang ngai kaw du sa nna ngai gaw masha wa hte shi a manang lapran e jeyang ya ai hte, Karai Kasang a ga matsun mung shi a tara mung ngai sharin ya mawe ai,” ngu nna katsa hpe tsun wu ai.

¹⁷Dai rai nna Mawshe a katsa gaw, “Dai nang galaw ai hku gaw, n rai nga lit dai;

¹⁸nang mung, nang hte rau nga ai ndai amyu mung, teng teng n-gun yawm mat na marin dai; amu dai gaw na matu nau wa li nga lit dai: nang hkrai sha dai hpe dang lu na n rai.

¹⁹Ya nye a ga madat u; ngai nang hpe hpaji daw ya de ga; Karai Kasang mung nang hte rau nga u ga: nang gaw Karai Kasang hte seng ai lam hta shanhte a matu htingrai nna, Karai Kasang kaw dai amu lam jashawn ya u:

²⁰ga matsun hte jep ai tara mung, nang shanhte hpe sharin ya nna, shanhte hkawm sa wa na lam hte galaw ra ai amu hpe, nang shanhte hpe madun ya na rai ndai.

²¹Dai hta kaga, ndai amyu yawng hta na, Karai Kasang hpe hkrit hkungga ai myit su ai masha, sadi sahka re ai hte sake manawn n tsaw ai masha nang san da na rai wu ai: dai ni hpe, masha hkying mi a agyi, latsa a agyi, manga shi a agyi, marai shi a agyi shatai nna dang tawn da u:

²²shanhte gaw galoi rai timung masha ni hpe tara dawdan ya mu ga; amu kaba rai yang sha nang kaw jashawn mu ga; amu kaji yawng gaw shanhte hkrai dawdan ya mu ga: dai rai jang shanhte nang hpe shingtau nna na a amu tsang na ra ai.

²³Ning rai Karai Kasang a ahkang hte nang galaw n yang gaw, nang hta n-gun rawng na ra ai; amyu masha ni mung tinang wa nga na mung de ngwipyaw ai hte sa wa lu na mara ai,” ngu nna tsun wu ai.

²⁴Mawshe mung katsa wa a ga madat wu ai rai nna, shi tsun ai hku yawng galaw wu ai.

²⁵Shing rai Mawshe gaw Israela amyu ting hta na myit su ai masha lata la nhtawm, masha hkying mi a agyi, latsa a agyi, manga shi a agyi, marai shi a agyi dang tawn da mu ai.

²⁶Dai ni gaw, galoi rai timung dai amyu masha ni hpe dawdan ya nga ma ai: yak ai amu rai yang sha Mawshe kaw jashawn mu ai; loi ai amu shagu gaw shanhte hkrai dawdan ya ma ai.

²⁷Dai hpang Mawshe gaw shi a katsa hpe shabawn dat wu ai; shi gaw shi a mung de bai wa mat ai.