Read Jinghpaw Hanson Version Bible PRU MAT 2 Bible Online

PRU MAT 2 - Jinghpaw Hanson Version Bible bible

PRU MAT 2

¹Dai hte yang Lewi amyu la langai mi gaw Lewi amyu num sa la wu ai.

²Shaloi dai num na-um nasin rai nna shadang sha mi shangai wu ai: ma dai ahpraw tsawm nga ai hpe kanu mu wu yang shata masum ting shi hpe makoi da wu ai.

³Dai hpang n makoi da lu nna, dai hpe namsu hte hpun naw chya nhtawm, ma hpe dai hta bang nna, hka kau na mai-aw tu ai shara e shawaw tawn wu ai.

⁴Kana mung, shi hta kaning rai byin ai, yu na nga, tsan tsan e tsap nga ai.

⁵Dai shaloi Hpara-u a shayi sha gaw hkum shin na nga hka de yu sa ai rai nna, shi a shangun num ni hka kau e garet khawm nga ma yang, dai mai-aw brap e sumpu hpe shi mu nna dai hpe sa shaw la na, shi a shangun num hpe shangun dat wu ai.

⁶Dai sumpu magap hpaw yu mu yang, dai ma hpe shi mu wu ai; yu mu, dai ma mung hkrap nga ai: shaloi shi matsan dum nna, Ndai gaw Hebre ma she rai nga ai, nga nna tsun ai.

⁷Dai ma a kana mung, “Na a matu dai ma hpe chyu shachyu ya na, Hebre num langai mi ngai wa saw ya de ga law?” ngu nna Hpara-u a shayi sha hpe tsun wu ai.

⁸Hpara-u a shayi sha mung, “Sa saw ya e,” ngu nna shangun dat wu yang, dai numsha ma gaw, dai ma chyangai a kanu hpe wa shaga ya wu ai.

⁹Dai rai nna Hpara-u a shayi sha gaw, “Ma chyangai ndai la wa nna nye a matu shapan ya e; ngai nang hpe shabrai jaw na de ai,” ngu nna shangun wu ai hte maren, dai numsha gaw ma chyangai dai hpe la wa nna chyu shachyu ya wu ai.

¹⁰Dai ma kaba wa jang, Hpara-u a shayi sha hpe sa sa ya wu ai rai nna shi a kasha tai nga ai: shi gaw dai ma hpe Mawshe ngu nna shamying wu ai: dai gaw, Hka hta na ngai shi hpe shaw la we ai, nga ai, rai lu ai.

¹¹Ya Mawshe kaba wa jang, shi a amyu masha ni kaw sa wa nhtawm shanhte gun li ai lit sa mada ya wu ai: shaloi Egutu masha langai mi gaw, shi a amyu Hebre masha langai mi hpe adup ajin di ai, mu wu ai.

¹²Dai rai nna grup yin mada yu yang, kadai mung n nga ma ai majaw, Egutu masha wa hpe sat kau nhtawm, zaibru hta lup kau wu ai.

¹³Hpang shani e shi bai pru hkawm yang, Hebre masha lahkawng shada kamu chyi nga ma ai: dai rai nna shi gaw dai dang ai wa mahtang hpe, “Hpa rai na manang wa hpe kayat n ta?” Ngu wu ai.

¹⁴Shaloi dai wa gaw, “Anhte a ntsa e du hte tara agyi tai na nang hpe gade e san tawn da a ta? Dai Egutu masha hpe nang sat kau ai zawn, ngai e mung sat kau na maw nga n ni?” ngu nna htan wu ai. Dai majaw Mawshe gaw, Gaja wa, ndai amu brawng sam sai, nga nna hkrit nga ai.

¹⁵Hpara-u dai lam na jang Mawshe hpe sat na tam nga ai. Mawshe chyawm gaw Hpara-u kaw na hprawng mat wa nna, Midian mung e sa nga nga ai: dai de du yang hka htung langai mi a makau e shi dung sa nga ai.

¹⁶Ya Midian hkinjawng gaw shayi sha sanit lu nga ai: shanhte gaw hka sa ja nna, shanhte a kawa a sagu bainam hpung ni hpe ntsin shayaw na nga, ntsin htung ni hta ja jahpring ma ai.

¹⁷Sagu rem ni gaw du sa nna shanhte hpe shachyut kau mu ai: Mawshe chyawm gaw rawt nna num ni hpe karum let, shanhte a sagu bainam hpung ni hpe ntsin shayaw ya mu ai.

¹⁸Bai shanhte gaw kawa Reuela hpang de du wa yang, shi gaw, “Dai ni gaw hpa rai ndai hte wa lawan wa lu marin ta?” ngu nna hkap san wu ai.

¹⁹Shanhte gaw, “Egutu masha langai mi anhte hpe sagu rem ni a lata na shaw la nna, anhte hpe hka ja karum ai hte sagu bainam hpung ni hpe ntsin shayaw ya mi ai,” ngu nna tsun dan mu ai.

²⁰Kawa gaw, “Rai taw, shi kanang rai nga a ta? shi hpe hpa rai kau da myit ta? shi shat sha ru ga, sa shaga la ma su,” ngu nna shi a shayi sha ni hpe tsun wu ai.

²¹Mawshe mung dai wa kaw nga ra nga ai rai nna, shi a shayi sha Tsihpura hte hkungran ya wu ai.

²²Num dai mung shadang sha shangai ai rai nna, Mawshe gaw, Masha mung ga e tsasam manam tai nga nngai, nga nna shi a amying hpe Gershom ngu nna shamying wu ai.

²³Ya nhtoi tsawmra wa na wa sayang she Egutu hkawhkam si mat ai: Israela a kashu kasha ni mung dai mayam lit a majaw, madai nna hkrap sharung ai ga gaw dai mayam lit kaw nna Karai Kasang hpang de hkrang lung wa malu ai.

²⁴Shanhte a madai sharung ai nsen hpe Karai Kasang na ya wu ai rai nna, Abraham, Isak, Yaku hte hte tawn da ai ga shaka hpe dum wu ai.

²⁵Karai Kasang gaw Israela a kashu kasha ni hpe mada mara yu nna, Karai Kasang gaw shanhte hpe dum nga ai.