Read Jinghpaw Hanson Version Bible PRU MAT 21 Bible Online

PRU MAT 21 - Jinghpaw Hanson Version Bible bible

PRU MAT 21

¹Da ndai mung nang shanhte hpe dawdan ya na tara rai nga ai:

²Nang Hebre mayam mari wu yang gaw kru ning sha yam lu na rai wu ai: sanit ning ngu na hta gaw shi hkum manu n hkrat ai pru wa lu na rai wu ai;

³ningnan yam ai kaw nna shi chyu sha rai yang gaw, shi chyu sha bai pru lu na rai wu ai; madu jan hte rai yang gaw, madu jan hte rau pru lu na rai wu ai.

⁴Shing n rai, shi a madu la ya ai num hte nga nna, dai num hte shayi shadang shaprat yang gaw, madu jan hte shi a shayi shadang sha ni gaw madu a rai nga ai; shi chyawm gaw shi chyu sha pru lu na rai wu ai.

⁵Rai timung dai mayam wa, Nye a madu hte nye a madu jan, kashu kasha ni hpe ngai nja nngai; ngai n pru n hkawm na nngai, nga nna dan dan leng leng tsun nga yang gaw;

⁶shi a madu gaw, Karai Kasang hpang de mung, chyinghka shing n rai hkadun daw de mung shi hpe woi sa nna, shi a na hpe sumprang hte shajut ya na rai wu ai: dai kaw nna gaw shi a madu kaw prat tup yamnga na rai wu ai.

⁷Masha langai ngai tinang a shayi sha hpe mayam di nna dut kau wu yang gaw, dai numsha gaw lasha yam zawn lawt pru lu na n rai.

⁸Shi a madu gaw shi hpe la nhtawm, bai n ra wu yang gaw, shi hpe hkrang la shangun u ga: shi hpe hkalem kau nu ai majaw, tsasam amyu kaw dut kau na ahkang lu na wu ai n rai.

⁹Tinang kasha hpe la ya wu yang gaw, shayi sha hpe zawn lahku u ga.

¹⁰Num kaga bai la kahtap ya wu yang gaw, shawng na num hpe lusha, hpun palawng hte lashum lanoi lam shayawm ya lu na n rai.

¹¹Ndai lam masum n shatup na rai yang gaw, shi hkum manu n hpyi ai dat dat lu na rai wu ai.

¹²Mahsa hpe sat kau ai wa gaw, teng teng si ai hkrum lu na rai nga ai.

¹³Sat na nga dingsa di ai n re ai sha, shi a lata hta Karai Kasang e ap kau ai rai yang gaw, shi hprawng lu na shara ngai na a matu san tawn ya na made ai.

¹⁴Manang wa hpe sat na nga, dingsa sa hpaji daw nna sat ai wa hpe gaw, nye a hkungri hta noi timung, shi si na matu dai kaw na dun la kau mu ga.

¹⁵Kanu kawa hpe sat ai wa gaw, teng teng sat kau ai hkrum u ga.

¹⁶Masha hpe lagu ai wa gaw, dut kau sai rai timung, shi a lata e naw nga ai rai timung, teng teng sat kau ai hkrum u ga.

¹⁷Kanu kawa hpe matsa ai wa gaw, teng teng sat kau ai hkrum u ga.

¹⁸Masha shada ga law nna langai mi gaw manang wa hpe nlung hte rai yang rai, lata hte htwi ai rai yang rai, shingna hkrum ai wa n si timung, yup ra e machyi taw nga ai rai yang mung,

¹⁹bai rat nna shi a kawhkrawng hte shinggan de rat hkawm lu ai rai yang mung, shingna dat ai wa hta mara lawt na rai nga ai, rai timung, machyi ai wa a hkatum tum ai a matu shi gumhpraw wa nna, shi hpe atsawm sha tsi shamai lu na rai wu ai.

²⁰Masha langai ngai tinang a mayam num, mayam la hpe hpuntawng hte kayat nna shi a lata hta si mat yang gaw, shi teng teng ari hkrum na rai nga ai:

²¹rai timung dai mayam wa lani, ni ni naw hkrung nga yang gaw, dai gaw shi a sut rai nga lu ai majaw, ari hkrum na n rai.

²²Masha shada kamu hkat nna hkum n manu ai numsha hpe hkra wu ai majaw, shi nbya bya kau hkra rai timung, nma kaga n kap yang gaw, dai num a madu wa tawn ai hku shi teng teng wa lu na rai nna, tara agyi ni dawdan ai hte maren jaw lu na rai wu ai.

²³Rai timung nma kap yang gaw, asak a matu asak,

²⁴myi a matu myi, wa a matu wa, lata a matu lata, lagaw a matu lagaw,

²⁵wan hkru ai a majaw wan hkru ai, hpye ai a matu hpye ai, shingna hkang ai a matu shingna hkang, hkrum lu na rai wu ai.

²⁶Masha langai ngai shi a mayam num, mayam la a myi hpe htwi jahten ya wu yang gaw, myi hte ai a matu shi hpe dat dau lu na rai wu ai.

²⁷Dai hte maren mayam num mayam la a wa hpe kayat daw ya wu yang gaw, wa daw ai matu shi hpe dat kau lu na rai wu ai.

²⁸Dumsu langai ngai numsha, lasha kadai hpe rai timung si hkra daru sat kau wu yang gaw, nga dai hpe nlung hte teng teng kabai sat lu na rai myit dai; de a shan mung sha lu na n rai; nga madu chyawm gaw mara lawt lu na rai nga ai.

²⁹Nga dai shawng de daru ga nga ai rai nna, dai hpe madu mung chye da ninglen, n dun n rem ai dat dat nna, lasha hpe shing n rai numsha hpe daru sat kau wu yang gaw, nga dai hpe nlung hte kabai sat kau ya nna, madu mung sat kau ai hkrum na rai wu ai.

³⁰Gumhpraw wa na hku dawdan ya mu yang gaw, shi a asak hkrang la na matu, dawdan ya mu ai hte maren shi hkum manu jaw lu na rai wu ai.

³¹Masha wa a shayi shadang hpe daru sat ya yang mung dai hte maren shi hpe di lu na rai wu ai.

³²Masha wa mayam num mayam la hpe daru sat ya wu yang gaw, shi a madu hpe shekela gumhpraw sumshi wa lu na rai wu ai: nga dai hpe mung nlung hte kabai sat kau na rai mu ai.

³³Masha langai ngai nhkun hpaw da ai rai yang rai, nhkun htu nna n magap da ai rai yang rai, dai hta e masha wa a nga dumsu, shing n rai lawze hkrat bang a yang gaw,

³⁴nhkun hpaw da ai wa, wa lu na rai wu ai; yamnga madu hpe shi gumhpraw wa nna, si mang hpe gaw shi la lu na rai wu ai.

³⁵Masha langai a usu gaw manang a usu hpe daru sat ai rai yang, nga madu yan gaw hkrung ai nga hpe dut nna, de a jahpu karan la na rai mu ai: si ai nga hpe mung karan la na rai mu ai.

³⁶Usu dai shawng de daru ga nga ai hpe madu chye ninglen n dun n rem ai dat da ai rai yang gaw, shi gaw usu a matu usu wa lu na rai wu ai; shing rai nga si mang gaw shi la lu na rai wu ai.