Read Jinghpaw Hanson Version Bible PRU MAT 22 Bible Online

PRU MAT 22 - Jinghpaw Hanson Version Bible bible

PRU MAT 22

¹Masha langai ngai, usu shing n rai sagu lagu la nna, dai hpe sat kau ai rai timung, dut kau ai rai timung, usu langai mi a matu usu manga, sagu langai mi a matu sagu mali bai wa lu na rai wu ai.

²Lagut wa nta tawk waw nga yang, masha mu hkrup nna si hkra anu kau timung, bunglat hka nga na n rai.

³Rai timung jan pru sai rai yang gaw bunglat wa lu na rai nga ai: shi wa lu na lam nga nga ai; shi hpa mung n lu yang gaw shi lagu ai rai a matu shi hkum hpe dut kau lu na rai nga ai.

⁴Shi lagu ai usu rai yang rai, lawze rai yang rai, sagu rai yang rai, shi lata e hkrung ai ta mu la lu yang gaw, htam lahkawng shi wa lu na rai nga ai.

⁵Masha wa a yi hkauna hta rai yang rai, tsabyi sun hta rai yang rai, tinang a yamnga sa rem shayaw ya ai; shing n rai, yamnga dat shalam dat nna masha wa a yi hkauna shang sha ya ai rai yang gaw, tinang yi hkauna, tinang sun na kaja htum ai shapraw nna, bai wa lu na rai wu ai.

⁶Wan nat dat ai majaw, ju tsing hta hkrawn hkru wa nna, hkauling, shing n rai, mam hpun hte yi hkauna pa hkru mat wa yang gaw, wan nat ai wa teng teng wa lu na rai wu ai.

⁷Masha langai ngai shi a htingbu wa kaw aja gumhpraw, shing n rai, arai lama ma kyem shangun na ap tawn da nna, kyem ya ai wa a nta na lagu mat wa ai rai yang, lagut wa hpe mu hkrup yang gaw lagut wa htam lahkawng wa lu na rai wu ai.

⁸Lagut wa hpe n mu hkrup yang gaw, nta madu wa, shi a htingbu wa a arai la ai n la ai gaw, Karai Kasang a man e sa kadeng mu ga.

⁹Kaning rai nme law, n tsen ai amu lam shagu hta, usu, lawze, sagu, hpun palawng re ai hte, mat ai rai lama ma mu nna, Ndai gaw nye a rai nga li ai, nga nna marai langai ngai tsun yang gaw, rai rem ai wa hte shan lahkawng Karai Kasang a man e sa kadeng nna, Karai Kasang man e amu dingdawng ai wa mahtang, htam lahkawng wa lu na rai wu ai.

¹⁰Masha langai ngai shi a htingbu wa kaw, Rem da ya e, nga nna shi sawze, dumsu, sagu re ai hpa yamnga rai timung, ap da ai hta na si mat ai rai timung, hkala nna machyi ai rai timung, masha e gawt mat wa ai rai timung, kadai n mu ai rai yang,

¹¹rem ya wa gaw manang wa a rai shi la ai n la ai, Yehowa hta dagam nna, shan a lapran e dai dagam ai hte ngut u ga; rai madu mung dai hku hkraw u ga; rem ya ai wa mung n wa u ga.

¹²Rai timung shi kaw na masha lagu mat wa ai rai yang gaw, rai madu hpe wa lu na rai wu ai.

¹³Rai matse e kawa sat ai rai yang gaw sakse matu si mang madun u ga: kawa sat hkrum ai a matu shi wa lu na n rai.

¹⁴Masha langai ngai htingbu wa kaw na lama ma shap la nna, madu hte n re ai si mat ai rai timung, hkala nna machyi mat ai rai timung, teng teng wa lu na rai wu ai:

¹⁵madu hte rai yang gaw shap ai wa, wa ra na n rai: ugun hte shap ai rai yang gaw ugun sha hpyi na rai wu ai.

¹⁶Masha langai ngai kadai garai n mahtan ai mahkawn hpe lau nna shi hte yup nga yang gaw, shi teng teng hpu bang nna shi hpe la na rai wu ai.

¹⁷Rai timung kawa n jaw n ya mayu yang gaw, hpu bang ang ai made, gumhpraw wa lu na rai wu ai.

¹⁸Nat sangau ai num hpe jahkrung da lu na ndai n rai.

¹⁹Yamnga hte kanawn ai kadai rai timung teng teng sat kau ai hkrum lu na rai nga ai.

²⁰Yehowa hta kaga hpara shaje a man e hkungga jau ai wa gaw, atsai awai hpya kau ai hkrum lu na rai nga ai.

²¹Egutu mung e nanhte masha tsasam manam hpe yu manit dai majaw, tsasam manam hpe sharu shatsang zingri zingrat di lu na ndai n rai.

²²Gaida jan hte jahkrai nmai ma hpe nanhte sharu shatsang lu na n rai.

²³Nang shan hpe lama ma di sharu shatsang nna, ngai hpe shan hte loi mi sha jahtau timung, ngai shanhte a nsen teng teng na lu nna,

²⁴nye a myit pawt bu na hte, nanhte hpe nhtu hte ngai sat kau na made ai: shaloi nanhte a madu jan ni gaida tai nna nanhte a kashu kasha ni mung jahkrai ma tai na mara ai.

²⁵Nang hte rau nga ai nye a amyu matsan mayan wa hpe, gumhpraw hkoi ya n yang gaw, gumhpraw boi sha wa zawn shi hpe hkum di et; amyat hkum hpyi et.

²⁶Na a htingbu wa nang kaw shi a hpajawng sa tang da yang, jan garai n du yang nang bai ya lu na rai ndai: kaning rai nme law, shi hpun ai hpajawng dai sha rai lu ai:

²⁷shi a hpun palawng mung rai lu ai: shi hpa hpun yup na rai ta? ngai matsan dum nga nngai majaw, shi ngai hpe jahtau yang ngai na la ya na nngai.

²⁸Nang Karai Kasang hpe shatan lu na ndai n rai; na amyu hta na du hpe mung matsa lu na n rai.

²⁹Shawng myin ai nsi naisi, shawng shup ai tsabyi jahku, n shim n dang ai sha jaw lu na ndai. Shawng shaprat ai shadang sha mung ngai e jaw lu na ndai.

³⁰Dai hte maren, sagu, dumsu hpe mung dai hku di lu na rai ndai; sanit ya tup kanu hte nga shangun nna matsat ya ngu na nhtoi du jang, ngai e sa jaw lu na rai ndai.

³¹Nanhte nye a chyoi pra ai masha tai nga na rai myit dai; dai re ai majaw, nam na matse labye e kawa sat ai shan nanhte sha lu na myit dai n rai; dai gaw gwi ni hpe kabai jaw kau na rai myit dai.