Read Jinghpaw Hanson Version Bible PRU MAT 24 Bible Online

PRU MAT 24 - Jinghpaw Hanson Version Bible bible

PRU MAT 24

¹Bai Yehowa gaw Mawshe hpe, “Nang hte Arun, Nadab, Abihu hte hte Israela salang sanit shi, Yehowa hpang de rau lung wa nna shanhte tsan tsan e nawku nga mu ga;

²Mawshe chyu sha Yehowa hpang de sit sa lu na rai nga ai; kaga ni gaw sit sa lu na n rai; amyu masha ni mung, shi hte rau lung wa lu na ma ai n rai,” ngu wu ai.

³Shaloi Mawshe yu wa nna, Yehowa a ga mahkra hte shi hkang dat ai tara mahkra amyu masha ni hpe tsun shana wu ai: amyu masha ni mahkra mung, Yehowa tsun matsun mahkra anhte hkan galaw na ga ai, nga nna lang lata sha htan ma ai.

⁴Mawshe gaw Yehowa a ga mahkra ka da ngut jang, jahpawt jau jau rawt nna, bum lagaw e tawn hkungri gaw nhtawm, Israela amyu shi lahkawng hkan nna shadaw shi lahkawng jun tawn da wu ai.

⁵Israela kashu kasha hta na shabrang ni hpe shi shangun dat nna shanhte gaw, Yehowa a matu wan nat hkungga hte mahku hkungga di na usu sat nawng mu ai.

⁶Mawshe gaw sai ka-ang hkup la nna dai hpe ang hta bang tawn wu ai; ka-ang hkup gaw tawn hkungri hta lapri bun wu ai.

⁷Dai ga shaka laika mung shi la nna shawa hpawng a man e hti dan wu ai: shanhte mung, Yehowa tsun matsun mahkra anhte hkan galaw let madat na ga ai, nga nna tsun ma ai.

⁸Bai Mawshe gaw dai sai la nna amyu masha ni hpe lapri bun let, “Yu mu, sai ndai gaw, ndai amu a lam mahkra hta Yehowa nanhte hpe yin la ai ga shaka asai rai nga ai,” ngu nna tsun wu ai.

⁹Shaloi Mawshe hte Arun, Nadab, Abihu hte hte Israela salang sanit shi lung wa ma ai rai nna,

¹⁰shanhte gaw Israela a Karai Kasang hpe mu ma ai; shi a lagaw npu e, sahpira lungseng zawn htoi ala ai hte lamu san kabrim ai zawn re ai nep nga ai.

¹¹Shi gaw Israela a du salang ni hpe shi a lata hte hkra wu ai n rai, shanhte mung Karai Kasang hpe mu lu ninglen lu let sha let nga lu ma ai.

¹²Bai Yehowa gaw Mawshe hpe, “Ngai nga ai bum de lung nna wa nga rit; masha ni hpe, nang sharin achyin ya lu na matu, lungpa hta ngai ka da ai nye a matsun hte hkang ai tara, ngai nang hpe jaw de ga,” ngu wu ai.

¹³Shaloi Mawshe hte shi a hkringmang Yawshu rawt nna, Mawshe gaw Karai Kasang a bum de lung wa ai.

¹⁴Salang ni hpe mung, “Nanhte hpang de an bai yu wa ai du hkra, nang e ala nga mi: yu mu, Arun yan Hura nanhte hte rau rai nga ai rai nna, amu rawng ai ni kadai mung shan kaw sa mu ga,” ngu nna tsun da mu ai.

¹⁵Shaloi Mawshe dai bum de lung wa ai; sumwi mung dai bum hpe ka-up da wu ai.

¹⁶Yehowa a hpung shingkang Sina bum ntsa e dan hkung nga ai hte, sumwi mung kru ya tup a ka-up nga ai; sanit ya ngu na nhtoi hta dai sumwi kata nna, shi Mawshe hpe shaga wu ai.

¹⁷Yehowa a hpung shingkang gaw, dai bum pungding ntsa e, grung nga ai wan zawn, Israela kashu kasha ni a man e mahkran nga ai.

¹⁸Shaloi Mawshe gaw dai sumwi kata de shang nna dai bum de du lung wa ai: Mawshe gaw dai bum ntsa e nhtoi mali shi ya tup nga nga ai.