Read Jinghpaw Hanson Version Bible PRU MAT 25 Bible Online

PRU MAT 25 - Jinghpaw Hanson Version Bible bible

PRU MAT 25

¹Shaloi Yehowa Mawshe hpe tsun wu ai gaw,

²“Israela kashu kasha ni nye a matu Kumhpaw kumhpa la sa na tsun mu: kam jaw ai myit hte jaw mayu ai masha hkum shagu hta na, nanhte nye a matu alu kumhpa hkap la da na rai myit dai.

³Shanhte kaw na nanhte hkap la da na alu kumhpa baw gaw ndai rai na rai malit dai; aja, gumhpraw, magri;

⁴sawm tsit ai ri, hkyeng mang ai ri, hkyeng tsawm ai ri, mani ai lachyit sumpan, bainam mun;

⁵jaw shahkyeng ai sagu la hpyi, tahkisha hpyi, marau hpun;

⁶wan shatu na matu sau; chya ya na namman hte manam pyaw ai baw nat na matu manam pyaw ai baw;

⁷unuk lungseng, dai hpa hkai lawng hte sinda magap hta hkrep na matu lungseng re ai ni, nanhte hkap la da na rai myit dai.

⁸Ngai shanhte hta shanu nga na matu, chyoi pra ai nta nye a matu shanhte galaw mu ga.

⁹Ngai nang hpe madun dan de ai kasi hte maren, dai sumpan sum hte de a ari nlang hte hpe, nanhte galaw lu na rai myit dai.”

¹⁰“Marau hpun hte sumpu langai mi shanhte galaw na rai mu ai: dai gaw, galu de dawng lahkawng e lahkam mi, nda de dawng me lahkam mi, tsaw de dawng me lahkam mi, rai na rai nga ai.

¹¹Dai hpe kata, ntsa ja jet hte kayawp lu na rai wu ai; de a ntsa nten grup grup, ja machyi nang shakau lu na rai wu ai.

¹²De a matu mung ja shanghkawng mali jaw la nna, de a jut mali hta shatut da na rai wu ai; maga mi de shanghkawng lahkawng hkawng rai na rai nga ai.

¹³Marau hpun hte kandang mung nang galaw nna, dai hpe ja hte sup na rai wu ai.

¹⁴Dai sumpu hpe hpai na matu, sumpu a maga mi hte maga mi de na shanghkawng ni hta, dai kandang dinghkrawn da na rai wu ai.

¹⁵Dai kandang ni hpe sumpu a shanghkawng ni hta na n shaw kau ai sha tutnawng dinghkrawn da na rai mu ai.

¹⁶Ngai nang e jaw na de ai sakse ga hpe dai sumpu hta nang bang da na rai ndai.

¹⁷Ja jet hte Chyeju magap mung nang galaw lu na rai ndai; dai mung galu de dawng lahakang e lahkam mi, nda de dawng me lahkam mi rai na rai nga ai.

¹⁸Ja hte Hkerubim lahkawng mung nang galaw lu na rai ndai; dai chyeju magap a matu maga mi hte maga mi de tawk nna nang galaw na rai ndai.

¹⁹Ndai matu de Hkerub langai mi, wora matu de Hkerub langai mi galaw da u: dai chyeju magap hkum hta nna, de a matu a lahkawng maga hta Hkerubim lahkawng nanhte galaw shapraw lu na rai myi dai.

²⁰Dai Hkerubim lahkawng yan myi man hkrum rai nna, dai chyeju myi magap de myi man yawng let, shan a singkaw kapyen nhtawm, dai chyeju magap hpe ka-up na rai mu ai.

²¹Chyeju magap dai hpe sumpu hta magap tawn da na rai wu ai; ngai nang hpe jaw na de ai sakse ga hpe dai sumpu kata e nang bang da lu na rai ndai.

²²Dai kaw e ngai nang hte jahkrum nna, dai sakse sumpu a chyeju magap ntsa na, Hkerubim lahkawng a lapran e, Israela kashu kasha ni a matu mara, ngai nang hpe hkang dat ra ai lam shagu, ngai nang hpe ga tsun na nngai.”

²³“Bai marau hpun hte ku langai mi nang galaw lu na rai ndai; dai gaw, galu de dawng lahkawng, nda de dawng mi, tsaw de dawng me lahkam mi rai na rai nga ai.

²⁴Dai hpe ja jet hte nang kayawp na rai wu ai; dai hta grup grup ja hte htinggawt dat na rai wu ai.

²⁵Dai hta e, de a matu grup grup lahpa hpa shakra da nna, dai kra ai a matu grup grup mung ja hte machyi shakau na rai wu ai.

²⁶De a matu ja hte shanghkawng mali nang galaw nna, de a lagaw mali hta na jut mali hte hta e dai shanghkawng ni shatut da na rai wu ai.

²⁷Dai ku hpai na matu, dai kra ai a npu e shanghkawng ni hpe shatut da nna, kandang dingkrawn na shara rai na rai nga ai.

²⁸Dai ku hpai na matu marau hpun hte kadang mung nang galaw nna, ja jte hte sup na rai wu ai.

²⁹Dai ku hte seng ai wan ni, chyaw ni, ang ni hte ru jaw na matu gawm ni hpe, ja jet hte nang galaw lu na rai ndai.

³⁰Nye a man e ku dai hta tutnawng madun dan nga na muk nang bang tawn da lu na rai ndai.”

³¹“Ja jet hte pyengdin shadun langi mi mung nang galaw lu na rai ndai: dai pyengdin shadun na htumpa, madung, wan ni, gumdin ni hte nampan ni hpe, langai sha di nna dup na rai ndai:

³²dai madung hta nna, maga mi de lakying masum sum di nna, lakying kru pru na rai nga ai:

³³dai pyengdin madung hta na pru ai maga mi a lakying langai mi hta nampan pu zawn re ai wan masum hte de a gumdin masum yep yep rai nga ai; bai maga mi de na lakying langai mi hta mung, nampan pu zawn re ai wan masum hte de a gumdin masum yep yep rai nga ai: dai zawn dai pyengdin madung hta na pru ai lakying kru hte hta shing re ai rai na rai nga ai:

³⁴dai pyengdin madung hta mung, nampan pu zawn re ai wan mali hte de a gumdin mali yep yep rai na rai nga ai:

³⁵bai lakying man shagu a matut ai npu e gumdin langai ngai rai na rai nga ai: shing rai dai pyengdin madung na pru ai lakying man masum a matu rai na rai nga ai.

³⁶De a gumdin ni hte lakying ni hpe langai sha di nna, dai pyengdin hkum ting hpe ja jet hte dup na rai wu ai.

³⁷Dai hta shadun na pyengdin sanit mung, nang galaw lu na rai ndai: dai ku hta htoi nga na matu dai pyengdin hpe shatu tawn da na rai mu ai.

³⁸De a lakap ni hte kap bang na wan ni mung ja jet hte rai na rai nga ai.

³⁹Dai pyengdin hte de a arai mahkra hpe ja jet joi shi daram hte galaw lu na rai nga ai.

⁴⁰Bum e nang hpe madun dan sade ai kasi hte maren dai hte hpe galaw lu hkra sadi nga u.